Bibele Yi Hundzula Vutomi Bya Vanhu

HI WIHI nchumu lowu wanuna wa le Scotland a kumeke wu vuyerisa swinene ku tlula ku va n’wamabindzu loyi a humelelaka? I yini lexi pfuneke wanuna loyi a tshamaka eBrazil leswaku a tshika mahanyelo yo biha ni ku dzaha khokheyini? Xana wanuna wa le Slovenia u swi kotise ku yini ku tshika mukhuva wakwe wo va xindzendzele? Hlaya leswi vanhu lava va swi vulaka.

“Vutomi Bya Mina A Byi Vonaka Byi Ri Kahle.”—JOHN RICKETTS

LEMBE RO VELEKIWA: 1958

TIKO: SCOTLAND

MATIMU YAKWE: A A RI N’WAMABINDZU LA HUMELELAKA

VUTOMI BYA MINA: Ndzi kulele endyangwini lowu a wu hanya emafurheni. Tata wa mina a a ri murhangeri wa vuthu ra masocha ra le Britain, kutani ndyangu wa ka hina a wu tshamela ku rhurha. Handle ko tshama eScotland, hi tshame eNghilandhi, eJarimani, eKenya, eMalaysia, eIreland ni le Cyprus. Loko ndzi ri ni malembe ya nhungu, ndzi ye exikolweni xa le Scotland laha a ndzi dyondza ndzi ri karhi ndzi tshama kona. Eku heteleleni ndzi thwase eYunivhesiti ya le Cambridge.

Loko ndzi ri ni malembe ya 20, ndzi tirhe malembe ya nhungu eka bindzu ra oyili. Eku sunguleni, a ndzi tirhela eAmerika-Dzonga, ivi endzhakunyana eAfrika kutani eku heteleleni eVupela-dyambu bya le Australia. Endzhaku ka loko ndzi rhurhele eAustralia, ndzi pfule bindzu ra vuvekisi, leri eku heteleleni ndzi ri xaviseke.

Mali leyi ndzi yi kumeke loko ndzi xavisa bindzu rero yi endle leswaku ndzi tshika ntirho loko ndzi ri ni malembe ya 40. Ndzi tirhise nkarhi lowu se a ndzi ri na wona leswaku ndzi famba-famba. Ndzi famba-fambe ni tiko ra Australia kambirhi hi xithuthuthu naswona ndzi teke riendzo ro famba-famba na misava hinkwayo. Vutomi bya mina a byi vonaka byi ri kahle.

NDLELA LEYI BIBELE YI HUNDZULEKE VUTOMI BYA MINA HA YONA: Hambiloko ndzi nga si tshika ntirho, a ndzi lava ku kuma ndlela yin’wana yo nkhensa Xikwembu hi vutomi lebyi a ndzi tiphina ha byona. Ndzi sungule ku ya eKerekeni ya Anglican, leyi a ndzi nghena yona loko ndza ha ri muntshwa. Kambe kereke a yi nga nyikeli ndzetelo wo tala lowu humaka eBibeleni. Endzhaku, ndzi dyondze ni Mamormon kambe ndzi tshike ku dyondza na wona hikuva a ma nga tshembeli eBibeleni.

Siku rin’wana, Timbhoni ta Yehovha ti te ekaya ra mina. Hi ku hatlisa ndzi swi vonile leswaku a ti seketela tidyondzo ta tona eBibeleni. Tsalwa leri ti ri hlayeke na mina i 1 Timotiya 2:3, 4. Tindzimana teto ti vula leswaku i ku rhandza ka Xikwembu leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” Ndzi tsakisiwe hileswi Timbhoni a ti nga vulavuli hi vutivi ntsena kambe hi vutivi lebyi kongomeke lebyi sekeriweke eBibeleni.

Ku dyondza Bibele ni Timbhoni ta Yehovha swi ndzi pfunile leswaku ndzi kuma vutivi byo tano lebyi kongomeke. Hi xikombiso, ndzi dyondze leswaku Xikwembu na Yesu a hi xiphemu xa Vunharhu-un’we; kambe i vanhu vambirhi lava hambaneke. (Yohane 14:28; 1 Vakorinto 11:3) A ndzi tsakile ku tiva ntiyiso wolowo wo olova. Nakambe a ndzi khunguvanyekile ku tiva leswaku ndzi tlange hi nkarhi ndzi ri karhi ndzi lava ku twisisa dyondzo leyi nga mavunwa leyi nga twisisekiki!

Kutani ndzi sungule ku ya eminhlanganweni ya Timbhoni ta Yehovha. Ndzi tsakisiwe hi xinghana ni milawu leyi tlakukeke ya mahanyelo ya un’wana ni un’wana loyi a ri kwalaho—a ti vonaka onge i vakwetsimi. Rirhandzu ra tona ra xiviri ri ndzi khorwisile leswaku ndzi kume vukhongeri bya ntiyiso.—Yohane 13:35.

NDLELA LEYI NDZI VUYERIWEKE HA YONA: Endzhaku ka loko ndzi khuvuriwile, ndzi hlangane ni wansati wo saseka loyi vito rakwe ku nga Diane. U kurisiwe tanihi Mbhoni ya Yehovha naswona lexi ndzi endleke ndzi n’wi tsakela hileswi a a ri ni timfanelo to tala letinene. Hi ku famba ka nkarhi hi tekanile. Xinakulobye ni nseketelo wa Diane ku ve nkateko wa xiviri lowu humaka eka Yehovha.

Mina na Diane hi ve ni ku navela lokukulu ko rhurhela laha ku nga ni xilaveko lexikulu xa vachumayeri va mahungu lamanene ya Bibele. Hi 2010, hi rhurhele eBelize le Amerika Xikarhi. Kwalaho hi chumayela vanhu lava rhandzaka Xikwembu ni lava va lavaka ku dyondza leswi engetelekeke hi xona.

Eku heteleleni, ku tiva ntiyiso hi Xikwembu ni Rito ra xona ku nga Bibele swi ndzi tisela ku rhula ka mianakanyo. Tanihi mutirheli wa nkarhi hinkwawo, ndzi ni ntsako wo dyondzisa Bibele eka vanhu vo tala. Ku hava nchumu wo antswa ku tlula ku vona ntiyiso wa le Bibeleni wu antswisa vutomi bya munhu—hilaha wu endleke hakona eka mina. Eku heteleleni, ndzi kume ndlela ya kahle yo nkhensa Xikwembu hi vutomi lebyi ndzi tiphinaka ha byona.

“Ti Ve Ni Musa Eka Mina.”—MAURÍCIO ARAÚJO

LEMBE RO VELEKIWA: 1967

TIKO: BRAZIL

MATIMU YAKWE: A A RI NI MAHANYELO YO BIHA

VUTOMI BYA MINA: Ndzi kulele eAvaré, ku nga xidorobana lexi nga riki na pongo lexi nga eSão Paulo. Vo tala va vaaki va xona va tirha.

Tata wa mina u fe loko manana a ri ni khwiri ra mina. Loko ndza ha ri mufana, a ndzi ambala swiambalo swa manana loko a nga ri kona. Ndzi sungule ku tekelela mikhuva ya vavasati naswona vanhu va sungule ku ndzi teka tanihi musodoma. Hi ku famba ka nkarhi, ndzi sungule ku endla timhaka ta masangu ni vavanuna.

Loko ndzi fika eka malembe ya mina ya kondlo-a-ndzi-dyi, hakanyingi a ndzi lava ku endla timhaka ta masangu (ni vavanuna ni vavasati) kun’wana ni kun’wana laha a ndzi ta va kuma kona—etibarheni, etindhawini to tihungasa eka tona ni le tikerekeni. Hi nkarhi wo tihungasa, a ndzi ambala tanihi wansati ni ku cina eka siku ro hlawuleka ra le xikolweni. A ndzi dumile swinene.

Vanghana va mina a va katsa vasodoma, tinghwavava ni vanhu lava godzomberiweke hi swidzidziharisi. Van’wana va vona va ndzi kucetele ku dzaha khokheyini naswona hi ku hatlisa yi ndzi godzomberile. Minkarhi yin’wana a hi dzaha vusiku hinkwabyo. A ndzi pfa ndzi heta siku hinkwaro ndzi ri karhi ndzi dzaha ndzi ri ndzexe. Ndzi ondze swinene lerova vanhu va kala va haxa mavarivari ya leswaku ndzi na AIDS.

NDLELA LEYI BIBELE YI HUNDZULEKE VUTOMI BYA MINA HA YONA: Hi nkarhi wolowo, ndzi hlangane ni Timbhoni ta Yehovha. Ti ve ni musa eka mina. Yin’wana ya tindzimana ta Bibele leyi ti ndzi hlayeleke yona i Varhoma 10:13, leyi nge: “Un’wana ni un’wana loyi a vitanaka vito ra Yehovha u ta ponisiwa.” Marito wolawo ma endle ndzi twisisa nkoka wo tirhisa vito ra Yehovha. Minkarhi yo tala endzhaku ka loko ndzi dzahe khokheyini vusiku hinkwabyo, a ndzi pfula fasitere, ndzi languta etilweni naswona ndzi khongela Yehovha ndzi ri karhi ndzi rila, ndzi n’wi kombela leswaku a ndzi pfuna.

Ndzi endle xiboho xo tshika ku dzaha swidzidziharisi tanihi leswi manana a dya mbitsi a xeva hi nhlomulo loko a ndzi vona ndzi tidlaya hi ndzexe. Hi ku hatlisa endzhaku ka sweswo, ndzi pfumerile leswaku Timbhoni ti ndzi fambisela dyondzo ya Bibele. Ti ndzi tiyisekisile leswaku dyondzo ya Bibele yi ta tiyisa ku tiyimisela ka mina leswaku ndzi tshika swidzidziharisi—naswona yi swi endlile!

Loko ndzi ri karhi ndzi ya emahlweni ndzi dyondza Bibele, ndzi swi xiyile leswaku a ndzi fanele ndzi cinca mahanyelo ya mina. Leswi a swi tika ngopfu a ku ri ku tshika mikhuva ya mina ya vusodoma, tanihi leswi a byi ndzi godzomberile. Kambe nchumu wun’we lowu ndzi pfuneke i ku tihambanisa ni swilo leswi a swi ri ni nkucetelo wo biha eka vutomi bya mina. Ndzi tshike vanghana va mina va khale ni ku ya etibarheni ni le tindhawini to tihungasa eka tona nivusiku.

Hambileswi ku endla ku cinca loku a swi nga olovi, ndzi kume nchavelelo hi ku dyondza leswaku Yehovha wa khathala hi mina naswona wa ma twisisa matshalatshala ya mina. (1 Yohane 3:19, 20) Hi 2002, se a ndzi tshike mahanyelo hinkwawo ya vusodoma naswona hi lembe rero ndzi khuvuriwile ndzi va Mbhoni ya Yehovha.

NDLELA LEYI NDZI VUYERIWEKE HA YONA: Manana u tsakisiwe hi ku cinca lokukulu loku ndzi ku endleke lerova a sungula ku dyondza Bibele, hambileswi a a ri ni vuvabyi byo oma swirho. Nilokoswiritano, u hambete a hlakulela ku rhandza Yehovha ni tidyondzo ta Bibele.

Se ndzi ni malembe ya nhungu ndzi ri eka ntirho wa nkarhi hinkwawo, ndzi ri karhi ndzi heta nkarhi wa mina wo tala ndzi dyondzisa van’wana Bibele. Minkarhi yin’wana ndza pfumela leswaku a ndzi fanele ndzi lwisana ni ku navela loku nga riki kahle. Kambe ndzi ni xivindzi hi ku tiva leswaku hi ku nga hlawuli ku endla hi ku landza ku navela koloko, ndzi nga va loyi a tsakeriwaka hi Yehovha.

Ku tshinela ekusuhi na Yehovha ni ku hanya hi ndlela leyi n’wi tsakisaka swi endle leswaku ndzi va ni xindzhuti. Namuntlha, ndzi wanuna la tsakeke.

“A Ndzi Ri Xindzendzele.”—LUKA ŠUC

LEMBE RO VELEKIWA: 1975

TIKO: SLOVENIA

MATIMU YAKWE: A A RI XINDZENDZELE

VUTOMI BYA MINA: Ndzi velekeriwe eLjubljana, ku nga ntsindza wa tiko ra le Slovenia. Ndzi kule kahle kukondza ndzi va ni malembe ya mune. Hiloko Tatana a tidlaya. Endzhaku ka mhangu leyi, manana a a fanele a kulula a n’watseka leswaku a ta wundla mina ni buti wa mina.

Loko ndzi ri ni malembe ya 15, ndzi ye ndzi ya tshama na kokwana wa mina wa xisati. A ndzi swi rhandza ku tshama na yena, tanihi leswi vo tala va vanghana va mina a va tshama ekusuhi. Ndzi tlhele ndzi va ni ntshunxeko wo tala ku tlula lowu a ndzi ri na wona loko ndza ha tshama ekaya. Loko ndzi ri ni malembe ya 16, ndzi sungule ku tihlanganisa ni vanhu lava a va nwa byala hi mahelo-vhiki. Ndzi tshike misisi ya mina yi kula, ndzi sungula ku ambala hi ndlela leyi nga xiximekiki kutani eku heteleleni ndzi sungula ku dzaha.

Hambileswi ndzi tirhiseke swidzidziharisi swo hambana-hambana, a ndzi tshikanga ku nwa byala tanihi leswi a swi ndzi tsakisa. Hi ku hatlisa ndzi tshike ku nwa tinghilazi ti nga ri tingani ta vhinyo kutani ndzi nwa mabodlhela yo tlula rin’we hi nkarhi wun’we. Ndzi ve ni vutshila byo fihla ndlela leyi a ndzi pyopyiwa ha yona hakunene. Hakanyingi, a ku twala risema ra byala ntsena loko ndzi hefemula leri a ri kombisa leswaku a ndzi ri eku nweni. Hambiswiritano, ku hava ni un’we loyi a swi tiva leswaku kumbexana ndzi nwe tilitara to hlayanyana ta vhinyo kumbe byala ndzi swi hlanganise ni byala byo hisa hi nkarhi wun’we!

Minkarhi yo tala, hi mina loyi a ndzi pfuna vanghana va mina leswaku va yima hi milenge ya vona loko disko yi herile nivusiku, hambileswi a ndzi nwe byala byo tala ku va tlula. Siku rin’wana, ndzi twe un’wana wa vanghana va mina a vula leswaku a ndzi ri xindzendzele—ku nga rito ro poyila ra Xislovenia leri vulaka munhu loyi a nwaka byala ku tlula vanhu hinkwavo. Marito wolawo ma ndzi tlhavile.

Ndzi sungule ku ehleketa hileswi a ndzi ri eku swi endleni hi vutomi bya mina. A ndzi titwa ndzi ri xikangalafula. A swi vonaka onge leswi ndzi nga swi endla evuton’wini a hi swa nkoka.

NDLELA LEYI BIBELE YI HUNDZULEKE VUTOMI BYA MINA HA YONA: Hi nkarhi wolowo, ndzi xiye leswaku un’wana wa vadyondzi-kulorhi u cincile; se a ri munhu wo rhula. Leswi a ndzi lava ku tiva hi ku cinca kakwe, ndzi n’wi rhambile leswaku hi ya erhesiturente. Loko hi ri karhi hi bula, u ndzi byele leswaku u sungule ku dyondza Bibele ni Timbhoni ta Yehovha. U ndzi byele swin’wana swa swilo leswi a a ri eku swi dyondzeni, hinkwaswo ka swona a swi ri swintshwa eka mina, tanihi leswi ndzi nga kulelangiki evukhongerini byo karhi. Ndzi sungule ku ya eminhlanganweni ya Timbhoni ni ku dyondza Bibele na tona.

Ku dyondza Bibele swi ndzi pfune leswaku ndzi kota ku tiva ntiyiso. Hi xikombiso, ndzi dyondze leswaku hi hanya enkarhini lowu Bibele yi wu vulaka leswaku i ‘masiku yo hetelela.’ (2 Timotiya 3:1-5) Nakambe ndzi dyondze leswaku ku nga ri khale Xikwembu xi ta herisa vanhu vo biha emisaveni kutani xi nyika vanhu vo lulama lunghelo ro tiphina hi vutomi lebyi nga heriki eParadeyisini. (Pisalema 37:29) Ndzi titwe ndzi ri ni ku navela lokukulu ko cinca mahanyelo ya mina leswaku ndzi ta va exikarhi ka vanhu volavo vo lulama.

Ndzi sungule ku byela vanghana va mina hi ntiyiso wa le Bibeleni lowu a ndzi ri karhi ndzi wu dyondza. Vo tala a va ndzi hlekula hileswi a ndzi va byela swona kambe ndlela leyi a va angula ha yona yi ndzi pfune hi tindlela leti ndzi nga ti langutelangiki. Ndlela leyi va anguleke ha yona yi ndzi pfune ku vona leswaku a hi vanghana va ntiyiso. Ndzi sungule ku swi vona leswaku xiphiqo xa mina xo nwa a xi vangiwa hi vanghana lava ndzi va hlawuleke. Vhiki hinkwaro a va ma langutela hi mahlo-ngati mahelo-vhiki leswaku va ta tlhela va pyopyiwa.

Ndzi herise vunghana byebyo kutani ndzi byi siva hi vunghana lebyi akaka ni Timbhoni ta Yehovha. Ku tihlanganisa na tona a ku ri xihlovo lexikulu xa xikhutazo—lava a ku ri vanhu lava rhandzaka Xikwembu ni lava hakunene va ringetaka ku hanya hi milawu ya xona. Hakatsongo-tsongo, ndzi kote ku tshika mukhuva wa mina wo va xindzendzele.

NDLELA LEYI NDZI VUYERIWEKE HA YONA: Ndzi nkhensa Yehovha hikuva a ndza ha lavi byala leswaku ndzi ta tsaka. Hakunene a ndzi swi tivi leswaku a ku ta va ku endleke yini hi mina loko a ndzi lo ya emahlweni ni mikhuva ya mina ya khale. Kambe ndza tiyiseka leswaku sweswi vutomi bya mina bya antswa.

Eka malembe ya nkombo lama hundzeke, ndzi ve ni lunghelo ro tirha erhavini ra Timbhoni ta Yehovha ra le Slovenia. Ku tiva Yehovha ni ku n’wi tirhela swi endle leswaku vutomi bya mina byi va ni xikongomelo xa xiviri.