Ripfumelo Ra Yena Ri Khutaza Van’wana
LOKO Silvia a tswariwa hi December 1992, a a languteka a ri xinhwanyetana lexi hanyeke kahle emirini. Kambe loko a va ni malembe mambirhi, Silvia u khomiwe hi cystic fibrosis, ku nga vuvabyi lebyi nga tshungulekiki lebyi vangaka swiphiqo swa ku hefemula ni ku gayela swakudya. Leswaku a langutana ni vuvabyi byakwe, Silvia u nwa tiphilisi ta 36 siku rin’wana ni rin’wana, a koka phungula ra murhi hi tinhompfu, a tlhela a kandziwa miri. Tanihi leswi mahahu yakwe ma nga tirhiki kahle, u fanele a tshama a ri ni xithangana xa okisijini, hambiloko a huma ekaya.
Mana wakwe Teresa u ri: “Swa hlamarisa ku vona ndlela leyi Silvia a langutanaka ni vuvabyi bya yena ha yona. Hikwalaho ka vutivi lebyi a nga na byona hi Matsalwa, u ni ripfumelo ro tiya. Ripfumelo rero ri n’wi pfuna ku langutana ni vuvabyi byakwe. U tshama a ri karhi a anakanya hi xitshembiso xa Yehovha xa misava leyintshwa, laha hinkwavo lava vabyaka va nga ta hanyisiwa.” (Nhlavutelo 21:4) Minkarhi yin’wana loko vandyangu wakwe va hele matimba, Silvia wa va tiyisa hi ku n’wayitela ka yena. U byela vatswari vakwe kun’we ni buti wakwe a ku: “Emisaveni leyintshwa ku xaniseka hinkwako loku nga kona namuntlha a ku nge he vi kona.”
Minkarhi hinkwayo Silvia u chumayela mahungu lamanene ya Rito ra Xikwembu eka van’wana, naswona vanhu lava a vulavulaka na vona va vona xikandza xakwe xi vangama hi ntsako. Vamakwerhu lava hlanganyelaka na yena evandlheni ra Vukreste le Swihlaleni swa Canary na vona va tsaka swinene loko va n’wi twa a nyikela tinhlamulo ni loko va n’wi vona eminhlanganweni. Endzhaku ka nhlangano wun’wana ni wun’wana, Silvia u rhandza ku sala a vulavula ni Vakreste-kulobye. Vumunhu byakwe lebyinene byi susumetele hinkwavo evandlheni leswaku va n’wi rhandza.
Tata wakwe Antonio u ri: “Silvia u hi dyondzisa dyondzo ya nkoka swinene. Hambiloko hi ri ni swiphiqo, vutomi i nyiko leyi humaka eka Xikwembu, naswona hi fanele hi yi tlangela.” Ku fana na Silvia, malandza ya Xikwembu hinkwawo—lavatsongo ni lavakulu—ma wu langutele hi mahlo-ngati nkarhi lowu ‘ku nga ta ka ku nga ha vi na munhu loyi a nga ta ku: “Ndza vabya.”’—Esaya 33:24.
[Xifaniso lexi nga eka tluka 31]
Silvia a hlaya ndzimana ya Bibele loko mana wakwe a khome xithangana xa okisijini