Xana Vakreste Va Lembe-xidzana Ro Sungula A Va Nghenelela Eka Tipolitiki?

▪ Loko a nga si tlhandlukela etilweni, Yesu u letele vadyondzisiwa vakwe ndlela leyi a va fanele va endla ntirho wa vona wo chumayela ha yona kambe a nga kalanga a vulavula na vona hi swilo swa tipolitiki. (Matewu 28:18-20) Hikwalaho, vadyondzisiwa vakwe va ye emahlweni va tirhisa nawu lowu Yesu a va nyikeke wona lowu nge: “Tlheriselani swilo swa Khezari eka Khezari, kambe swilo swa Xikwembu eka Xikwembu.”—Marka 12:17.

Xana nawu wolowo wu va pfune njhani vadyondzisiwa va Yesu leswaku va hanya laha misaveni kambe va nga vi xiphemu xa yona? Xana va tiyiseke njhani leswaku hi swihi swilo leswi swi nga swa Mfumo, kumbe swa Khezari, ni leswaku hi swihi swilo leswi nga swa Xikwembu?

Muapostola Pawulo u teke ku nghenelela eka tipolitiki swi fana ni ku tlula nawu lowu Yesu a wu vuleke. Buku leyi nge Beyond Good Intentions—A Biblical View of Politics yi ri: “Pawulo a a swi amukela swilo leswi mfumo wa Rhoma a wu n’wi endlela swona kambe a nga kalanga a nghenelela eka ku seketela ndlela leyi mfumo a wu endla swilo ha yona.”

Hi xihi xiletelo lexi Pawulo a xi nyikeke Vakreste-kulobye? Buku yoleyo yi ya emahlweni yi ku: “Mapapila yakwe lawa a ma tsalela vapfumeri lava tshamaka emitini leyi dumeke yo tanihi le Korinto, Efesa ni le Rhoma a ya kalanga ya vulavula hi tipolitiki ta le nkarhini wolowo.” Buku yoleyo yi tlhela yi vula leswaku Pawulo u “lerise leswaku va tiveka ehansi ka hulumendhe, kambe a ku vanga ni papila ni rin’we leri a ri tsaleke leri hlamuseleke ndlela leyi kereke ya le ndhawini yoleyo yi faneleke yi tikatsa eka minhlangano ya mani na mani ha yona.”—Varhoma 12:18; 13:1, 5-7.

Vakreste lava hanyeke makume ya malembe endzhaku ka ku fa ka Pawulo va yime va tiyile eka ku hambanisa leswi va swi nyikaka Xikwembu ni leswi va swi nyikaka Mfumo. Va hambete va xixima mimfumo ya tipolitiki leyi fumaka kambe va ti hambanise hi ku helela eka swiendlo swa tipolitiki. Buku leyi nge Beyond Good Intentions yi vula leswi landzelaka hi vapfumeri volavo: “Hambileswi a va kholwa leswaku a va ri ni vutihlamuleri bya ku xixima vafumi, Vakreste vo sungula a va nga ngheneleli eka timhaka ta tipolitiki.”

Hambiswiritano, swilo swi cincile endzhaku ka malembe ya 300 endzhaku ka rifu ra Yesu. Mutivi wa vukhongeri Charles Villa-Vicencio u ri: “Loko ndlela leyi tipolitiki a ti ri ha yona yi cinca loko se ku lawula Constantine, Vakreste vo tala swinene va sungule ku nghenelela eka mintirho ya mfumo, vusocha ni ku amukela swikhundlha eka swa tipolitiki.” (Between Christ and Caesar) Xana vuyelo byi ve byihi? Eku heleni ka lembe-xidzana ra vumune C.E., ku hlangana koloko ka vukhongeri ni tipolitiki ku hundzuke vukhongeri bya Mfumo wa Rhoma.

Namuntlha, vukhongeri byo tala lebyi vulaka leswaku byi landzela Kreste byi ya emahlweni byi khutaza swirho swa byona leswaku swi nghenelela eka swa tipolitiki. Vukhongeri byolebyo a byi landzeli Kreste naswona a byi tekeleli xikombiso xa Vakreste va lembe-xidzana ro sungula.