Lexi Endleke Leswaku Dorkasi A Va La Rhandzekaka

HINKWERHU hi lava leswaku vanhu va hi rhandza. Xana u titwa hi ndlela yoleyo?—a Bibele yi hi byela hi Dorkasi, wansati loyi vanhu vo tala a va n’wi rhandza swinene.

Dorkasi a tshama eYopa, ku nga muti lowu nga etlhelo ka Lwandle ra Mediteraniya. Ku ya eYerusalema a swi teka tikhilomitara ta kwalomu ka 56 ku suka eYopa. Dorkasi a ri un’wana wa vadyondzisiwa va Yesu vo sungula.

U ehleketa leswaku ha yini Dorkasi a a rhandziwa swinene?— Bibele yi vula leswaku u endle swilo swo tala leswinene naswona u nyikele hi tinyiko letinene. A a rhungela vavasati lava feriweke hi vavanuna swiambalo swo saseka. U tlhele a vulavula ni vanhu vo tala hi Xikwembu xa ntiyiso, ku nga Yehovha, hilaha Yesu a endleke hakona.

Xana wa swi tiva leswaku hi swihi swilo swo biha leswi humeleleke Dorkasi?— U sungule ku vabya swinene kutani a fa. Vanghana vakwe hinkwavo va ve ni gome. Kutani va rhumele vanhu van’wana laha muapostola Petro a tshama kona, laha a swi teka tikhilomitara ta kwalomu ka 16 ku ya kona. Vanhu volavo va n’wi kombele leswaku a ta hi ku hatlisa. Loko Petro a fika, u ye endlwini ya le henhla leyi Dorkasi a ri eka yona. Vavasati hinkwavo lava a va ri eku rileni va n’wi kombe swiambalo leswi Dorkasi a va rhungela swona.

Kutani Petro u byele vanhu hinkwavo lava a va ri endlwini yoleyo leswaku va huma. Petro ni vaapostola van’wana va endle masingita yo tala emahlweni ka sweswo kambe a ku ri hava ni un’we wa vona la tshameke a pfuxa munhu. Xana u ehleketa leswaku Petro a ta endla yini sweswi?—

Petro u nkhinsame ekusuhi ni ntsumbu kutani a khongela eka Yehovha. Kutani a byela Dorkasi leswaku a pfuka. Hiloko a pfuka! Petro u yise voko rakwe eka yena kutani a n’wi pfuna leswaku a pfuka. Hiloko a vitana tinoni ni vanhu van’wana kutani a va komba yena. Xana wa yi anakanya ndlela leyi hinkwavo ka vona a va tsake ha yona?—

Sweswi a hi anakanyeni hileswi hi nga swi dyondzaka malunghana ni mhaka ya ku pfuxiwa ka Dorkasi. Hi dyondza leswaku loko u pfuna van’wana, vo tala va vona va ta ku rhandza. Kambe xa nkoka swinene Xikwembu xi ta ku tsundzuka xi tlhela xi ku rhandza. A xi nge pfuki xi swi rivarile swilo leswinene leswi u swi endleleke vanhu van’wana. Nakambe xi ta ku katekisa hi vutomi lebyi nga heriki emisaveni ya xona leyintshwa yo lulama.