“Tshinelani Eka Xikwembu, Kutani Xi Ta Tshinela Eka N’wina”

Emahlweni Ni Le Ndzhaku—Ndlela Leyi Bibele Yi Hundzuleke Wanuna Un’wana Ha Yona

VUYIMBELERI a byi ri nchumu wa nkoka swinene evuton’wini bya Rolf-Michael. A a lawuriwa hi swidzidzirisi. Loko a ha ri jaha le Jarimani, a a byi kukutlela kunene byala naswona a a yi tirhisa hi ku ntshunxeka LSD, khokheyini, hashish, ni swidzidzirisi swin’wana leswi khumbaka mianakanyo.

Rolf-Michael u khomiwile loko a ha ringeta ku ngungumerisa swidzidzirisi swi ya etikweni rin’wana ra le Afrika, kutani a heta tin’hweti ta 13 a ri ekhotsweni. Loko a ri kwale khotsweni u kote ku anakanya hi xikongomelo xa xiviri xa vutomi.

Rolf-Michael ni nsati wa yena Ursula, a va lava ku tiva xikongomelo xa vutomi hi timbilu ta vona hinkwato naswona a va lavisisa ntiyiso. Hambileswi tikereke leti tivulaka ta Vukreste a ti va khomise tingana, a va swi navela swinene ku tiva Xikwembu. Kambe a va ri ni swivutiso naswona a va nga kumi tinhlamulo leti enerisaka eka vukhongeri byo hambana-hambana. Ku tlula kwalaho, vukhongeri lebyi a byi nga va susumeteli ku hundzula vutomi bya vona.

Eku heteleleni Rolf-Michael na Ursula va hlangane ni Timbhoni ta Yehovha. Loko a sungule ku dyondza Bibele, Rolf-Michael u khumbiwe swinene hi xitsundzuxo lexi nge: “Tshinelani eka Xikwembu, kutani xi ta tshinela eka n’wina.” (Yakobo 4:8) A a tiyimiserile ku ‘cukumeta vumunhu bya khale lebyi a byi fambisana ni ndlela ya yena yo sungula ya ku tikhoma kutani a ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.’—Vaefesa 4:22-24.

Xana Rolf-Michael a a ta byi ambala njhani vumunhu lebyintshwa? U kombiwe ku suka eBibeleni leswaku “vutivi lebyi kongomeke” byi nga endla leswaku munhu a hundzula vumunhu bya yena “byi va byintshwa hi ku ya hi xifaniso xa Loyi a byi tumbuluxeke,” ku nga Yehovha Xikwembu.—Vakolosa 3:9-11.

Loko a ri karhi a nghenisa vutivi lebyi kongomeke, Rolf-Michael a a ringeta ku hanya hi ku pfumelelana ni misinya ya milawu ya Rito ra Xikwembu. (Yohane 17:3) A swi tika ku tshika swidzidzirisi, kambe Rolf-Michael u vone nkoka wa ku tshinela eka Yehovha hi xikhongelo ni ku vona mpfuno wa yena. (1 Yohane 5:14, 15) Mpfuno lowu engetelekeke u wu kume hi ku va ni vunghana lebyikulu ni lava ana se a va ri Timbhoni ta Yehovha lava va tikarhatelaka ku endla ku rhandza ka Xikwembu.

Leswi tlheleke swi pfuna Rolf-Michael a ku ri ku tiva leswaku misava ya hundza nileswaku lava va endlaka ku rhandza ka Xikwembu va ta tshama hi masiku. Swi n’wi pfunile leswaku a nga hlawuli ku rhandza misava leyi nga ta hundza ku nga ri khale, kambe a hlawula nkateko wa ku va ni vuxaka lebyikulu ni Xikwembu lexi nga ni rirhandzu, Yehovha. (1 Yohane 2:15-17) Rolf-Michael u khumbiwe swinene hi marito ya Swivuriso 27:11, lama nge: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.” U vula marito lawa yo tlangela: “Ndzimana leyi yi kombisa ndlela leyi rirhandzu ra Yehovha ri enteke ha yona, tanihi leswi a nyikaka vanhu nkarhi wa ku tsakisa mbilu ya yena.”

Ku fana na Rolf-Michael, nsati wakwe ni vana va vona vanharhu, madzana ya magidi ya vanhu va vuyeriwile hi ku landzela misinya ya milawu ya Bibele. Vanhu volavo va kumeka emavandlheni ya Timbhoni ta Yehovha emisaveni hinkwayo. Lexi vavisaka, ematikweni man’wana Timbhoni ti hehliwa hi mavunwa ya leswaku i mpambukwa lowu nga ni khombo lowu hahlulaka mindyangu ya vanhu. Leswi endlekeke eka Rolf-Michael swi kombisa leswaku sweswo a hi ntiyiso.—Vaheveru 4:12.

Rolf-Michael u vula leswaku Matewu 6:33, leyi hi khutazaka ku rhangisa swilo swa moya, yi kongomisa ndyangu wa yena leswaku wu landzela ndlela leyinene evuton’wini. Yena ni ndyangu wakwe va n’wi nkhensa swinene Yehovha hikwalaho ka vutomi lebyi tsakisaka bya ndyangu lebyi va tiphinaka ha byona tanihi Vakreste. Va pfumelelana ni marito ya mupisalema la yimbeleleke a ku: “Xana ndzi ta tlherisela yini eka Yehovha hikwalaho ka hinkwaswo leswi pfunaka leswi a ndzi endleleke swona?”—Pisalema 116:12.

[Marito lama tshahiweke exihlokweni lama nga eka tluka 9]

Xikwembu xi nyika vanhu nkarhi wa ku tsakisa mbilu ya xona

[Bokisi leri nga eka tluka 9]

Misinya Ya Milawu Ya Bibele Ya Tirha

Yin’wana ya misinya ya milawu ya Bibele leyi susumeteleke vo tala ku tshika mikhuva leyi nga ni khombo hi leyi landzelaka:

“N’wina lava rhandzaka Yehovha, vengani leswo biha.” (Pisalema 97:10) Loko munhu a ta va a khorwisekile leswaku mikhuva leyi nga ni khombo yi bihile kutani a sungula ku yi venga hakunene, swa n’wi olovela ku endla leswi tsakisaka Xikwembu.

“Loyi a fambaka ni vanhu vo tlhariha u ta tlhariha, kambe loyi a tirhisanaka ni lavo hunguka, a swi nge n’wi fambeli kahle.” (Swivuriso 13:20) Munhu u fanele a hlawula vanghana va yena hi vukheta leswaku a ta kota ku ala swidzidzirisi ni swilo swin’wana leswi godzombelaka. Ku hlakulela vunghana ni Vakreste lava nga ta n’wi seketela eka xiboho xa yena swa vuyerisa hakunene.

“Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.” (Vafilipiya 4:6, 7) Ku rhula koloko ka mbilu ni mianakanyo a ku nge fikeleriwi hi ku tirhisa swilo swo kota swidzidzirisi. Naswona ku titshega hi Xikwembu ku pfuna munhu leswaku a langutana ni swiphiqo swa vutomi handle ko tirhisa swidzidzirisi.