A A Rhandziwa Hi Xikwembu Ni Hi Vanghana Vakwe

NINAMUNTLHA a nga kona la tivaka vito rakwe. U tiviwa ntsena hi vito ra tata wakwe, Yefta. A hi kambisiseni Bibele kutani hi dyondza ha vona. Hi ta swi xiya leswaku n’wana wa Yefta a a rhandziwa hi Xikwembu ni hi vanghana vakwe.

Hi nga hlaya hi Yefta ni n’wana wakwe wa nhwanyana eBibeleni eka Vaavanyisi ndzima 11. Leswi Yefta a a ri nandza wo tshembeka wa Xikwembu, swi le rivaleni leswaku nkarhi na nkarhi a a bula ni n’wana wakwe hi Matsalwa.

Yefta u hanye emahlweni ko va vanhu va Xikwembu, ku nga Vaisrayele, va kombele leswaku xi va nyika hosi leyi nga munhu wa nyama. Yefta a a ri wanuna wa matimba naswona a a ri ni vuswikoti byo lwa. Kutani Vaisrayele va n’wi kombele leswaku a va rhangela ku lwa ni Vaamone, lava a va akelane na vona.

Yefta a a lava leswaku Xikwembu xi n’wi pfuna ku hlula Vaamone, hiloko a endla xihlambanyo. U vule leswaku loko Yehovha o n’wi pfuna a hlula, a a ta n’wi nyika munhu wo rhanga eka va yindlu yakwe loyi a a ta n’wi hlanganisa loko a vuya ekaya. Munhu yoloye a a ta tirha vutomi byakwe hinkwabyo etempeleni ya Xikwembu, ku nga ndhawu leyi vanhu a va xi gandzela eka yona hi nkarhi wolowo. Xana i mani loyi a veke wo rhanga ku n’wi hlanganisa?—a

I n’wana wakwe wa nhwanyana! Yefta u ve ni gome swinene. Phela a a ri ni n’wana un’we ntsena. A a endle xihlambanyo eka Yehovha naswona a a fanele a xi hetisisa. Kambe n’wana wakwe u n’wi byele a ku: “Tatana, loko u pfule nomu wa wena eka Yehovha, endla eka mina hilaha u vuleke hakona hi nomu wa wena.” Hiloko a kombela ku va swakwe ku ringana tin’hweti timbirhi leswaku a ta ya etintshaveni a ya rila. Ha yini a a ri ni gome? Hileswi ku hetisisa xihlambanyo xa tata wakwe a swi ta n’wi boha leswaku a nga tekiwi naswona a nga vi na vana. Nilokoswiritano, ku navela kakwe a nga ku tekanga ku ri ka nkoka. A a lava ku yingisa tata wakwe ni ku tshembeka eka Yehovha. Xana u ehleketa leswaku u tsakise Yehovha ni tata wakwe?—

Yefta u tshike n’wana wakwe a famba ni malandza yakwe ku ringana tin’hweti timbirhi. Loko a vuya, tata wakwe u hetisise xihlambanyo xakwe hi ku n’wi heleketa etabernakeleni ya Xikwembu leyi a yi ri eXilo leswaku a ya tshama kona vutomi byakwe hinkwabyo. Lembe ni lembe, vanhwanyana va le Israyele a va ya eXilo leswaku va ya n’wi khutaza.

Xana wa va tiva vantshwa lava yingisaka vatswari va vona naswona va rhandzaka Yehovha?— I swinene ku endla xinghana na vona. Loko u tekelela n’wana wa Yefta naswona u yingisa u tlhela u tshembeka, u ta va ni vanghana lavanene. U ta tsakisa vatswari va wena naswona Yehovha u ta ku rhandza.