Xiviko Xa Vahuweleri Va Mfumo

ka Xikwembu Swilo Hinkwaswo Swa Koteka”

MARITO lama nga laha henhla, lama kumekaka eka Matewu 19:26, ma tikombe ma ri ntiyiso eka nhwanyana un’wana wa le Venezuela. Endzhaku ka loko a dyondze ku tshemba Yehovha hilaha ku heleleke, u swi kotile ku hlula xiphiqo lexikulu. U ri:

“Kokwana wa mina wa xisati a a ri ni musa ni rirhandzu. Khombo ra kona, u fe loko ndzi ri ni malembe ya 16 hi vukhale. Rifu rakwe ri ve ku lahlekeriwa lokukulu eka mina. Leswi swi ndzi karhate ngopfu emianakanyweni lerova ndzi nga lavi na ku huma endlwini ndzi ya ehandle. Ndzi hetelele ndzi tihambanise ni vanhu hilaha ku heleleke.

“A ndzi nga yi exikolweni naswona a ndzi nga tirhi. A ndzi titshamela ekamareni ra mina. Hikwalaho ka ku va ni xivundza ni ku pfumala vanghana, ndzi ve ni ntshikilelo lowukulu wa mianakanyo. Ndzi titwe ndzi nga pfuni nchumu hilaha ku heleleke lerova a ndzi navela ku fa ndzi hambana ni maxangu ya vutomi. A ndzi tshamela ku tivutisa ndzi ku, ‘Ha yini ndzi hanya?’

“Manana a a hamba a amukela timagazini ta Xihondzo xo Rindza na Xalamuka! eka muntshwa la nga Mbhoni, loyi vito rakwe ku nga Gisela. Siku rin’wana manana u vone Gisela a ri karhi a hundza ekaya ra ka hina kutani a n’wi vutisa loko a nga swi kota ku ndzi pfuna. Gisela u pfumerile leswaku u ta ringeta, kambe ndzi ale ku n’wi vona. Leswi a swi n’wi hetanga matimba Gisela. U ndzi tsalele papila a ndzi byela leswaku u lava ku va munghana wa mina ni leswaku munhu un’wana wa nkoka swinene ku tlula yena, u lava ku va munghana wa mina. U vule leswaku munhu yoloye i Yehovha Xikwembu.

“Leswi swi ndzi khumbile, kutani ndzi hlamule papila rakwe. Hi tsalelanile ku ringana tin’hweti tinharhu. Ndzi hetelele ndzi ve ni xivindzi xa ku vonana na Gisela endzhaku ka loko a ndzi kombele ko tala. Loko hi vonana ro sungula, Gisela u dyondze Bibele na mina, a tirhisa buku leyi nge U Nga Hanya Hi Masiku aParadeyisini eMisaveni. Endzhaku ko dyondza, u ndzi rhambele ku va kona enhlanganweni eHolweni ya Mfumo ya kwalaho. Ndzi hlamarisiwile. A ndzi nga si tshama ndzi huma endlwini ku ringana malembe ya mune, kutani mianakanyo ya ku va exitarateni a yi ndzi chavisa.

“Gisela a a nga ndzi heleli mbilu. U ndzi tiyisekisile leswaku a ku na nchumu lowu chavisaka ni leswaku u ta famba na mina eminhlanganweni. Ndzi hetelele ndzi pfumerile. Loko hi fika eHolweni ya Mfumo, ndzi sungule ku rhurhumela ni ku dzuka nyuku. A ndzi nga swi koti ku pfuxela munhu ni un’we. Nilokoswiritano, ndzi pfumerile ku ya emahlweni ndzi va kona eminhlanganweni, naswona Gisela a a ndzi endzela vhiki rin’wana ni rin’wana a nga tlurisi.

“Ku ndzi pfuna leswaku ndzi hlula ku chava ka mina, Gisela a a famba na mina eminhlanganweni ka ha ri ni nkarhi swinene. Hi yime enyangweni ivi hi pfuxela vanhu hinkwavo loko va ri karhi va nghena. Hi ndlela yoleyo, a ndzi langutana ni munhu un’we kumbe vambirhi ku ri ni ku langutana na vona hinkwawo hi nkarhi wun’we. Loko ndzi titwa ndzi heleriwa hi matimba, Gisela a a ndzi tshahela Matewu 19:26 leyi nge: ‘Eka vanhu leswi a swi koteki, kambe eka Xikwembu swilo hinkwaswo swa koteka.’

“Hambileswi a swi nga olovi, eku heteleleni ndzi swi kotile ku ya etinhlengeletanweni ta xifundzha laha ku nga ni vanhu vo tala. Rero a ku ri goza lerikulu swinene leri ndzi ri tekeke! Hi September 1995, ndzi ve ni xivindzi xa ku byela vakulu leswaku ndzi lava ku huma nsimu. Tin’hweti ta tsevu endzhaku, hi April 1996, ndzi kombise ku tinyiketela ka mina eka Yehovha hi ku khuvuriwa ematini.

“A hi khale loko un’wana a ndzi vutise leswaku ndzi xi kumise ku yini xivindzi xa ku endla leswi, ndzi hlamule ndzi ku: ‘Ku navela ka mina ku tsakisa Yehovha ku kule ku tlula ku chava loku ndzi nga na kona.’ Hambileswi ka ha riki ni minkarhi leyi ndzi khomiwaka hi gome, ntsako wa mina wu tiyisiwa hileswi ndzi nga phayona ra nkarhi hinkwawo. Loko ndzi languta endzhaku, ndzi kuma leswaku Gisela a a tiyisile. Sweswi ndzi ni Munghana la khathalaka hi mina ni loyi ‘a ndzi nyikaka matimba.’”—Vafilipiya 4:13.

[Swifaniso leswi nga eka tluka 8]

“Ku navela ka mina ku tsakisa Yehovha ku kule ku tlula ku chava loku ndzi nga na kona”