Pfuna Vana Va Wena Leswaku Va Tiyisela Mintlhontlho Yo Tala Leyi Va Langutanaka Na Yona

VANTSHWA va hina va le hansi ka ntshikelelo lowukulu. Va fanele va tiyisela moya wa misava ya Sathana yo homboloka, naswona va fanele va lwisana ni “ku navela loku fambisanaka ni vuntshwa.” (2 Tim. 2:22; 1 Yoh. 5:19) Ku engetela kwalaho, leswi va tikarhatelaka ku ‘tsundzuka Mutumbuluxi wa vona Lonkulu,’—va fanele va tiyiselela ku hlekuriwa—hambi ku ri ku xanisiwa—hi vanhu lava va kanetanaka ni leswi va pfumelaka swona. (Ekl. 12:1) Makwerhu wa xinuna la vuriwaka Vincent, loko a tsundzuka nkarhi lowu a ha kula u ri: “Ku ni munhu wo karhi loyi a a tshamela ku ndzi karhata, a ndzi chavisa, kumbe a ndzi tlhontlha leswaku ndzi lwa na yena hikwalaho ka leswi a ndzi ri Mbhoni. Minkarhi yo tala a a ndzi tlhontlhiwa swinene lerova a ndzi nga lavi no ya exikolweni.”a

Ku engetela eka ku tshikileriwa hi vanhu van’wana, vana va hina va majaha kumbe va vanhwanyana va nga ha boheka ku lwisana ni ku navela ka vona n’wini ko lava ku fana ni tintangha ta vona. Cathleen, makwerhu wa xisati laha riki muntshwa u ri: “A swi olovi ku langutiwa tanihi munhu la hambaneke ni vanhu van’wana.” Alan, makwerhu wa xinuna la ha riki muntshwa u ri: “Vadyondzi-kulorhi a va tshamela ku ndzi rhamba hi mahelo-vhiki leswaku hi tihumesa kutani a ndzi swi lava hi mbilu ya mina hinkwayo ku famba na vona.” Ku tlula kwalaho ku navela ka vantshwa ku nghenela mimphikizano ya mintlangu ya le xikolweni, leyi yi nga ha endlaka leswaku va hlangana ni vanghana vo biha ku nga ha va ni matimba swinene. Tanya, makwerhu wa xisati la ha riki muntshwa u ri: “Ndza yi rhandza mintlangu. Valeteri va mintlangu exikolweni minkarhi hinkwayo a a va ringeta ku ndzi nghenisa eka xipano xa xikolo. A swi tika ku ala.”

U nga va pfuna njhani vana va wena leswaku va tiyisela mintlhontlho yo tala leyi va langutanaka na yona? Yehovha u lerise vatswari leswaku va dyondzisa vana va vona. (Swiv. 22:6; Efe. 6:4) Pakani ya vatswari lava chavaka Xikwembu i ku endla leswaku vana va vona va swi navela swi suka embilwini ku yingisa Yehovha. (Swiv. 6:20-23) Hi ndlela yoleyo, vana va ta susumeteleka ku lwisana ni mintshikilelo ya misava hambiloko vatswari va vona va nga va voni.

I ntlhontlho lowukulu eka vatswari ku tirha ntirho wo tihanyisa, ku hlayisa ndyangu ni ku khathalela mintirho ya vandlha hi nkarhi wun’we. Van’wana va fanele va endla sweswo va ri voxe, kumbe va ri karhi va kanetiwa hi munghana wa vukati loyi a nga riki mupfumeri. Nilokoswiritano, Yehovha u lava leswaku vatswari va tivekela nkarhi etlhelo wa ku dyondzisa ni ku pfuna vana va vona. Hikwalaho, u nga endla yini leswaku u pfuna vana va wena va kota ku tisirhelela eka ntshikilelo wa tinthangha, miringo ni ku karhatiwa loku va langutanaka na kona siku ni siku?

Ku Va Ni Vuxaka Na Yehovha

Xo sungula, vantshwa lava nga le mavandlheni ya hina va fanele va tiva Yehovha tanihi Munhu wa xiviri. Va fanele va pfuniwa leswaku va kota ku “vona Loyi a nga vonakiki.” (Hev. 11:27) Vincent loyi a boxiweke eku sunguleni, u tsundzuka ndlela leyi vatswari va yena va n’wi pfuneke ha yona leswaku a kurisa vuxaka bya yena na Yehovha. U ri: “Va ndzi dyondzise leswaku xikhongelo i xa nkoka. Ndza ha tsundzuka leswaku loko ndza ha ri ntsongo swinene, a ndzi khongela eka Yehovha vusiku byin’wana ni byin’wana loko ndzi nga si etlela. Yehovha a a ri wa xiviri eka mina.” Xana wa khongela ni vana va wena? Ha yini u nga yingiseli leswi va swi byelaka Yehovha loko va khongela? Xana va tshamela ku phindha-phindha marito yo karhi? Kumbe xana loko va khongela va phofula ndlela leyi va titwaka ha yona hi Yehovha? Loko u yingisela swikhongelo swa vona u ta kota ku xiya loko va ri ku endleni ka nhluvuko hakunene hi tlhelo ra moya.

Ndlela yin’wana ya nkoka leyi vantshwa va nga tshinelaka swinene eka Yehovha ha yona i ku dyondza Rito ra Yena. Cathleen loyi a boxiweke eku sunguleni u ri: “Ku hlaya Bibele hinkwayo loko ndza ha ri ntsongo swi ndzi pfunile. Swi ndzi tiyisekisile leswaku hambi loko vanhu va lwisana na mina, Yehovha wa ndzi seketela.” Xana vana va wena va na xona xiyimiso xa vona vini xo hlaya Bibele?—Ps. 1:1-3; 77:12.

I ntiyiso leswaku vana a va anguli hi ndlela leyi fanaka eka nkongomiso wa vatswari. Nakambe nhluvuko wa vona wa moya wu nga ha titshega hi malembe ya vona. Kambe, loko vana va nga kongomisiwi, swi ta va tikela ku tiva Yehovha tanihi Munhu wa xiviri. Vatswari va fanele va dyondzisa vana va vona marito ya Xikwembu hi ku phindha-phindha leswaku vana va ta twa Yehovha loko a vulavula na vona hi ndlela yo fanekisela, kun’wana ni kun’wana laha va nga ta va va ri kona. (Det. 6:6-9) Vana va wena va fanele va tshemba leswaku Yehovha wa khathala ha vona.

Ndlela Leyi U Nga Endlaka Ku Vulavurisana Ku Va Ka Nkoka Ha Yona

Ku vulavurisana i ndlela yin’wana ya nkoka yo pfuna vana va wena. Ina, ku vulavurisana kahle a swi vuli ku vulavula ni vana va wena ntsena. Swi katsa ku vutisa swivutiso ni ku va yingisela hi ku lehisa mbilu loko va hlamula—hambi loko tinhlamulo ta vona ti hambanile ni leswi a wu lava ku swi twa. Anne la nga ni vana vambirhi va vafana u ri: “Ndzi va vutisa swivutiso ku fikela ndzi swi vona leswaku ndzi twisisa leswi va swi ehleketaka ni leswi va langutanaka na swona evuton’wini bya vona.” Xana vana va wena va vona onge wa va yingisela loko va vulavula? Tanya, loyi a boxiweke eku sunguleni u ri: “Vatswari va mina a va ndzi yingisela hakunene naswona a va nga ti rivali timhaka leti a hi vulavula ha tona. A va tiva mavito ya vana lava ndzi nghenaka na vona etlilasini. A va ndzi vutisa hi vona ni hi swiyimo swin’wana leswi hi nga tshama hi bula hi swona.” I swa nkoka ku yingisela ni ku tsundzuka hikuva swi endla leswaku mi va ni mbulavurisano lowunene.

Mindyangu yo tala yi kume leswaku yi kota ku va ni mabulo lamanene hi nkarhi wa swakudya. Vincent u ri: “Ku dya swin’we tanihi ndyangu a a swi ri swa nkoka endyangwini wa ka hina. A hi languteriwe ku dya swin’we tanihi ndyangu loko swi koteka. A hi nga pfumeleriwi ku hlalela thelevhixini, ku yingisela xiya-ni-moya kumbe ku hlaya hi nkarhi wa swakudya. Leswi minkarhi yo tala mbulavurisano wa kona a wu nga ri lowu dzikeke swinene, wu endle leswaku siku ni siku ndzi va ni nkarhi wo rhula lowu ndzi pfuneke leswaku ndzi tiyisela mintshikilelo leyi a ndzi langutana na yona exikolweni.” U ye emahlweni a ku: “Ku tolovela ku vulavurisana ni vatswari va mina hi nkarhi wa swakudya swi tlhele swi ndzi pfuna leswaku ndzi titwa ndzi ntshunxekile ku vulavula na vona loko ndzi lava mpfuno eka timhaka ta nkoka.”

Tivutise, ‘Evhikini hi dya kangani hi ri swin’we tanihi ndyangu?’ Xana ku lulamisa emhakeni leyi swi nga ku nyika nkarhi lowu engetelekeke wo vulavurisana ni vana va wena hi ndlela leyinene?

Lexi Endlaka Ku Endla Minkombiso Swi Ri Swa Nkoka

Dyondzo ya Ndyangu ya nimadyambu leyi khomiwaka vhiki ni vhiki na yona yi endla leswaku swirho hinkwaswo swa ndyangu swi va ni ku vulavurisana lokunene, naswona yi pfuna vantshwa leswaku va kota ku tiyiselela swiphiqo swo karhi. Alan loyi a boxiweke eku sunguleni u ri: “Hi nkarhi wa dyondzo ya ndyangu vatswari va mina a va burisana na hina hi ndlela leyi nga ta endla hi tiphofula. A va tirhisa tinhloko-mhaka leti fambisanaka ni mintshikilelo leyi hi langutanaka na yona.” Mana wa Alan u ri: “A hi tirhisa nkarhi wun’wana wa dyondzo ya ndyangu leswaku hi endla minkombiso. Ku endla minkombiso swi pfune vana va hina leswaku va dyondza ndlela leyi va nga ri lwelaka ha yona ripfumelo ra vona ni ku kombisa leswaku leswi va swi pfumelaka i ntiyiso. Leswi swi va nyike xivindzi lexi a xi ta va pfuna ku tiyisela swiphiqo leswi a va langutana na swona.”

Entiyisweni, loko vana va langutane ni ntshikilelo wa tintangha a va fanelanga va ala ntsena ivi swi helela kwalaho. Va fanele va kota ku hlamula xivutiso lexi nge, ha yini ni lexi nge ha yini swi nga ri tano. Va fanele va tlhela va va ni xivindzi malunghana ni leswi va nga ta swi endla loko va hlekuriwa hikwalaho ka leswi va swi pfumelaka. Loko va nga swi koti ku lwela ripfumelo ra vona swi ta va tikela swinene ku yimela vugandzeri bya ntiyiso hi xivindzi. Ku endla minkombiso swi nga va pfuna leswaku va va ni xivindzi xo tano.

Bokisi leri nga eka tluka 18 ri xaxameta swin’wana swa leswi mi nga endlaka minkombiso ha swona hi nkarhi wa Dyondzo ya Ndyangu ya nimadyambu. Endla minkombiso yoleyo yi va ya xiviri hi ku tlhela u vutisa swivutiso loko vana va wena va hlamurile. Loko mi ri karhi mi endla minkombiso yo tano kambisisani tidyondzo tin’wana leti kumekaka eka swikombiso swa le Bibeleni. A swi kanakanisi leswaku ndzetelo wo tano wa le kaya wu ta hlomisa vana va wena leswaku va kota ku langutana ni mintshikilelo exikolweni ni le tindhawini tin’wana.

Xana Kaya Ra Wena I Ndhawu Leyi Sirhelelekeke?

Xana kaya ra wena i ndhawu leyi vana va wena va swi langutelaka hi mahlo-ngati ku tlhelela eka yona loko va huma exikolweni? Loko ri ri ndhawu leyi sirhelelekeke ri ta pfuna vana wa wena leswaku va kota ku tiyisela mintshikilelo ya siku ni siku. Makwerhu wa xisati loyi sweswi a nga xirho xa ndyangu wa Bethele u ri: “Loko ndza ha kula, nchumu wa nkoka swinene eka mina hi leswi kaya ra ka hina a ri ri ndhawu leyi sirhelekeke. Ku nga khathariseki leswaku xiyimo xi bihe ku fikela kwihi exikolweni a a ndzi swi tiva leswaku loko ndzi fika ekaya swilo hinkwaswo swi ta tshamiseka.” Xana kaya ra wena ri tiveka hi yini? Xana i ndhawu leyi mi toloveleke ku va ni “swifafa, ku kanetana [ni] ku avana” kumbe ri tiviwa hi “rirhandzu, ntsako [ni] ku rhula”? (Gal. 5:19-23) Loko ku rhula ku nga ri kona, xana u ringeta hi matimba ku kumisisa leswaku hi kwihi ku cinca loku nga endliwaka leswaku kaya ra wena ri va ndhawu leyi sirhelelekeke eka vana va wena?

Ndlela yin’wana leyi u nga pfunaka vana va wena ha yona leswaku va kota ku langutana ni mintshikilelo i ku va lavela vanghana lavanene. Hi xikombiso, loko mi tihungasa tanihi ndyangu xana mi katsa ni vamakwerhu va le vandlheni lava wupfeke hi tlhelo ra moya? Kumbe xana u nga rhamba mulanguteri wa xifundzha kumbe van’wana lava va nga le ka ntirho wa nkarhi hinkwawo ekaya ra wena leswaku mi ta dya na vona swakudya? Xana u tiva varhumiwa vo karhi kumbe vatirhi va le Bethele lava vana va wena va nga vaka vanghana va vona, hambi ku ri hi ku tsalelana mapapila, ku rhumelana e-mail kumbe ku belana riqingho minkarhi yin’wana? Vunghana byo tano byi nga pfuna vana va wena leswaku va kongomisa mikondzo ya vona endleleni yo lulama ni ku va ni tipakani ta moya. Anakanya vuyelo lebyinene lebyi muapostola Pawulo a veke byona eka muntshwa Timotiya. (2 Tim. 1:13; 3:10) Vunghana lebyikulu bya Pawulo byi pfune Timotiya leswaku a tshama a ri karhi a anakanyisisa hi tipakani ta moya.—1 Kor. 4:17.

Bumabumela Vana Va Wena

Yehovha wa tsaka loko a vona vantshwa va yimela leswi nga swinene ku nga khathariseki mintshikilelo ya misava ya Sathana. (Ps. 147:11; Swiv. 27:11) A swi kanakanisi leswaku na wena wa tsaka loko u vona vana va hina va hlawula ndlela ya vutlhari. (Swiv. 10:1) Byela vana va wena ndlela leyi u titwaka ha yona ha vona, naswona va bumabumele hi rirhandzu. Yehovha u vekele vatswari xikombiso lexinene. Loko Yesu a khuvuriwa, Yehovha u te: “U N’wana wa mina, la rhandzekaka; ndzi ku amukerile.” (Mar. 1:11) Xitiyisekiso lexi humaka eka Tata wakwe xi fanele xi tiyise Yesu leswaku a tiyisela mintshikilelo yo tala leyi a a ri kusuhi ni ku langutana na yona! Hilaha ku fanaka, byela vana va wena leswaku wa va rhandza naswona va bumabumele hi leswi va swi endlaka.

I ntiyiso leswaku a wu nge va sirheleli hi ku helela vana va wena eka mintshikilelo, ku hlekuriwa ni ku karhatiwa. Nilokoswiritano, u nga ha endla swo tala leswaku u va pfuna. Hi tindlela tihi? Va pfune leswaku va kurisa vuxaka bya vona na Yehovha. Endla leswaku ku va ni moya lowunene wo vulavurisana. Endla Dyondzo ya Ndyangu ya nimadyambu yi va leyi tsakisaka naswona u endla kaya ra wena ri va ndhawu leyi sirhelelekeke. Loko u endla tano a swi kanakanisi leswaku u ta hlomisa vana va wena leswaku va kota ku langutana ni mintlhontlho ya vona yo tala.

[Nhlamuselo ya le hansi]

[Bokisi/Xifaniso lexi nga eka tluka 18]

KU ENDLA MINKOMBISO SWI NGA PFUNA

Hi leswi swikombiso swin’wana swa swiyimo leswi vana va hina va langutanaka na swona. Ha yini mi nga endli minkombiso ya swikombiso leswi eka Dyondzo ya n’wina ya Ndyangu ya nimadyambu?

▸ Muleteri u kombela n’wana wa wena wa nhwanyana leswaku a hlanganyela eka xipano xa le xikolweni.

▸ N’wana wa wena wa jaha u nyikiwa fole loko a ri endleni yo ya ekaya a huma exikolweni.

▸ Vafana van’wana va tshembisa ku ba n’wana wa wena wa jaha loko vo tlhela va n’wi vona a ri karhi a chumayela.

▸ Loko n’wana wa wena wa nhwanyana a famba hi yindlu ni yindlu ensin’wini, u hlangana ni n’wana loyi a dyondzaka na yena xikolo.

▸ N’wana wa wena wa nhwanyana u vutisiwa emahlweni ka vana va le tlilasini ya yena leswaku ha yini a nga wu losi mujeko.

▸ Jaha rin’wana ri tshamela ku hlekula n’wana wa wena wa mufana hi leswi a nga Mbhoni.

[Xifaniso lexi nga eka tluka 17]

Xana vana va wena va na xona xiyimiso xa vona vini xo hlaya Bibele?

[Xifaniso lexi nga eka tluka 19]

Xana u katsa ni vamakwerhu lava wupfeke hi tlhelo ra moya loko mi ri karhi mi tihungasa?