Ndlela Leyi Ha Yona Hi Nga Vaka—Vapfumeri Ni Vaaka-tiko Lava Nga Ni Vutihlamuleri

XANA hi swihi swilo swimbirhi leswi a swi endla vutirheli bya Yesu byi va lebyi hlawulekeke? Yesu a a lava ku cinca timbilu ta vanhu, ku nga ri minhlangano ya tipolitiki. Hi xikombiso, xiya leswi Yesu a swi kandziyiseke eka Dyondzo yakwe ya le Ntshaveni. Loko a nga si vulavula hi xilaveko xo va va fana ni munyu ni ku vonakala, u byele vayingiseri vakwe leswaku “lava khathalaka hi xilaveko xa vona xa moya” va ni ntsako wa xiviri. U tlhele a ku: “Va tsaka lava nga ni moya wo rhula, . . . lavo tenga embilwini, . . . lava kondletelaka ku rhula.” (Matewu 5:1-11) Yesu u pfune valandzeri vakwe leswaku va vona nkoka wo cinca ndlela leyi va anakanyaka ha yona ni ndlela leyi va titwaka ha yona hi milawu ya Xikwembu malunghana ni leswi swi nga swinene ni leswo biha swin’we ni nkoka wa ku va va xi tirhela hi mbilu hinkwayo.

Xa vumbirhi, loko Yesu a vona vanhu va xaniseka, ntwela-vusiwana lowu a ri na wona eka vanhu wu n’wi susumetele ku herisa gome leri a va ri na rona. Hambiswiritano, pakani yakwe a ku nga ri ku herisa ku xaniseka hinkwako. (Matewu 20:30-34) U horise vanhu lava vabyaka, kambe vuvabyi a nga byi herisanga. (Luka 6:17-19) U tise ntshunxeko eka vanhu lava tshikileriweke kambe vuhomboloki byi ye emahlweni byi vanga ku xaniseka. U nyike vanhu lava nga ni ndlala swakudya kambe ndlala yi hambete yi hlasela vanhu.—Marka 6:41-44.

Ku Pfuna Vanhu Leswaku Va Cinca Vutomi Bya Vona

Ha yini Yesu a a dzike ngopfu eka ku va a hundzula timbilu ta vanhu ni ku herisa ku xaniseka ku nga ri ku cinca minhlangano kumbe ku herisa gome? Yesu a a swi tiva leswaku Xikwembu xi tiyimisele ku herisa mimfumo hinkwayo ya vanhu ni ku xaniseka hi ku tirhisa Mfumo wa xona wa nkarhi lowu taka. (Luka 4:43; 8:1) Hikokwalaho, loko vadyondzisiwa va kombele Yesu leswaku a heta nkarhi a ri karhi a tshungula vanhu lava vabyaka, Yesu u va byele leswi: “A hi yeni kun’wanyana, emadorobeni ya muti lowu nga ekusuhinyana, leswaku ndzi ta chumayela na kona, hikuva ndzi hume hi xikongomelo xexo.” (Marka 1:32-38) Yesu u herise ku xaniseka ka vanhu vo tala kambe lexi a xi ri xa nkoka eka yena a ku ri ku chumayela ni ku dyondzisa rito ra Xikwembu.

Namuntlha, Timbhoni ta Yehovha ti tikarhatela ku tekelela Yesu eka ntirho wa tona wo chumayela. Ti susumeteleka ku herisa ku xaniseka hi ku nyikela mpfuno eka vanhu lava wu lavaka. Kambe Timbhoni a ti tikarhateli ku herisa vuhomboloki lebyi nga kona laha misaveni. Ta swi tiva leswaku Mfumo wa Xikwembu hi wona wu nga ta herisa ku xaniseka hinkwako. (Matewu 6:10) Ku fana na Yesu, ti tiyimisela ku hundzula timbilu ta vanhu ku nga ri minhlangano ya tipolitiki. Ndlela yoleyo yo endla swilo ya twisiseka hikuva swiphiqo swa vanhu leswikulu a swi vangiwi hi tipolitiki kambe swi vangiwa hi mahanyelo.

Vaaka-tiko Lava Nga Ni Vutihlamuleri

Hi hala tlhelo, Timbhoni ta Yehovha ti tshemba leswaku i vutihlamuleri bya tona tanihi Vakreste leswaku ti va vaaka-tiko lavanene. Ti xixima valawuri va hulumendhe. Hi ku tirhisa minkandziyiso ya tona ni hi ntirho wa tona wo chumayela, ti khutaza vaakelani va tona leswaku va xixima nawu. Hambiswiritano, loko hulumendhe yi lava leswi swi lwisanaka ni leswi milawu ya Xikwembu yi swi vulaka, Timbhoni a ti xi yingisi xikombelo xo tano xa hulumendhe. Ti “yingisa Xikwembu tanihi mufumi ku tlula vanhu.”—Mintirho 5:29; Varhoma 13:1-7.

Timbhoni ta Yehovha ti endzela hinkwavo lava tshamaka endhawini leyi ti tshamaka eka yona leswaku ti dyondza na vona dyondzo ya Bibele mahala. Hikwalaho ka dyondzo leyi, timiliyoni ta vanhu va timbilu letinene va hundzukile. Lembe ni lembe, madzana ya magidi ya vanhu va pfuniwa leswaku va hlula mikhuva leyi onhaka yo tanihi ku dzaha, ku nwa, ku tirhisa swidzidziharisi hi ndlela yo biha, ku gembula ni ku tikhoma loko biha hi tlhelo ra rimbewu. Va kote ku va vaaka-tiko lava nga ni mahanyelo lamanene ni ku va ni vutihlamuleri hikuva va dyondze ku tirhisa milawu ya Bibele evuton’wini bya vona.—Vona xihloko lexi nge “Bibele Yi Hundzula Vutomi Bya Vanhu,” eka tluka 18 ra magazini lowu.

Ku engetela kwalaho, dyondzo ya Bibele yi pfuna swirho swa ndyangu leswaku swi ya swi xiximana swinene ni ku antswisa ndlela leyi swi bulaka ha yona—exikarhi ka vatekani swin’we ni le ka vatswari ni vana ni le xikarhi ka vana hi voxe. Mabulo lawa hi wona ma endlaka leswaku vuxaka lebyi nga kona exikarhi ka swirho swa ndyangu byi tiya. Hi ndlela yoleyo, mindyangu leyi tiyeke yi hetelela yi ri ni vun’we.

Endzhaku ko pfuxeta tinhla leti hi buleke ha tona eswihlokweni leswi, xana u ehleketa yini: Xana Bibele ya pfumela loko vanhu va hlanganisa vukhongeri ni tipolitiki? Nhlamulo yi le rivaleni; a yi pfumeli. Kambe xana Vakreste va ntiyiso va nga va vaaka-tiko lava nga ni vutihlamuleri? Ina. Xana va nga swi endlisa ku yini sweswo? Hi ku landzela xileriso xa Yesu xo va va fana ni munyu ni ku vonakala emisaveni.

Lava tikarhatelaka ku tirhisa swiletelo leswi swa Kreste va ta vuyeriwa swin’we ni mindyangu ya vona—ku katsa ni vanhu lava tshamaka na vona. Timbhoni ta Yehovha ta le ndhawini ya ka n’wina ti ta swi tsakela ku avelana na wena rungula leri engetelekeke malunghana ni dyondzo ya Bibele leyi sweswi yi dyondzisiwaka endhawini ya ka n’wina.a

[Nhlamuselo ya le hansi]

[Marito lama tshahiweke exihlokweni lama nga eka tluka 10]

Yesu a a tiyimisele ku hundzula timbilu ta vanhu ku nga ri minhlangano ya tipolitiki

[Marito lama tshahiweke exihlokweni lama nga eka tluka 11]

Timbhoni ta Yehovha ti tshemba leswaku i vutihlamuleri bya tona leswaku ti va vaaka-tiko lavanene