Xikhongelo

7 Xana Xikwembu Xa Swi Yingisa Xi Tlhela Xi Swi Hlamula?

XIVUTISO lexi nga laha henhla xi endla leswaku hi lava ku tiva swo tala. Bibele yi dyondzisa leswaku Yehovha wa swi yingisa swikhongelo swa hina namuntlha. Leswaku a yingisa kumbe a nga swi yingisi swikhongelo swa hina swi titshege hi hina.

Yesu u sole varhangeri va vukhongeri va le nkarhini wakwe lava a va khongela hi ndlela ya vukanganyisi; hikwalaho ko tilavela ndhuma. U vule leswaku vanhu vo tano ‘va ta yi kuma hakelo ya vona hi xitalo,’ leswi vulaka leswaku a va ta swi kuma leswi va swi lavaka, ku nga ku voniwa hi vanhu ematshan’weni yo va va yingisiwa hi Xikwembu. (Matewu 6:5) Hilaha ku fanaka namuntlha, vo tala va khongela hi ku rhandza ka vona ku nga ri ku rhandza ka Xikwembu. Leswi va bakanyaka milawu ya Bibele leyi hi buleke ha yona, sweswo swi endla leswaku Xikwembu xi nga va yingisi.

Kambe, ku vuriwa yini hi wena? Xana Xikwembu xi ta swi yingisa ni ku swi hlamula swikhongelo swa wena? Nhlamulo a yi titsheganga hi rixaka ra wena, tiko kumbe xiyimo xa wena. Bibele yi hi tiyisekisa yi ku: “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:34, 35) Xana tsalwa leri ra ku khumba? Ku chava Xikwembu swi vula ku xi xixima ni ku chava ku xi hlundzukisa. Ku endla leswinene swi vula ku lwela ku endla leswi Xikwembu xi vulaka leswaku i swinene ku nga ri leswi rhandziwaka hi wena kumbe hi vanhu van’wana. Xana hakunene wa swi lava leswaku Xikwembu xi yingisa swikhongelo swa wena? Bibele yi ku byela ndlela leyi u faneleke u khongela ha yona loko u lava leswaku Xikwembu xi ku yingisa.a

I ntiyiso leswaku vanhu vo tala va lava leswaku Xikwembu xi hlamula swikhongelo swa vona hi singita. Eminkarhini ya Bibele, Xikwembu xi ma endlile masingita. Kambe minkarhi yin’wana a xi endla masingita endzhaku ka malembe-xidzana. Ku engetela kwalaho, Bibele yi kombisa leswaku masingita ma hele loko vaapostola va fa. (1 Vakorinto 13:8-10) Kambe, xana leswi swi vula leswaku Xikwembu a xa ha swi yingisi swikhongelo namuntlha? A swi tano! Xiya swin’wana swa swikhongelo leswi xi swi hlamulaka.

Xikwembu xi nyika vutlhari. Yehovha i Xihlovo xa vutlhari hinkwabyo. U byi nyika lava lavaka nkongomiso wakwe ni lava lavaka ku hanya hi byona.—Yakobo 1:5.

Xikwembu xi nyika vanhu moya lowo kwetsima xi tlhela xi va katekisa. Moya lowo kwetsima i matimba ya Xikwembu lama tirhaka. A ma nge ringanisiwi na nchumu. Ma nga hi pfuna leswaku hi tiyisela miringo. Ma nga tlhela ma hi pfuna leswaku hi titwa hi ri ni ku rhula loko hi karhatekile. Ma nga hi pfuna leswaku hi hlakulela timfanelo letinene. (Vagalatiya 5:22, 23) Yesu u tiyisekise valandzeri vakwe leswaku Xikwembu xi nyika nyiko ya xona hi ku swi rhandza.—Luka 11:13.

Xikwembu xi nyika vutivi eka lava xi lavaka hi mbilu hinkwayo. (Mintirho 17:26, 27) Emisaveni hinkwayo ku ni vanhu lava lavaka ntiyiso hi timbilu ta vona hinkwato. Va lava ku tiva hi Xikwembu, vito ra xona, xikongomelo xa xona hi misava ni vanhu swin’we ni hi ndlela leyi va nga tshinelaka ha yona eka xona. (Yakobo 4:8) Minkarhi yo tala Timbhoni ta Yehovha ti hlangana ni vanhu vo tano naswona ta swi tsakela ku nyikela tinhlamulo ta le Bibeleni malunghana ni timhaka teto.

Xana leswi hi swona swi endleke leswaku u amukela magazini lowu? Xana u lava ku tiva swo tala hi Xikwembu? Kumbexana leswi u kumeke magazini lowu, Xikwembu xi hlamula xikhongelo xa wena.

[Nhlamuselo ya le hansi]