Papila Leri Humaka eRhaxiya
Ku Teka Riendzo Ro Ya eNdhawini Ya Le Kule Swinene
XIHAHA-MPFHUKA xa hina lexitsongo xi suke edorobeni ra Yakutsk kutani hakatsongo-tsongo xi tlhandluka swinene xi hundza hi le Nkoveni wa Tuymaada. Hi hundze mativa yo tala lamakulu ni lamatsongo lawa mati ya wona ma hundzukeke ayisi ni ntlhandlamano wa tintshava leti vuriwaka Verkhoyanskiy leti emaninginingini ya tona ti funengetiweke hi gamboko, leti a ti hatima hikwalaho ka ku voninga ka dyambu. Endzhaku ko famba tikhilomitara ta 900, hi hetelele hi chika eximutanini xa Deputatskiy.
Riendzo ra mina ri sungule eximutanini xexo xa le Riphabliki ra Sakha, leri nakambe ri vuriwaka Yakutia, ku nga tiko ro saseka ni leri titimelaka swinene leri kuleke ku tlula matiko hinkwawo ya le Yuropa Vupela-dyambu. Etikweni leri, maxelo ya kona a ma hisa ngopfu hi ximumu, ivi hi xixika matitimelelo ya kona a ma vuyisa ni n’wana evukatini naswona ku ni marhambu ya swiharhi leswikulu leswi nyamalaleke khale swinene. Hambileswi se a ku hundze malembe yo hlayanyana ku sukela loko ndzi endzele tiko rero ro sungula, loko ndzi vona swidorobana swi funengetiwe hi hunguva, mivala leyi tshamelaka ku vonakala exibakabakeni ni vanhu lava tsakeke ni lava tiyeke lava vuriwaka Vayakut, a swi tikomba onge a ku ri tolo kunene.
A hi nga endzelanga ximutana xa Deputatskiy ntsena. Mina ni wanuna loyi a ndzi famba na yena a hi ta endzela ni swimitana swin’wana. Ximutana xo sungula a ku ri Khayyr, lexi nga endhawini leyi nga endlaka tikhilomitara ta 300 loko u ya u chochovela u ya en’walungwini, ekusuhi ni Lwandle ra Laptev en’walungu wa Siberia. Ha yini hi kunguhate ku teka riendzo leri? Emahlweni ka kwalaho, Mbhoni yin’wana ya Yehovha yi tshame yi endzela swimitana leswi naswona yi kume vanhu vo tala lava a va lava ku dyondza swo tala hi Bibele. Kutani ku kumeke leswaku hina hi le kusuhi ni swimitana swoleswo hambileswi hi tshamaka edorobeni ra Yakutsk, leri nga ekule na swona hi tikhilomitara ta kwalomu ka 1 000! Hi vone leswaku vanhu volavo va lava ku khutaziwa ni ku pfuniwa.
Loko hi fike eDeputatskiy, hi kume wanuna loyi a a famba hi movha a kongoma eKhayyr, hiloko a hi tshembisa leswaku a nga famba na hina handle ko hi hakerisa mali yo tala. Hi kanakane ku famba na yena loko hi vona movha wakwe wa khale lowu endliweke hi minkarhi ya mfumo wa Soviet Union, lowu se a wu ri exiyin’weni xo biha. Nilokoswiritano, hi kanye mbilu hi famba na yena vusiku byolebyo. A hi nga swi tivi leswi a swi ta hi humelela endleleni.
Switulu swa movha a swi titimela swinene naswona hi hatle hi xiya leswaku a swi nga ta kufumela endzhaku ka nkarhi. Hi n’wi kombele leswaku a yima, hiloko hi lava swiambalo swo kufumela leswi endliweke hi wulu etibegeni ta hina ivi hi swi tlhandleka ehenhla ka swiambalo leswi a hi swi ambarile. Kambe a swo fana ni kwala.
Muchayeri wa hina, ku nga wanuna loyi a nga ni ntokoto loyi a humaka eN’walungwini, a a tsake ngopfu. Hiloko hi xitshuketa a hi vutisa a ku, “Xana mi tshame mi vona timboni ta le n’walungwini?” Ndzi hlamule ndzi ku, “A hi si tshama hi ti vona.” Hiloko a yimisa movha kutani hi huma. Ku ringana nkarhinyana hi tshike ku ehleketa hi xirhami lexi a xi vuyisa ni n’wana evukatini. Ndzi yime kwalaho ndzi kokiwe rinoko hi mivala yo hambana-hambana leyi langutekaka ku fana ni nguvu leyi a yi fununguriwa yi tlhela yi petsiwa ehenhla ka hina, ku nga xivono xo hlamarisa lexi a xi tikomba xi endleka kwala kusuhi na hina.
Erivaleni rin’wana hi matakuxa, movha ya hina yi fike yi jela eka nhulu ya gamboko. Hi pfune muchayeri ku chova movha yakwe leswaku yi hundza endhawini yoleyo naswona hi tlhele hi n’wi pfuna minkarhi yo hlayanyana endzhaku ka kwalaho emagondzweni lama taleke gamboko loko hi ri karhi hi ya eKhayyr. Loko ri xa ndzi swi vone kahle leswaku magondzo lawa a hi famba eka wona kahle-kahle a ku ri milambu leyi mati ya kona ma hundzukeke ayisi! Eku heteleleni hi fike eKhayyr ninhlikanhi endzhaku ka tiawara ta 16 hi suke eDeputatskiy. Hambileswi a ndzi ehleketa leswaku ndzi ta vabya hileswi ndzi heteke nkarhi wo tala ndzi ri karhi ndzi biwa hi xirhami, hi pfuke nimixo hi phyuphyile. Swikunwana swa mina hi swona ntsena leswi a swi khomiwe hi vusindza hileswi kumbexana a swi ome hi xirhami. Vaaki va kwalaho va ndzi nyike mafurha ya bere leswaku ndzi swi tota.
Hi ntolovelo, loko hi lava ku vulavula ni vanhu hi mahungu lamanene hi ya emakaya ya vona. Hambiswiritano, loko vaaki va le Khayyr va twa leswaku hi fikile, va nambe va ta va ta hi lava! Siku ni siku ku ringana mavhiki mambirhi ni hafu, a hi dyondza Bibele ni vanhu va kwalaho minkarhi yin’wana ku sukela nimixo ku ya fika nivusiku. A swi tsakisa ku hlangana ni vanhu lava nga ni rirhandzu ni malwandla, lava a va tsakela Bibele. Vakhegula vo tala va Vayakut a va hi byela leswi: “Ha pfumela eka Xikwembu. Ku va mi tile laha endhawini ya le kule swinene, swi kombisa leswaku Xikwembu xi kona!”
Hi tsakisiwe hi mikhuva ya vanhu volavo. Hi xikombiso, vanhu a va veketela mabuwa ya tiayisi etlhelo ka tiyindlu ta vona ku fana ni tihunyi. Nkarhi wun’wana ni wun’wana loko va lava mati, va teka rin’wana ra mabuwa wolawo kutani va ri hoxa eketleleni leyikulu leyi nga endzilweni leswaku ri n’oka. Vanhu va kwalaho va hi lunghiselele nhlampfi ya le Arctic leyi vuriwaka chir, leyi nandzihaka ngopfu loko yi lunghisiwe yi va stroganina, ku nga swakudya swo hlawuleka swa kwalaho. Nhlampfi ya kona ya tiyisiwa yi va ayisi loko ya ha ku phasiwa, yi tsemeleriwa yi va mintonga yo lala, kutani yi petiwa katsongo eka murhu wa munyu ni viriviri leswi hlanganisiweke kutani yi dyiwa. Vaaki volavo va tlhele va hi byela hi ta masalela ya swiharhi leswi tiyisiweke hi ayisi, yo fana ni ya matino ya swiharhi swo kota tindlopfu ni misinya, leswi hakanyingi va swi kumaka endhawini yoleyo.
Hi suke eKhayyr hi famba madzana ya tikhilomitara, ngopfu-ngopfu hi xihaha-mpfhuka, leswaku hi endzela vanhu lava rhandzaka timhaka ta le Bibeleni eswimitanini swin’wana swa le Yakutia. Hakunene vanhu va le ndhawini yoleyo va ni xinghana ni rirhandzu! Siku rin’wana ndzi hlangane ni xifanyetana xin’wana lexi hi ndlela yo karhi xi kumeke leswaku ndza chava ku famba hi xihaha-mpfhuka. Xi ndzi tsalele khadi leswaku xi ndzi khutaza. Xi mpfampfarhute swindzingiri swimbirhi ni xihaha-mpfhuka lexitsongo kutani xi tsala xi ku: “Sasha, loko u famba hi xihaha-mpfhuka u nga chavi leswaku u ta wa. Matewu 10:29.” Ndzi khumbeke ngopfu loko ndzi hlaya tsalwa rolero! Eka rona ndzi hlaye marito lama vuriweke hi Yesu malunghana ni swindzingiri: “Ku hava ni xin’we xa swona lexi nga waka ehansi Tata wa n’wina a nga swi tivi.”
Ndzi lo mi tsongolelanyana swilo swi nga ri swingani eka swo tala leswi ndzi tsakiseke swa le Yakutia. Tiko rolero ro titimela ri ta tshama ri ri karhi ri ndzi tsundzuxa vanhu volavo lava tsakeke, vo hlamarisa lava tshamaka “endhawini ya le kule swinene.”
[Swifaniso leswi nga eka tluka 25]
Hi kume leswaku Vayakut va ni rirhandzu ni malwandla