Ntlawa Wa Le Gilead Wa Vu-108 Wu Khutaziwa Ku Endla Ntirho Wo Kwetsima

EBIBELENI vugandzeri bya Xikwembu nkarhi wo tala ku kombeteriwa eka byona hi xiga lexi nge “ntirho wo kwetsima.” Xiga lexi xi huma eka rito ra Xigriki leri vulaka ku endlela Xikwembu ntirho. (Varhoma 9:4) Vanhu va 5 562 lava yingiseleke nongonoko wa ku thwasa ka ntlawa wa vu-108 wa Xikolo xa Bibele xa Gilead xa Watchtower va twe swivulavuri swi nyikela ndzayo leyi tirhaka leyi nga ta pfuna mathwasana ku endla ntirho wo kwetsima lowu amukelekaka eka Yehovha Xikwembu.a

Theodore Jaracz, xirho xa Huvo leyi Fumaka ya Timbhoni ta Yehovha a ri mutshama-xitulu. Nongonoko wu sunguriwe hi risimu 52 leri nge “Vito Ra Tata Wa Hina.” Layini ya vumbirhi ya risimu rero yi ri: “Sweswi hi lava tindlela ta ku ku kwetsimisa.” Kunene sweswo swi kombise ku navela ka mbilu hinkwayo ka swichudeni swa ntlawa lowu thwasaka (leswi a swi huma ematikweni ya khume) ku ya tirhisa leswi va swi dyondzeke eswiavelweni swa swona swa vurhumiwa, leswi nga ta va ematikweni ya 17.

Makwerhu Jaracz emaritweni ya yena yo pfula u yise nyingiso eka tin’hweti ta ntlhanu leti swichudeni swi ti heteke swi dyondza Bibele hi vuenti leswi va lulamiseleke ku tirha emasin’wini mambe. Leswi swi va pfune leswaku va ‘tiyiseka hi swilo hinkwaswo,’ leswi vulaka ku kambisisa eka rivoni ra Rito ra Xikwembu leswi va swi dyondzeke enkarhini lowu hundzeke ni ku ‘khomelela swi tiya eka leswinene.’ (1 Vatesalonika 5:21) U va khutaze ku khomelela hi ku tshembeka eka Yehovha, eRitweni rakwe ni le swiavelweni leswi va leteriweleke swona. I yini leswi nga ta va pfuna loko va ri karhi va endla hinkwaswo leswi?

Ndzayo Leyi Tirhaka Leyi Pfunaka Ku Endla Ntirho Wo Kwetsima

Lon Schilling, xirho xa Bethel Operations Committee, u vulavule hi nhloko-mhaka leyi nge “Xana U Ta Wu Hlula Ndzingo Wo Va La Anakanyelaka?” U kandziyise nkoka wo va la anakanyelaka leswi kombisaka vutlhari bya vukwembu. (Yakobo 3:17) Ku anakanyela swi katsa ku va la pfumelelanaka ni swiyimo, ku nga yi hi nghohe, ku ringanisela, ku khathala hi van’wana ni ku tikhoma. Makwerhu Schilling u te: “Vanhu lava anakanyelaka va ringanisela loko va tirhisana ni van’wana. A va hundzeleti swilo.” Xana i yini lexi nga pfunaka murhumiwa leswaku a anakanyela? I ku va ni vonelo lerinene hi wena, ku va la yingisaka ni ku dyondza eka van’wana ni ku yingisa mavonelo ya van’wana kambe u nga landzuli misinya ya milawu ya Xikwembu.—1 Vakorinto 9:19-23.

“U Nga Rivali Ku Dya!” a ku ri nhloko-mhaka ya nkulumo leyi landzeleke leyi tsakisaka enongonokweni, leyi nyikeriweke hi Samuel Herd, ku nga xirho xin’wana xa Huvo leyi Fumaka. U kandziyise nkoka wa ku va ni madyelo lamanene hi tlhelo ra moya leswaku va ta tshama va swi fanelekela ku endla ntirho wo kwetsima. Makwerhu Herd u te: “Ntirho wa n’wina wa swa moya, wu ta engeteleka hi xihatla loko mi sungula ku nghena exiavelweni xa n’wina xo chumayela ni ku dyondzisa. Hikokwalaho ku ta va ni xilaveko xa leswaku mi engetela ndlela ya n’wina yo dya swakudya swa moya leswaku mi ta kota ku ringanisela matimba ya n’wina.” Ku dya swakudya swa moya nkarhi na nkarhi swi nga pfuna murhumiwa ku papalata ntshikilelo wa moya ni ku kumbuka ekaya. Swa pfuna leswaku u eneriseka u tlhela u tiyimisela ku tshama exiavelweni xa wena xa ntirho wo kwetsima.—Vafilipiya 4:13.

Muleteri un’wana wa le Gilead, Lawrence Bowen, u khutaze swichudeni leswi thwasaka leswaku swi “Tlhelela Endzhaku Eku Sunguleni.” Xana a a vula yini? U kombele vayingiseri hinkwavo ku pfula eka Swivuriso 1:7 leyi nge: “Ku chava Yehovha i masungulo ya vutivi.” Xivulavuri xi hlamuserile: “Xin’wana ni xin’wana lexi honisaka ntiyiso wa leswaku Yehovha u kona xi nga ka xi nga faneleki leswaku xi va vutivi bya xiviri kumbe vutivi lebyinene.” Makwerhu Bowen u fanise leswi Rito ra Xikwembu, Bibele yi swi hlamuselaka ni xifaniso lexi vumbiwaka hi ku hlanganisela swipetlu swa xona. Loko swipetlu swi hlanganisiwa ku va ni xifaniso. Loko swipetlu swi tele, xifaniso xa kula ni ku vonaka kahle, naswona munhu u sungula ku xi rhandza ngopfu. Leswi swi nga hi pfuna hinkwerhu ku endlela Xikwembu ntirho wo kwetsima.

Wallace Liverance, mutsarisi eXikolweni xa le Gilead, u gimete ntlhandlamano wa tinkulumo. Nhloko mhaka ya yena a yi ku “Nyikela Minkhenso Tanihi Xitlhavelo Xa Wena Eka Xikwembu.” U vulavule hi xiendlakalo xa Yesu xo hanyisa vanhu va nhlokonho va khume. (Luka 17:11-19) I un’we ntsena la tlheleleke a ya dzunisa Xikwembu a tlhela a nkhensa Yesu. Makwerhu Liverance u te: “Handle ko kanakana, lavan’wana a va tsakile hi ku basisiwa ka vona. Va tsakele ku basisiwa ka vona, kambe swi vonaka onge leswi a va swi lava a ku ri ku vuriwa lava baseke hi vaprista.” Ku basisiwa hi tlhelo ra moya loku vaka kona hikwalaho ko dyondza ntiyiso, swin’we ni ku nkhensa, swi fanele swi susumetela munhu ku kombisa ku nkhensa eka Xikwembu hikwalaho ka vunene bya xona. Swichudeni swa ntlawa wa vu-108 wa le Gilead swi khutaziwe ku anakanyisisa hi mintirho hinkwayo ya Xikwembu ni vunene bya xona leswaku swi ta kota ku endla ntirho wa swona ni switlhavelo swa swona, swi va xikombiso xo nkhensa eka Xikwembu.—Pisalema 50:14, 23; 116:12, 17.

Mintokoto Ni Mimbulavurisano Malunghana Ni Ndlela Leyi Swi Nga Endliwaka Ha Yona

Mark Noumair, muleteri un’wana wa le Gilead, u fambise xiyenge lexi landzeleke xa nongonoko. A xi katsa mintokoto ya le nsin’wini ya ntlawa lowu hi nkarhi wa ku leteriwa ka wona. Swichudeni swi hete malembe ya kwalomu ka 12 hi xiringaniso entirhweni wa nkarhi hinkwawo swi nga si ta eGilead. Loko swa ha ri exikolweni, swi sungule tidyondzo ta Bibele to hlaya ni vanhu va mindhavuko yo hambana-hambana, leswi kombisaka leswaku swichudeni swa swi kota ku va “swilo hinkwaswo eka vanhu va mixaka hinkwayo.”—1 Vakorinto 9:22.

Endzhaku ka mintokoto ya swichudeni, Charles Molohan na William Samuelson, va burisane ni swirho swin’wana swa ndyangu wa Bethele ni valanguteri lava famba-fambaka lava tshameke va ya eGilead. Un’wana wa vamakwerhu loyi ku burisaniweke na yena, ku nga Robert Pevy, u tirhe ePhilippines endzhaku ka ku thwasa ka yena eka ntlawa wa vu-51 wa le Gilead. U tsundzuxe ntlawa a ku: “Nkarhi wun’wana ni wun’wana loko ku ri ni xiphiqo, un’wana ni un’wana u nyikela swiringanyeto swa yena malunghana ni ndlela leyi xi nga lulamisiwaka ha yona. Nkarhi hinkwawo ku tshama ku ri ni un’wana la antswaka ku ri na wena, la nga ta ta ni vonelo ro antswa. Kambe loko u languta eBibeleni naswona u ringeta ku kuma mavonelo ya Xikwembu etimhakeni to karhi, a nga kona la nga ta ta ni mavonelo lama tlulaka ya xona. Yoleyo ku ta tshama ku ri nhlamulo leyinene.”

Loko a katsakanya nongonoko lowu lowunene wa swa moya, John Barr, xirho xa Huvo leyi Fumaka u vulavule hi nhloko-mhaka leyi nge “Endlela Yehovha Ntirho Lowo kwetsima Lowu Amukelekaka.” U kombise ndlela leyi ntirho wo kwetsima wu nga kombisiwaka ha yona ensin’wini leswaku ku pfuniwa vanhu va timbilu letinene ku gandzela Xikwembu hi ndlela leyi amukelekaka. Endzhaku ko pfula eka marito ya Yesu eka Matewu 4:10, Makwerhu Barr u te: “Leswaku hi ta gandzela Yehovha ntsena, hi fanele hi papalata tindlela hinkwato ta ku gandzela swifaniso, to fana ni makwanga, ku navela ku fuma ni ku titlakusa. Swa hi tsakisa ku vona leswaku varhumiwa va endle rhekhodo leyinene ku sukela hi va-1940 ku fikela sweswi entirhweni lowu! Naswona ha tiyiseka leswaku n’wina mathwasana ya ntlawa vu-108 wa le Gilead mi ta landzela xikombiso xa vona lexinene. Mi ta endlela Yehovha ntirho wo kwetsima, loyi ku nga yena ntsena a faneriwaka hi ku wu kuma.”

Yoleyo a ku ri nhlohlorhi leyinene eka nongonoko lowu akaka. Kutani se a ku ri nkarhi wo twa marungula lama humaka emisaveni hinkwayo yo wu navelela leswinene, nkarhi wo nyikiwa tidiploma ni wa ku hlayiwa ka papila leri humaka eka ntlawa, leri a ri kombisa ku tlangela vuleteri lebyi wu byi kumeke. Ntlawa lowu thwasaka wu khutaziwe ku kombisa mfanelo yo tshembeka eswiavelweni swa wona ni le ku tirheleni ka Yehovha. Hinkwavo lava a va ri kona ku katsa ni vaendzi lava humaka ematikweni ya 25, va hlanganyerile eku gimeteni ka nongonoko hi risimu ni xikhongelo.

[Nhlamuselo ya le hansi]

[Bokisi leri nga eka tluka 23]

TINHLAYO TA NTLAWA

Nhlayo ya matiko lama yimeriweke: 10

Nhlayo ya matiko lawa va averiweke eka wona: 17

Nhlayo ya swichudeni: 46

Xiringaniso xa malembe: 34

Xiringaniso xa malembe entiyisweni: 16

Xiringaniso xa malembe evutirhelini bya nkarhi hinkwawo: 12

[Xifaniso lexi nga eka tluka 24]

Ntlawa Wa Vu-108 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.