Ku Thwasa Ka Ntlawa Wa Vu-131 Wa Le Giliyadi

“Endlani Leswaku Xikandza Xa Yehovha Xi Tsaka”

MINDYANGU, vanghana ni vanhu lava a va tsakile a va hlengeletanile eka ku thwasa ka ntlawa wa vu-131 wa mathwasana ya Xikolo xa Bibele xa Giliyadi xa Watchtower hi September 10, 2011. Loko siku ri sungula, swivulavuri ni swichudeni a swi khomiwe hi rhumbyana. Hambiswiritano, loko nongonoko wu hela vanhu hinkwavo lava a va ri kona va 9 063 a va ntshunxekile va tlhela va tsakela tinkulumo, minkombiso ni mimbulavurisano.

Stephen Lett, xirho xa Huvo leyi Fumaka ya Timbhoni ta Yehovha tlhelo mutshama-xitulu wa nongonoko, u nyikele nkulumo yo pfula. U kambisise tindzimana ta Bibele leti kombetelaka eka Yehovha Xikwembu tanihi loyi a nga ni miri wo fanekisela naswona u dzike eka timhaka leti vulavulaka hi ndlela leyi Yehovha a tirhisaka mahlo, tindleve ni mavoko yo fanekisela ha yona.

Xo sungula, u kambisise 2 Tikronika 16:9 leyi vulaka leswaku “mahlo ya [Yehovha] ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.” Swichudeni swi khutaziwe ku hlayisa mbilu ya swona leyi tinyiketeleke hi ku helela eka Yehovha. Swi byeriwe leswaku swi nga tekelela Xikwembu hi ku languta leswinene eka vanhu. Xa vumbirhi, Makwerhu Lett u kambisise 1 Petro 3:12, leyi vulaka leswaku tindleve ta Yehovha ti yingisela swikombelo swa vanhu vo lulama. U khutaze swichudeni leswaku swi hambeta swi khongela eka Yehovha, swi ri karhi swi tsundzuka leswaku hakunene wa swi lava ku yingisa swikhongelo swa swona.

Nakambe xivulavuri xi kambisise Esaya 41:13, laha Yehovha a endlaka xitshembiso lexi: “Mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’” Hi ku khorwiseka lokukulu, Makwerhu Lett u te: “Twanani marito lawa lama tsakisaka ya Yehovha. U tisa voko rakwe leswaku a khoma voko ra hina.” Kutani u byele swichudeni leswaku minkarhi hinkwayo swi pfumelela Yehovha leswaku a swi pfuna naswona a swi fanelanga swi ala mpfuno wakwe. U tlhele a vula leswaku swichudeni swi nga tekelela Yehovha hi ku ndlandlamuxa mavoko ya swona leswaku swi pfuna van’wana.

Xo hetelela, Makwerhu Lett u hlaye Esaya 40:11. U kombele vayingiseri leswaku hi mahlo ya mianakanyo va vona xinakulobye lexikulu lexi vuriwaka hi tsalwa rero. Makwerhu Lett u te: “Yehovha u hi hlengeleta hi mavoko yakwe. U hi rhwala exifuveni xakwe.” Xana hi fanele hi angula njhani? Swichudeni swi tsundzuxiwe ku hambeta swi olova swi tlhela swi va ni rhula ku fana ni xinyimpfana leswaku Yehovha a swi rhwala exifuveni xakwe.

“Hi Ni Xuma Lexi eSwibyeni Swa Vumba”

David Splane, xirho xa Huvo leyi Fumaka u kambisise nhloko-mhaka yoleyo leyi sekeriweke eMatsalweni. (2 Vakorinto 4:7) I yini xuma? Xana i vutivi kumbe i vutlhari? Xivulavuri xi hlamule xi ku: “A swi tano. Xuma lexi muapostola Pawulo a vulavuleke ha xona i ‘vutirheli’ byo ‘endla leswaku ntiyiso wu va erivaleni.’” (2 Vakorinto 4:1, 2, 5) Makwerhu Splane u tsundzuxe swichudeni leswaku tin’hweti ta ntlhanu leti swi ti heteke swi ri karhi swi dyondza a ku ri ku swi lunghiselela xiavelo xa nkoka xa le nsin’wini. Xiavelo xexo i nchumu lowu faneleke wu xiximiwa swinene.

Xivulavuri xi hlamusele leswaku “[swibya] swa vumba” swi vula mimiri ya hina ya nyama. Xi fanise vumba lebyi endliweke hi misava ni lebyi endliweke hi nsuku. Vumba bya nsuku a byi tirhisiwi nkarhi na nkarhi. Hi hala tlhelo, vumba lebyi endliweke hi misava byi endleriwe ku tirhisiwa. Loko hi veka xuma exibyeni xa nsuku, hi nga ha dzika swinene eka xibye xexo ku tlula xuma lexi xi xi tameleke. Makwerhu Splane u te: “N’wina swichudeni, a mi fanelanga mi tilavela ndhuma. Leswi mi nga varhumiwa, mi fanele mi kongomisa vanhu eka Yehovha. Mi swibya swa vumba leswi titsongahataka.”

Loko xivulavuri xi ya emahlweni ni xifaniso, xi vule leswaku eminkarhini ya Bibele swibya swin’wana swa vumba a swi ri switima-ndzilo naswona swin’wana a swi ri ni xifunengeto xo tsindziyela lexi sivelaka xibya leswaku xi nga onhaki. Xana varhumiwa va nga fana hi ndlela yihi ni swibya swa vumba? Eka tin’hweti to sungula exiavelweni xa vona, a swi kanakanisi leswaku varhumiwa va ta hlangana ni swiphiqo swin’wana leswi nga ta va dyondzisa ku tiyisela. A va nge khunguvanyeki hi ku olova loko va soriwa naswona a va nge vi na ximbilwana. Makwerhu Splane u te: “Mi ta kuma leswaku mi ni vuswikoti lebyikulu byo tiyisela ku tlula lebyi a mi anakanya leswaku mi na byona.” Yehovha u nyike swibya swa vumba xuma lexi xa vutirheli, ku nga ri tintsumi. Loko xivulavuri xi gimeta xi te: “Leswi swi vula leswaku Yehovha wa mi tshemba.”

“U Tsutsume Swin’we Ni Vavanuna Lava Fambaka Hi Milenge . . . Xana U Nga Tsutsumisa Ku Yini U Phikizana Ni Tihanci?”

Samuel Herd la nga xirho xa Huvo leyi Fumaka u vutise a ku: “Xana mi ta tsutsuma ku fikela rini naswona mi ta tsutsuma rivilo ra njhani?” Ha yini a vutisa swichudeni xivutiso xexo? Xivulavuri xi fanise mintokoto ya swichudeni ni ya muprofeta Yeremiya. Muprofeta yoloye wo tshembeka a langutane ni nkarhi wo tika wa swiphiqo leswi a ri na swona. Kambe a ha ta langutana ni miringo leyikulu. Kutani Yehovha u n’wi vutise a ku: “Hikuva u tsutsume swin’we ni vavanuna lava fambaka hi milenge, kutani va ku karhalisa, xana u nga tsutsumisa ku yini u phikizana ni tihanci?”—Yeremiya 12:5.

Loko Makwerhu Herd a endla leswaku yinhla yi tirha eka swichudeni u te: “Mi nga ha vona onge a mi ri eku tsutsumeni ni tihanci hikwalaho ka swikambelo hinkwaswo leswi mi swi tsaleke. Kambe, kahle-kahle a mi tsutsuma ni vavanuna lava fambaka hi milenge, ku nga ri tihanci. Eka swiavelo swa n’wina mi ta va mi ri karhi mi tsutsuma ni tihanci, kumbe mi ri karhi mi langutana ni swiphiqo ku tlula leswi mi nga ha swi anakanyaka namuntlha. Xana mi ta endla yini? Ndzetelo wa Giliyadi wu mi hlomisele ku tsutsuma ni tihanci handle ko karhala.” U khutaze swichudeni leswaku swi hambeta swi tiletela hi tlhelo ra moya, swi va ni xiyimiso lexinene xa ku hlaya Bibele ni ku khongela.

Makwerhu Herd u pfumerile leswaku hi ku famba ka nkarhi van’wana va lava rhumeriweke kun’wana tanihi varhumiwa va ta langutana ni ku hetiwa matimba. Van’wana va ta karhatiwa hi mavabyi kumbe va titwa va nga ri ni vuswikoti. Kambe u khutaze swichudeni leswaku swi ni xihlovo xa matimba lexi nga ta swi pfuna leswaku swi hlula xiyimo xin’wana ni xin’wana xo biha naswona handle ko karhala. Xivulavuri xi te: “Ku nga khathariseki leswaku mi tsutsuma ni vavanuna lava fambaka hi milenge kumbe ni tihanci, tshembani leswaku voko ra matimba ra Xikwembu ri ta mi pfuna leswaku mi fika emakumu. Kutani mi ta va varhumiwa lava humelelaka eku yingiseni ka Yehovha ni le ku n’wi dzuniseni.”

Tinhla Tin’wana Ta Nongonoko

“U Kombela Swo Tala.” John Ekrann, xirho xa Komiti ya Rhavi ra le United States, u vulavule hi mhaka leyi khumbaka muprofeta Elixa ni noni leyi vana va yona va majaha a va ri ekusuhi ni ku tekiwa kutani va xavisiwa tanihi mahlonga. (2 Tihosi 4:1-7) Noni a yo va ni xibya xin’we xa mafurha. Elixa u yi lerise leswaku yi hlengeleta swibya swin’wana eka vaakelani va yona, kutani a ku: “U kombela swo tala.” Hi ku tirhisa Elixa, Yehovha hi singita u tate swibya hinkwaswo hi mafurha leswi noni a yi swi hlengeletile. Kutani noni yi xavise mafurha ivi yi kuma mali leyi eneleke leswaku yi hakela swikweleti swa yona ni ku tlhela yi wundla ndyangu wa yona ku ringana nkarhinyana.

Xana hi yihi dyondzo leyi varhumiwa va nkarhi lowu taka va yi dyondzaka emhakeni leyi? Loko noni yi hlengeleta swibya leswi engetelekeke, a yi nga fanelanga yi hlawula. Xivulavuri xi te: “A yi fanele yi hlengeleta xibya xin’wana ni xin’wana lexi a xi ta chela mafurha, minkarhi yin’wana lexikulu.” Kutani Makwerhu Ekrann u khutaze swichudeni leswaku swi amukela xiavelo xin’wana ni xin’wana hambi i xitsongo kumbe i xikulu. U te: “Mi nga hlawuli.” U tlhele a tsundzuxa swichudeni leswaku mpimo wa mikateko leyi noni yi yi kumeke hi ku kongoma a yi fambisana ni ndlela leyi yi rhiyeke ndleve ha yona eka swileriso swa Elixa. Xana swichudeni swi dyondza yini emhakeni leyi? Mpimo wa mikateko leyi hi yi kumaka hi ku kongoma yi fambisana ni mpimo wa ku hiseka ni ripfumelo leri hi ri kombisaka. Xivulavuri xi te: “Mi nga titsetseleli.”

“I Xinkwa Xa Hina.” William Samuelson, mulanguteri wa Ndzawulo ya Swikolo swa Vutirheli bya le Tilweni, u vulavule hi nhloko-mhaka leyi, leyi sekeriweke eka Tinhlayo 14:9. U kandziyise xikombiso lexinene lexi vekiweke hi Yoxuwa na Kalebe. Rito leri nge “xinkwa” hilaha ri tirhisiweke hakona emhakeni leyi ri kombisa leswaku vaaki va Kanana a va ta hluriwa hi ku olova naswona xiendlakalo lexi a xi ta tiyisa Israyele. Xana swichudeni swi dyondza yini? Xivulavuri xi te: “Entirhweni wa n’wina wa nkarhi lowu taka wo seketela ntirho wa nsimu, langutani swiphiqo tanihi nchumu lowu nga ta mi tiyisa ni ku mi seketela.”

“Xana Xikepe Xa Vona Xa Ripfumelo Xi Ta Tshama Xi Tiyile Eka Swidzedze Leswi Nga Kwala Nyongeni?” Sam Roberson, un’wana wa valeteri u vulavule hi xitsundzuxo xa muapostola Pawulo xa leswaku van’wana “ripfumelo ra vona ri [tshovekile] ku fana ni xikepe lexi tshovekeke.” (1 Timotiya 1:19) U khutaze swichudeni ku endla leswaku vanhu van’wana va va ni ripfumelo leri tiyeke eka Yehovha Xikwembu. U te: “Ntirho wa n’wina wu nga fanisiwa ni wa mufuri wa nsimbi.” Hi ndlela yihi? Mufuri wa nsimbi u hiselela tinketani leti nga ta yimisa xikepe. Hilaha ku fanaka, varhumiwa va pfuna swichudeni swa Bibele leswaku swi va ni timfanelo leti Yehovha a ti rhandzaka ni leti lavekaka leswaku swi ponisiwa.

Xivulavuri xi fanise nketani ni timfanelo ta nhungu leti nga eka 2 Petro 1:5-8. Makwerhu Roberson u vule leswaku loko varhumiwa va pfuna swichudeni swa vona swa Bibele ku vona ndlela leyi Yehovha a ti kombisaka ha yona timfanelo teto, swichudeni sweswo swi nga ha lava ku tinyiketela eka Yehovha hilaha ku heleleke. Swi ta tiyisela xidzedze xin’wana ni xin’wana xa maxangu lexi nga ha ringaka ripfumelo ra swona.

Mintokoto Ni Mimbulavurisano

Michael Burnett, un’wana wa valeteri, u kombele swichudeni swa Giliyadi leswaku swi hlamusela ni ku endla nkombiso hi wun’wana wa mintokoto yo chumayela leyi swi tiphineke ha yona sweswinyana. Vayingiseri a va tsakile loko va twa ndlela leyi swichudeni swi koteke ku chumayela vanhu eswitolo leswikulu, erivaleni ra swihaha-mpfhuka, entirhweni wa yindlu ni yindlu ni hi riqingho leri eka rona munhu a va beleke rona hi xihoxo.

Michael Hansen la nga xirho xa Ndyangu wa Bethele ya le United States u vulavurisane ni vamakwerhu vanharhu lava se va nga ni malembe va ri varhumiwa—Stephen McDowell loyi a averiwe ePanama, Mark Noumair loyi a averiwe eKenya na William Yasovsky loyi a averiwe eParaguay. Marito ya vona ma kandziyise xiyenge xa nhloko-mhaka leyi nge, ‘Ku Kuma Ntsako Hikwalaho Ka Ku Endla Ku Rhandza Ka Yehovha.’ (Pisalema 40:8) Hi xikombiso, Mark Noumair u hlamusele ntsako lowu yena ni nsati wakwe va wu kumeke loko va ri exiavelweni xa vona. Vunghana lebyi va veke na byona ni Timbhoni ta kwalaho byi endle leswaku va va ni ntsako lowukulu. Swivangelo swin’wana leswi endleke leswaku va tsaka i ku vona vamakwerhu va landzela swiletelo, va endla ku cinca lokukulu evuton’wini bya vona ni ku xiya ndlela leyi Yehovha a katekiseke matshalatshala ya vona ha yona. U tiyisekise swichudeni leswaku swi ta va ni ntsako lowukulu enkarhini lowu taka.

Endzhaku ka loko xirho xa ntlawa wa vu-131 xi hlaye papila ro tsakisa leri kombisaka ku tlangela ka swichudeni, Makwerhu Lett u gimete nongonoko hi ku khutaza mathwasana leswaku ma endla hi vutlhari. U vule leswaku loko ma endla tano ma ta “endla leswaku xikandza xa Yehovha xi tsaka.” Swi le rivaleni leswaku varhumiwa lava va ta endla leswaku Yehovha a tsaka loko va n’wi tirhela hi ku tshembeka eswiavelweni swa vona.—Esaya 65:19.

[Chati/Mepe lowu nga eka tluka 31]

TINHLAYO TA NTLAWA

10 matiko lama yimeriweke

34,7 xiringaniso xa malembe

19,0 xiringaniso xa malembe va khuvuriwile

13,5 xiringaniso xa malembe evutirhelini bya nkarhi hinkwawo

[Mepe]

(Leswaku u vona rungula leri hleriweke hi ku helela, vona nkandziyiso wa kona)

Swichudeni swi averiwe ematikweni lama kombisiweke laha hansi

SWIAVELO SWA VARHUMIWA

BENIN

BRAZIL

BULGARIA

BURUNDI

CAMEROON

CANADA

CENTRAL AFRICAN REPUBLIC

GERMANY

GHANA

HONG KONG

INDONESIA

KENYA

LIBERIA

LITHUANIA

MALAYSIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

SOUTH AFRICA

UNITED STATES OF AMERICA

VENEZUELA

[Xifaniso lexi nga eka tluka 30]

Swichudeni swa Giliyadi swi endla nkombiso hi wun’wana wa mintokoto leyi swi veke na yona loko swi chumayela

[Xifaniso lexi nga eka tluka 31]

Ntlawa Wa Vu-131 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.