Swivutiso Swa Vahlayi

Xana Matimba Yo Hanyisa Vanhu Hi Singita Ma Huma Eka Xikwembu?

A swi kanakanisi leswaku Yehovha Xikwembu u na wona matimba yo hanyisa vanhu. Nakambe swi le rivaleni leswaku matimba wolawo a nga ma nyika vagandzeri vakwe. Hi xikombiso, hi nkarhi wa vaapostola ku hanyisa vanhu hi singita a ku ri yin’wana ya tinyiko leti moya wakwe lowo kwetsima a wu ti nyika vanhu. Muapostola Pawulo u tsale a ku: “Xikombiso xa moya xi nyikiwa un’wana ni un’wana hi xikongomelo xo pfuna. Hi xikombiso, un’wana u nyikiwe ku vulavula swa vutlhari hi moya, . . . un’wana u nyikiwe tinyiko ta ku horisa hi moya wolowo wun’we, . . . un’wana u nyikiwe ku profeta, . . . un’wana u nyikiwe tindzimi to hambana-hambana.”—1 Vakorinto 12:4-11.

Hambiswiritano, Pawulo u tlhele a tsala epapileni rero leri yaka eka Vakorinto leswaku tinyiko ta ku hanyisa ta moya lowo kwetsima wa Xikwembu a ti ta hela. U te: “Hambi ku ri ni tinyiko ta ku profeta, ti ta hela; hambi ku ri ni tindzimi, ti ta hela; hambi ku ri ni vutivi, byi ta hela.”—1 Vakorinto 13:8.

Hi lembe-xidzana ro sungula, Yesu Kreste ni vaapostola vakwe hi vona lava a va hanyisa vanhu hi singita. Hi nkarhi wolowo wa vaapostola loko vandlha ra Vakreste ra ha ku simekiwa, tinyiko ta moya leti katsaka vuswikoti byo hanyisa vanhu, a ti endleriwe ku dzunisa Xikwembu naswona a ti ri swikombiso swa leswaku vandlha rolero lerintshwa ra Vakreste a xi ri katekisa. Kambe endzhaku ka loko vandlha rolero ra Vakreste ri simekiwile, Xikwembu a xa ha tirhisanga tinyiko to hlawuleka tanihi vumbhoni bya leswaku xa ri katekisa, kambe a ri ta voniwa hi ku va ni timfanelo to fana ni ripfumelo leri tiyeke, ntshembo ni rirhandzu. (Yohane 13:35; 1 Vakorinto 13:13) Xisweswo, kwalomu ka lembe ra 100 C.E., matimba lama humaka eka Xikwembu ya ku hanyisa vanhu hi singita ma herile.a

Kambe u nga ha tivutisa, ‘Ha yini ndza ha twa hi ta swiviko swa ku hanyisiwa ka vanhu hi singita?’ Hi xikombiso, xiviko xin’wana xa le ka phepha-hungu rin’wana xi vulavule hi wanuna un’wana loyi ku vuriwaka leswaku a a ri ni vuvabyi bya khensa. A a ri na matshumba enhlokweni, eka tinso ni le ndzeni ka marhambu. A swi tikomba a nga ha ri na ntshembo kukondza ku fika siku rin’wana leri a vuleke leswaku Xikwembu xi vulavule na yena. Xiviko xexo xi vula leswaku endzhakunyana ka masiku ma nga ri mangani khensa yakwe yi nyamalarile.

Loko u twa switori swo fana ni lexi, ha yini u nga tivutisi swivutiso leswi: ‘Xana mhaka leyi i ntiyiso? Xana byi kona vumbhoni bya le xibedlhele lebyi seketelaka mhaka leyi? Naswona hambiloko swi tikomba onge u hanyisiwile, xana Bibele yi dyondzisa leswaku Xikwembu hi xona lexi hoxeke xandla eka swiendlakalo hinkwaswo swa ku hanyisiwa ka vanhu hi singita?’

Nhlamulo ya xivutiso lexi xo hetelela i ya nkoka swinene. Yesu u lemukise valandzeri vakwe a ku: “Tivoneleni vaprofeta va mavunwa . . . Vo tala va ta ku eka mina hi siku rero, ‘Hosi, Hosi, xana a hi profetanga hi vito ra wena, hi hlongola madimona hi vito ra wena ni ku endla mintirho yo tala ya matimba [masingita] hi vito ra wena ke?’ Kutani hi nkarhi wolowo ndzi ta va byela ndzi ku: A ndzi kalanga ndzi mi tiva! Sukani eka mina, n’wina vaendli va leswo kala nawu.”—Matewu 7:15, 21-23.

Matsalwa lawa ma swi kombisa kahle leswaku matimba lawa ku vuriwaka leswaku ma hanyisa vanhu hi singita ma nga va ma huma eka xihlovo xin’wana ku nga ri eka Xikwembu. Leswaku hi papalata ku xisiwa hi vanhu lava vulaka leswaku va hanyisa vanhu hi vito ra Xikwembu, hi fanele hi va ni vutivi lebyi kongomeke bya Xikwembu leswaku hi kota ku tirhisa vuswikoti bya hina byo anakanya lebyi xi hi nyikeke byona kutani hi dyondza ndlela leyi hi nga va vonaka ha yona lava endlaka ku rhandza ka xona.—Matewu 7:16-19; Yohane 17:3; Varhoma 12:1, 2.

[Nhlamuselo ya le hansi]