Hakelo Ya Ku Lavisisa Loku Tekeke Nkarhi Wo Leha

“YEHOVHA? I mani Yehovha? Silvia wa malembe ya nhungu hi vukhale u vone vito leri eBibeleni ya Xiarmenia, ndzalama ya ndyangu leyi a kombiweke yona hi xinhwanyetana xin’wana. U vutisile, kambe ku hava ni un’we le Yerevan, eArmenia, laha a tshamaka kona loyi a n’wi byeleke leswaku Yehovha i mani—hambi vatswari va yena, vadyondzisi, hambi ku ri vafundhisi ekerekeni ya ndhawu ya ka vona.

Silvia u kurile, a heta xikolo kutani a kuma ni ntirho kambe a a nga si swi tiva leswaku Yehovha i mani. Tanihi muntshwa la wupfeke, swi bohe leswaku a baleka eArmenia, endzhaku ka nkarhi u tikume a ri ePoland, a tshama ekamareni leritsongo ni vahlapfa van’wana. Un’wana wa lava a a tshama na vona a a tshamela ku endzeriwa hi vanhu. Silvia u vutisile: “Vaendzi va wena i vamani?” Nhlamulo yi te: “I Timbhoni ta Yehovha, va tele ku ta ndzi dyondzisa Bibele.”

Mbilu ya Silvia yi tlula-tlurile hi ntsako loko a twa vito Yehovha. Eku heteleleni, u sungule ku dyondza leswaku Yehovha i mani ni leswaku i Xikwembu xa rirhandzu swinene. Kambe ku nga ri khale a a fanele a suka ePoland. U lave vutumbelo eDenmark, entsungeni wa Lwandle ra Baltic. A a rhwale swilo swi nga ri swingani, kambe endzeni ka swona a ku ri ni tibuku ta Bibele leti kandziyisiweke hi Timbhoni ta Yehovha. Eka tluka ro hetelela ra buku yin’wana, Silvia u kume nxaxamelo wa tiadirese ta tihofisi ta marhavi ya Sosayiti ya Watch Tower. Yoleyo a ku ri nhundzu ya nkoka swinene eka yena—ndlela leyi a nga ta vulavurisana ha yona na Yehovha!

Le Denmark, Silvia u yisiwe ekampeni ya vahlapfa naswona hi xihatla u sungule ku lava Timbhoni ta Yehovha. Hi ku ya hi nxaxamelo wa yena wa tiadirese a a swi tiva leswaku hofisi ya rhavi ya Sosayiti ya Watch Tower eDenmark a yi ri edorobeni ra Holbæk. Kambe a ri ri kwihi? Silvia u rhurhiseriwe ekampeni yin’wana hi xitimela, naswona loko a ri endleleni yo ya kwalaho xitimela xi hundze hi le Holbæk! Mbilu ya yena yi tlhele yi tlula-tlula hi ntsako.

Hi ku hatlisa endzhaku ka sweswo hi siku leri xeke kahle, Silvia u khandziye xitimela a tlhelela eHolbæk kutani a famba hi milenge ku suka exitichini ku ya ehofisi ya rhavi. U ri: “Loko ndzi nghena entangeni, ndzi tshame ebenceni kutani ndzi ku, ‘Leyi i paradeyisi!’” Erhavini u amukeriwe hi mandla mambirhi naswona eku heteleleni u kote ku kuma dyondzo ya yena n’wini ya Bibele.

Kambe u rhurhisiwe ko tala. Etindhawini ta vahlapfa hi ku tlhandlamana ka tona Silvia a a boheka ku lava Timbhoni ta Yehovha kutani a sungula dyondzo ya yena ya Bibele ko tala. Hambiswiritano, endzhaku ka malembe mambirhi, se a a dyondze ku ringana leswaku a nga nyiketela vutomi bya yena eka Yehovha. U khuvuriwile naswona endzhaku ka sweswo u nghenele vutirheli bya nkarhi hinkwawo. Hi 1998 valawuri va le Denmark va n’wi nyike mpfumelelo wa vutumbelo.

Sweswi Silvia u ni malembe ya 26 hi vukhale naswona i mutirheli endhawini leyi tshameke yi n’wi tsundzuxa paradeyisi, ku nga hofisi ya rhavi ra Timbhoni ta Yehovha le Denmark. Sweswi u ri: “Xana ndzi nga ku yini? A ndzi ri ku laveni ka Yehovha ku sukela loko ndzi ri xinhwanyetana. Sweswi ndzi n’wi kumile. Ndzi lorhe hi ku heta vutomi bya mina ndzi n’wi tirhela, kutani sweswi ndzi le Bethele. Ndzi khongelela leswaku laha ku va kaya ra mina malembe yo tala lama nga ta landzela!”