Ndlela Leyi Ripfumelo Ri Nga Pfunaka Vavabyi Ha Yona

TIMHAKA ta ku hanyisiwa hi singita eBibeleni ti hi tiyisekisa leswaku Xikwembu xa khathala hi vuhlayiseki bya hina, naswona ti kombisa matimba ya xona yo hanyisa. Tanihi leswi ku hanyisiwa loku ka singita ku dzuniseke Xikwembu ni ku tisa ntsako lowukulu, swa twala ku vutisa xivutiso lexi nge, Xana nyiko ya ku hanyisiwa hi moya lowo kwetsima ya ha ri kona?

Nhlamulo ya xivutiso xexo i e-e—naswona nhlamuselo ya kona yi nga hlamarisa vo tala. Ku hanyisiwa koloko ka masingita eka lembe xidzana ro sungula ku hetisise xikongomelo xa kona. The Illustrated Bible Dictionary hi ku tiyisa yi ri: “Xikongomelo xa masingita yo hanyisa a xi ri xa vukhongeri, hayi xa vutshunguri.” Hi swihi swin’wana swa swikongomelo swa vukhongeri leswi hetisisiweke hi masingita wolawo?

Hi xikombiso, masingita ya Yesu ya ku hanyisa ma hetisise xikongomelo xo n’wi kombisa tanihi Mesiya. Naswona endzhaku ka rifu ra yena, ma pfune ku tiyisa leswaku nkateko wa Xikwembu a wu ri ehenhla ka bandlha lerintshwa ra Vukriste. (Matewu 11:2-6; Vaheveru 2:3, 4) Nakambe, ma kombise leswaku xitshembiso xa Xikwembu xo hanyisa vanhu emisaveni leyintshwa xi ta hetiseka. Ma tiyisa ripfumelo ra hina leswaku nkarhi wu ta ta hakunene lowu ‘ku nga ta ka ku nga vi na muaki loyi a nga ta ku: “Ndza vabya.” Vanhu lava tshamaka etikweni leri ku ta va lava rivaleriweke ku dyoha ka vona.’ (Esaya 33:24) Loko swikongomelo swa lembe xidzana ro sungula swi fikeleriwile, masingita a ma nga ha laveki.

Swi le rivaleni leswaku vadyondzisiwa va Yesu va lembe xidzana ro sungula hi voxe va ve ni mavabyi lama nga hanyisiwangiki hi singita. Lebyi i vumbhoni byin’wana bya leswaku ntirho wo hanyisa hi singita wa Yesu kun’we ni lowu wa vaapostola a wu kunguhateriwe ku dyondzisa mintiyiso ya nkoka, hayi ku nyikela ntirho wa vutshunguri. Loko a bumabumela vutshunguri eka vuvabyi bya Timotiya bya nkarhi na nkarhi, Pawulo u n’wi khutaze ku tirhisa vhinya hi tlhelo ra vutshunguri, hayi ku hanyisiwa hi ripfumelo. Pawulo, loyi a endleke masingita ya ku hanyisa, a nga tlhavuriwanga ‘mutwa lowu a a ri na wona enyameni’ lowu a wu hambeta wu n’wi “himetela.”—2 Vakorinto 12:7; 1 Timotiya 5:23.

Loko vaapostola va fa, nyiko ya ku hanyisa yi herile. Pawulo hi byakwe u kombise leswaku leswi a swi ta endleka. Loko a fanisa bandlha ra Vukriste ni ricece, Pawulo u te: “Loko ndza ha ri xihlangi, a ndzi vulavula tanihi xihlangi, ndzi ehleketa tanihi xihlangi, ndzi pimanisa tanihi xihlangi; kambe sweswi ndzi nga hundzuka wanuna, ndzi tshikile swa vuhlangi.” Mongo wa xifaniso xa yena a ku ri leswaku tinyiko ta moya ta masingita a ku ri xiyenge xa vuhlangi bya bandlha ra Vukriste. A ku ri “swa vuhlangi.” Hikwalaho, u te: “[Tinyiko ta masingita] ti ta nyamalala.”—1 Vakorinto 13:8-11.

Xana Ripfumelo Ri Nga Pfuna Loko Hi Vabya?

Hambi swi ri tano, hambi loko hi nga titshegi hi ku hanyisiwa hi ripfumelo, entiyisweni swi fanerile ku khongelela mpfuno eka Xikwembu loko hi vabya. Naswona a swi hoxanga nikatsongo loko van’wana va hi kombelela hi xikhongelo. Kambe swikhongelo swa kona swi fanele swi va swa xiviri naswona swi pfumelelana ni ku rhandza ka Xikwembu. (1 Yohane 5:14, 15) Ku hava laha Bibele yi hi lerisaka ku khongelela ku hanyisiwa hi ripfumelo.a Ku ri na sweswo, hi khongelela nseketelo wa Yehova wa rirhandzu hi nkarhi wa maxangu lama vangiwaka hi vuvabyi.

Bibele yi kombisa leswi lava tshembekaka, va nga swi khongelelaka, loko va vabya loko yi ku: “Yehova o ta ṅwi tiyisa e masangweni loko a v̌abya; wa hunḍuluša ŝinene byetlelo bya yena loko a v̌abya.” (Psalma 41:3) Ku anakanyisisa hi Rito ra Xikwembu swi ta pfuna lava tokotaka vuvabyi bya mintlhaveko. Mupisalema u tsarile a ku: “V̌unene bya wena, Yehova, byi nḍi seketela. Mbilu ya mina loko yi tele miv̌ilelo, ku tšhav̌elela ka wena ku ṭakisa moya wa mina.”—Psalma 94:18, 19; nakambe vona 63:6-8.

Tlhandla-kambirhi, hi fanele ku kombisa langutelo lerinene eka timhaka ta rihanyo, naswona Bibele ya hi tsundzuxa hi leswi. Swi antswa swinene ku hanya hi ku pfumelelana ni misinya ya milawu ya Bibele ematshan’wini yo tinyiketela ku tirhisa swidzidzirisi hi ndlela yo biha, ku dzaha, ku nwa ku tlula mpimo kumbe ku dya ku tlula mpimo, kambe loko hi khomiwa hi mavabyi hi tlhela hi lava ku hanyisiwa hi ripfumelo. Ku khongelela singita loko munhu a khomiwe hi vuvabyi a hi xikhomela-ndhawu xa ku tikhoma hi vutlhari, xo balekela vuvabyi lebyi papalatekaka, ku fana ni ku dya swakudya leswi fuweke loko swi ri kona kumbe ku lava mpfuno lowu fanelekaka wa swa vutshunguri loko swi koteka.

Rito ra Xikwembu ri tlhela ri hi khutaza ku hlakulela langutelo lerinene ra mianakanyo leri nga hi pfunaka eka rihanyo ra nyama. Buku ya Swivuriso ya tsundzuxa: “Ku ṭaka ka mmiri i mbilu le’yo basa, kambe mona i ku bola ka marambu.” “Mbilu le’yi ṭakeke i muri lo’wu tiyisaka, kasi moya lo’wu dyaka mbiṭi wu omisa marambu.” (Swivuriso 14:30; 17:22) Ku khongelela moya lowo kwetsima leswaku hi va ni ku rhula ni ntsako swi nga va ni vuyelo lebyi pfunaka ntsena eka rihanyo ra hina ra nyama.—Vafilipiya 4:6, 7.

Ku Vuriwa Yini Hi Ku Hanyisiwa Hi Ripfumelo?

Kavula, hambi loko munhu a hanya vutomi lebyi tengeke swinene hi laha xiyimo xa yena xi n’wi pfumelelaka ha kona, vuvabyi byi nga ha n’wi khoma. Kutani u fanele a endla yini? Xana ku na xiphiqo loko u ya eka muhanyisi wa ripfumelo hi ntshembo wa ku hanyisiwa? Ina, xi kona. Vahanyisi va ripfumelo va manguva lawa a hi kanyingi va endlaka mintirho ya vona mahala. Naswona ku tirhisa mali hi ku hakela muhanyisi wa ripfumelo, kasi mali yoleyo a yi ta tirhisiwa ku kuma mpfuno wa vutshuguri swi nga vanga ku xaniseka ni ku lahlekeriwa. Handle ka sweswo, ha yini u teka mali u yi nyika vanhu lava tirhisaka nxaniseko wa vanhu hi ndlela yo biha?

Van’wana va nga ha ku: ‘Entiyisweni, ku hanyisiwa hi ripfumelo swi fanele swi pfuna hambi loko ku hanyisiwa nhlayo yitsongo ya lava va yaka eka “vahanyisi.”’ Kambe mphikamakaneta ya loko vahanyisi va ripfumelo hakunene va endla leswaku munhu a tshama a hanyile kumbe e-e yi kona. Encyclopædia Britannica ya pfumela: “Ndzavisiso lowu endliweke hi ku ya hi maendlelo lama simekiweke wu endle leswaku ku fikeleriwa timhaka ta ntsandza-vahlayi leti a ti nga tiviwi ta ku hanyisiwa hi ripfumelo.”

Hambi loko nhlayo yitsongo yi hanyisiwa, lebyi a hi vumbhoni bya leswaku ku tirha moya lowo kwetsima. Eka Dyondzo ya le Ntshaveni, Yesu u te: “Hi siku rolero lavo tala va ta ku ka mina: ‘Hosi, Hosi, xana a hi vulavulanga hi vito ra wena ke? Xana a hi hlongolanga mademona hi vito ra wena ke? Xana a hi endlanga mahlori layo tala hi vito ra wena ke?’ Enkarhini wolowo ndzi ta va byela erivaleni, ndzi ku: A ndzi mi tivanga, ni siku ni rin’we; sukani eka mina, n’wina lava endlaka leswo homboloka!” (Matewu 7:22, 23) Yesu u tlhele a vula leswaku vanhu van’wana, hambi loko va nga amukeriwi hi Xikwembu, a va ta tikokela nyingiso hi ku tirhisa mahlori: “Hikuva ku ta humelela Vamesiya va mavunwa, ni vaprofeta va mavunwa, va ta endla mahlori lamakulu ni swihlamariso, ku xisa hambi va ri vona vahlawuriwa va Xikwembu, loko swi endleka.” (Matewu 24:24) Kunene, vahanyisi va manguva lawa va ripfumelo va nga katsiwa eka ndlela leyi marito wolawo ma tirhaka ha yona, hi mavulavulelo ya vona lama nga tolovelekangiki, ku lava mali nkarhi na nkarhi ni ku tivulela leswaku va hanyisa hi singita.

Vanhu vo tano a va landzeli minkondzo ya Yesu. Kutani ke, xana va landzela mani? Muapostola Pawulo u hi nyika vuthala loko a ku: “Sathana, ú tiendla onge i ntsumi ya ku vonakala. Loko swi ri tano, a swi hlamarisi loko malandza ya yena na wona ma tiendla onge i malandza ya leswo lulama; kambe eku heteleleni, va ta kuma leswi yelanaka ni mintirho ya vona.” (2 Vakorinto 11:14, 15) Loko vahanyisi va ripfumelo va nga swi koti ku horisa hi laha va vulaka ha kona, i vakanganyisi, va landzela ndlela ya Sathana, “Mukanganyisi wa misava hinkwayo.” (Nhlavutelo 12:9) Kambe ku vuriwa yini loko va swi kota ku hanyisa vanhu lava nga riki vangani? Xana a hi fanelanga ku gimeta hi leswaku “mahlori” ya vona ya endliwa hi matimba ya Sathana ni mademona yakwe? Ina, sweswo swi fanele swi ri ntiyiso!

Nkarhi Wa Ku Hanyisiwa Ka Xiviri

Ku hanyisa ka Yesu hi singita a ku endliwa hi mpfuno wa moya lowo kwetsima wa Xikwembu. A swi kombisa xikongomelo xa xona xo ntlhantlha swiphiqo hinkwaswo swa munhu swa rihanyo hi nkarhi wa xona. Yehova u tshembisa ku “tshungula vanhu va matiko.” (Nhlavutelo 22:2) Naswona a nge horisi vuvabyi ntsena, kambe u ta tlhela a herisa ni rifu. Yohane u hlamusela leswaku Yesu u tele “leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” (Yohane 3:16) Koloko ku ta va ku hanyisiwa lokunene swonghasi! Yesu u ta tlhela a endla ku hanyisa loku fanaka ni lokuya ku rhekhodiweke eBibeleni kambe hi mpimo lowu tlakukeke swinene. U ta pfuxa ni vafi! (Yohane 5:28, 29) Xana leswi swi ta humelela rini ke?

Emisaveni leyintshwa ya Xikwembu, leyi tshineleke, hi ku ya hi vumbhoni hinkwabyo. Misava yoleyo leyintshwa, leyi nga ta va kona endzhaku ka loko vuhomboloki bya mafambiselo lawa ya swilo byi suseriwe makumu, yi ta va nkateko wa xiviri eka vanhu va timbilu letinene. Yi ta va misava leyi nga hava ku xaniseka. “[Xikwembu] xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.” (Nhlavutelo 21:4) Yi ta va yi hambanile swonghasi ni leyi hi yi vonaka namuntlha!

Hikwalaho, loko u khomiwa hi vuvabyi, khongela eka Xikwembu leswaku xi ku seketela. Naswona hambi wa vabya kumbe u hanye kahle, dyondza ndlela leyi vutomi lebyi nga heriki, lebyi nga riki na vuvabyi byi kotekaka ha yona. Aka ripfumelo ra wena eka xitshembiso lexi xi tshembekaka xa Xikwembu hi ku dyondza tinhlamuselo to tala ha xona eBibeleni. Dyondza ndlela leyi ha yona xikongomelo xa Xikwembu emhakeni leyi xi tshinelelaka ku hetiseka ka xona, hi ku ya hi xiyimiso xa xona xa nkarhi. U nga kanakani, hikuva Rito ra Xikwembu ra hi tiyisekisa ri ku: “O ta lov̌isa rifu hi laha ku nga heriki: Hosi, Yehova o ta hlangula mihloti emimombyeni hikwayo.”—Esaya 25:8.

[Nhlamuselo ya le hansi]

[Xifaniso lexi nga eka tluka 7]

Ku hanyisa ka Yesu hi singita ku hetisise xikongomelo xa kona

[Xifaniso lexi nga eka tluka 8]

Yesu u ta phindha ni ku andzisa mahlori yo hanyisa