I Vamani Swivumbiwa Leswi Tshamaka eXivandleni Xa Moya?

Mukhegula un’wana wa le Yuropa u nghena ekerekeni a khome rhosari naswona u fika a khinsama hi ku titsongahata emahlweni ka xifaniso xa Mariya. Le Afrika, ndyangu wun’wana wu ya esirheni ra xaka ra wona leri wu ri xiximaka swinene leswaku wu ya phahla hi byala. Le Amerika, jaha rin’wana ri titsona swakudya ri tlhela ri anakanyisisa, ri ri ni ntshembo wa leswaku ri ta vulavula ni ntsumi ya rona leyi ri kongomisaka. Le Asia, muprista u hisa phepha leri nga ni mivalavala leswaku a gandzela vakokwana.

I YINI leswi vanhu lava va fanaka ha swona? Hinkwavo va pfumela leswaku ku ni swivumbiwa swo tlhariha swa moya leswi tshamaka exivandleni xa moya, leswi nga va pfunaka swinene vanhu. Mhaka leyi a hi yintshwa naswona a yi hlamarisi. Lexi hlamarisaka hileswaku ku ni mavonelo yo hambana-hambana malunghana ni swivumbiwa leswi tshamaka exivandleni xa moya.

Mamoslem ma gandzela Xikwembu xin’we, ku nga Allah.a Vanhu va Vujagana va vula leswaku Xikwembu i Vunharhu-un’we, ku nga Xikwembu Tatana, Xikwembu N’wana na Xikwembu Moya lowo Kwetsima. Mahindu ma pfumela leswaku ku ni swikwembu ni swikwembu-kati swo tlula gidi leswi hanyaka. Vanhu van’wana va vula leswaku mimoya yi tshama eka swifuwo, eswihlahleni, emaribyeni ni le milambyeni. Van’wana va kanganyisiwe hi tibuku, tifilimi ni hi minongonoko ya thelevhixini leyi kombisaka tintsumi, madimona, swipuku, swinghunghumana, swikwembu swo tala ni swikwembu-kati.

Ku ni mavonelo yo tala lama rharhanganeke malunghana ni swivumbiwa swa moya naswona ku ni mavonelo yo hambana malunghana ni ndlela leyi swi faneleke swi vulavurisiwa ha yona. A hi tindlela hinkwato leti nga tinene to vulavurisana na swona. Ehleketa hi mhaka leyi: Loko hi lava ku fonela munhu, hi fanele hi tiva munhu loyi hi n’wi fonelaka naswona hi tiyiseka leswaku u kona hakunene naswona u ta yi hlamula foni ya kona. A swi twali ku fonela munhu loyi u ngo ehleketa ntsena leswaku a nga va a hanya kumbe a nga hanyi. Ku tlula kwalaho, ku fonela munhu loyi hi nga n’wi tiviki swi nga va ni khombo.

Kutani i vamani lava nga exivandleni xa moya? Bibele a yo nyikela nhlamulo ya xivutiso lexi ntsena, kambe yi tlhela yi hi byela hi munhu loyi hi faneleke hi vulavula na yena ni leswi hi nga swi langutelaka eka yena. Hi kombela u hlaya xihloko lexi landzelaka. Swi nga ha ku hlamarisa leswi Bibele yi swi dyondzisaka.

[Nhlamuselo ya le hansi]