Xiviko Xa Vahuweleri Va Mfumo
Papila Leri Humaka Eka Alejandra
KU TSALA PAPILA ku vonake ku ri nchumu lowunene wo nyikela vumbhoni ku sukela khale. Hambileswi minkarhi yin’wana sweswo swi nga vonakaka swi nga tswali mihandzu, lava va phikelelaka eku swi tirhiseni va vuyeriwile swinene. Va tsundzuka ndzayo ya vutlharhi leyi kumekaka eBibeleni leyi nge: “Byala mbewu ya wena nimixo, naswona u nga ri wisisi voko ra wena ku fikela nimadyambu; hikuva a wu swi tivi leswaku leswi swi ta lulama kwihi, laha kumbe lahaya, kumbexana haswimbirhi swi ta va leswinene.”—Eklesiasta 11:6.
Alejandra, muntshwa la nga Mbhoni loyi a tirheke ehofisini ya rhavi ra le Mexico ra Timbhoni ta Yehovha ku ringana malembe ya kwalomu ka khume, a a ri ni vuvabyi bya khensa lebyi a byi tshunguriwa hi ku tirhisa tikhemikhali. Xiyimo xa yena xi nyanyile kutani a heleriwa hi matimba lerova a nga ha swi koti ku endla mintirho ya yena ya siku ni siku. Hambiswiritano, tanihi leswi a a nga lavi ku honisa ntirho wa yena wo chumayela, Alejandra u kunguhate ku tsala mapapila. U tsale mapapila lama vulavulaka hi lunghiselelo ra dyondzo ya mahala ya Bibele a katsa ni nomboro ya mana wakwe ya riqingho. Kutani u nyike mana wakwe mapapila lawa leswaku a ma siya etindlwini leti vini va muti va nga kumekangiki eka tona loko a ri karhi a chumayela hi yindlu ni yindlu.
Hi nkarhi wolowo, Diojany, nhwanyana la ha riki muntshwa wa le Guatemala, u yile a ya tirha tanihi mutirhi la khathalelaka yindlu le Cancún, eMexico. Loko a ri kwalaho, u hlangane ni Timbhoni ta Yehovha naswona u tsakele ku vulavurisana na tona hi Bibele. Endzhakunyana, vathori va yena va kunguhate ku rhurha va ya tshama eDorobeni ra Mexico naswona a va lava ku famba na yena. Diojany a a kanakana ku famba hikuva a swi ta n’wi hambanisa ni Timbhoni.
Vathori va yena va n’wi tiyisekisile va ku: “U nga vileli, Timbhoni ti kumeka hinkwako. Hi ta famba hi ti lava loko hi fika.” Hikwalaho ka xitshembiso xexo lexi tiyisaka nhlana, Diojany u pfumerile ku famba na vona. Loko va fika eDorobeni ra Mexico, vathori va Diojany va lave Timbhoni. Hi xivangelo xo karhi, a va swi kotanga ku ti kuma, hambileswi a ku ri ni Timbhoni to tlula 41 000 ni mavandlha yo ringana 730 edorobeni rolero.
Hi ku hatlisa, Diojany u sungule ku hela matimba hikuva a a nga ti kumi Timbhoni leswaku ti n’wi pfuna ku ya emahlweni ni dyondzo ya yena ya Bibele. Siku rin’wana, muthori wakwe wa xisati u fike a n’wi byela a ku: “Ndzi ku khomele timhaka to tsakisa! Xikwembu xa wena xi twe swikhongelo swa wena.” U n’wi nyike mvhilopho a ku: “Timbhoni ti ku siyele papila leri.” A ku ri papila leri humaka eka Alejandra.
Diojany u kote ku hlangana na mana wa Alejandra ni ndzisana yakwe, Blanca, naswona u amukele dyondzo ya Bibele. Endzhaku ka mavhiki, u hlangane na Alejandra naswona va tsakelane swinene. Alejandra u n’wi khutazile leswaku a hambeta a tikarhatela ku dyondza Bibele leswaku a kota ku endla nhluvuko hi tlhelo ra moya.
Alejandra u file endzhaku ka tin’hweti ti nga ri tingani, hi July 2003, a siyela vapfumeri-kulobye xikombiso lexinene xa ripfumelo ni vurhena. Enkosini vanhu vo tala va khumbeke swinene loko va hlangana na Diojany, kutani a va byela a ku: “Alejandra ni ndyangu wa ka vona, va ve swikombiso leswinene eka mina. Ndzi tiyimisele ku tirhela Yehovha kutani ndzi khuvuriwa ku nga ri khale. Ndzi navela ku vona Alejandra nakambe eParadeyisini leyi taka!”
Ina, papila ku nga va nchumu wutsongo. Kambe ri nga va ni vuyelo lebyinene ni lebyi pfunaka vutomi hinkwabyo!