Xikhongelo

6 Xana Xi Nga Hi Pfuna?

XANA loko hi khongela ha pfuneka? Bibele yi vula tano, loko malandza ya Xikwembu ma khongela ma pfunekile. (Luka 22:40; Yakobo 5:13) Loko hi khongela hi ta vuyeriwa hi tlhelo ra moya ni ra nyama. Njhani?

Hi xikombiso, a hi nge u ni n’wana loyi a nyikiweke nyiko. Xana a wu ta n’wi dyondzisa leswaku i swinene ku nkhensa, kumbe a wu ta n’wi dyondzisa ndlela leyi a faneleke a ku kombisa ha yona? Loko hi vula ndlela leyi hi titwaka ha yona, hi endla leswaku van’wana va swi xiya leswaku ha nkhensa naswona swi ta va khutaza. Xana swi fanele swi va tano loko hi vulavula ni Xikwembu? Ina! Xiya swikombiso swin’wana.

Swikhongelo swo nkhensa. Loko hi nkhensa Tata wa hina eka swilo leswinene leswi a hi endleleke swona, hi va hi kombisa leswaku ha swi tlangela, naswona swi ta hi endla leswaku hi titwa hi enerisekile.—Vafilipiya 4:6.

Xikombiso: Yesu u kombise ku nkhensa eka ndlela leyi Tata wakwe a n’wi yingiseke ha yona a tlhela a hlamula swikhongelo swakwe.—Yohane 11:41.

Swikhongelo swo kombela ku rivaleriwa. Loko hi kombela leswaku Xikwembu xi hi rivalela hi tiyisa ripfalo ra hina, hi kombisa ku hundzuka ka hina ni leswaku ha wu xiya nkoka wa xidyoho xa hina. Nakambe hi wisa ku karhatiwa hi ripfalo.

Xikombiso: Davhida u khongerile a kombisa ku hundzuka ni ku tisola.—Pisalema 51.

Swikhongelo swo kombela nkongomiso ni vutlhari. Loko hi kombela Yehovha leswaku a hi kongomisa kumbe a hi nyika vutlhari leswaku hi endla swiboho leswinene, sweswo swi kombisa leswaku ha titsongahata hakunene. Swi ta tlhela swi hi tsundzuxa hileswi hi tsandzekaka eka swona ni ku hi pfuna leswaku hi tshembela eka Tata wa hina wa le tilweni.—Swivuriso 3:5, 6.

Xikombiso: Solomoni u kombele nkongomiso ni vutlhari loko a fuma tiko ra Israyele.—1 Tihosi 3:5-12.

Swikhongelo swo kombela mpfuno. Loko hi phofulela Xikwembu leswi nga etimbilwini ta hina loko hi tshikilelekile, hi ta titwa hi ntshunxekile naswona hi ta titshega hi Yehovha, ku nga ri hi hina vini.—Pisalema 62:8.

Xikombiso: Hosi Asa u khongerile loko a langutane ni valala.—2 Tikronika 14:11.

Ku khongelela vanhu lava xanisekaka. Swikhongelo swo tano swi hi pfuna leswaku hi papalata ku va ni vutianakanyi naswona swi endla leswaku hi va ni ntwela-vusiwana.

Xikombiso: Yesu u khongelele valandzeri vakwe.—Yohane 17:9-17.

Swikhongelo swo dzunisa. Loko hi dzunisa Yehovha hikwalaho ka mintirho yakwe yo hlamarisa ni timfanelo takwe, hi ta ya hi n’wi xixima ni ku n’wi tlangela. Swikhongelo swo tano swi ta tlhela swi hi pfuna leswaku hi tshinela eka Xikwembu, ku nga Tata wa hina.

Xikombiso: Davhida u dzunise Xikwembu hikwalaho ka swilo leswi xi swi tumbuluxeke.—Pisalema 8.

Mikateko yin’wana leyi fambisanaka ni xikhongelo i “ku rhula ka Xikwembu loku tlulaka miehleketo hinkwayo.” (Vafilipiya 4:7) Ku kuma ku rhula emisaveni leyi nga ni maxangu i nkateko hakunene. Swi tlhela swi hi vuyerisa hi tlhelo ra nyama. (Swivuriso 14:30) Kambe, xana mikateko yoleyo hi yi kuma hikwalaho ka matshalatshala ya hina? Xana ku na swin’wana swa nkoka leswi katsekaka?

[Marito lama tshahiweke exihlokweni lama nga eka tluka 10]

Xikhongelo xi hi vuyerisa hi tlhelo ra nyama ni hi tlhelo ra moya