Dyondza Eka Rito Ra Xikwembu

I Yini Mahungu Lamanene Malunghana Ni Vukhongeri?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Xana vukhongeri hinkwabyo i byinene?

Emintlaweni yo tala ya vukhongeri ku ni vanhu va timbilu letinene lava lavaka ku tsakisa Xikwembu. Xa va vona vanhu volavo naswona xa khathala hi vona. Hambiswiritano, lexi twisaka ku vava, vanhu van’wana va tirhisa vukhongeri ku va va endla swilo swo biha. Enkarhini lowu hundzeke, varhangeri va vukhongeri va xanise hambi ku ri vakaneti va vona. (2 Vakorinto 4:3, 4; 11:13-15) Namuntlha, hi ku ya hi swiviko swa mahungu, varhangeri van’wana va vukhongeri va khutaze vutherorisi kumbe va seketela nyimpi kumbe va katseka eku xaniseni ka vana.—Hlaya Matewu 24:3-5, 11, 12.

Bibele yi dyondzisa leswaku ku ni mixaka yimbirhi ya vukhongeri—vukhongeri bya ntiyiso ni bya mavunwa. Vukhongeri bya mavunwa a byi dyondzisi ntiyiso malunghana ni Xikwembu. Nilokoswiritano, Yehovha Xikwembu u lava leswaku vanhu va tiva ntiyiso ha yena.—Hlaya 1 Timotiya 2:3-5.

2. I yini mahungu lamanene malunghana ni vukhongeri?

Xikwembu a xi swi lavi leswaku vanhu va kanganyisiwa hi vukhongeri lebyi tivulaka leswaku bya xi rhandza kambe byi nga dyondzisi ntiyiso malunghana na xona. Entiyisweni, valandzeri va vukhongeri byebyo va lava ku va vanakulobye ni misava leyi lawuriwaka hi Sathana Diyavulosi. (Yakobo 4:4; 1 Yohane 5:19) Rito ra Xikwembu ri hlamusela vukhongeri lebyi khomelelaka eka mimfumo ya vanhu ematshan’weni ya Xikwembu tanihi leyi fanaka ni nghwavava. Bibele yi vitana nghwavava yoleyo hi vito ra “Babilona Lonkulu” leri yi thyiweke rona hi ku landza muti wa khale lowu ku sunguleke vukhongeri bya mavunwa eka wona endzhaku ka Ndhambi ya siku ra Nowa. Ku nga ri khale, Xikwembu xi ta lovisa vukhongeri lebyi kanganyisaka vanhu ni ku va tshikilela.—Hlaya Nhlavutelo 17:1, 2, 5, 17; 18:8, 23, 24.

3. Xana Xikwembu xi ta wu tisa njhani ntsako eka vanhu va misava hinkwayo?

Ku ta ka vuavanyisi ehenhla ka vukhongeri bya mavunwa i mahungu lama tsakisaka. Byi ta tisa ntshunxeko eka vanhu hinkwavo lava tshikileriwaka. Vukhongeri bya mavunwa a byi nge he pfuki byi kanganyise vanhu ni ku va hambanisa. Vanhu hinkwavo lava nga ta va va hanya va ta gandzela Xikwembu xi ri xin’we xa ntiyiso hi vun’we.—Hlaya Esaya 11:9; Nhlavutelo 18:20, 21; 21:3, 4.

4. Xana vanhu va timbilu letinene va fanele va endla yini?

Yehovha a nga va rivalanga vanhu va timbilu letinene lava hangalakeke ni vukhongeri bya mavunwa emisaveni hinkwayo. Sweswi, u le ku hlengeleteni ka vanhu vo tano hi ku va dyondzisa ntiyiso.—Hlaya Mikiya 4:2, 5.

Yehovha wa va amukela endyangwini wakwe hinkwavo lava lavaka ku n’wi tirhela. Hambiloko vanghana kumbe mindyangu ya hina va nga tsaki loko hi sungula ku tirhela Yehovha, hi vuyeriwa swinene. Hi vuyeriwa hi ku va vanghana va Xikwembu, eka “ndyangu” lowuntshwa ni lowu nga ni rirhandzu hi ri ni ntshembo wo kuma vutomi lebyi nga heriki.—Hlaya Marka 10:29, 30; 2 Vakorinto 6:17, 18.

Leswaku u kuma rungula leri engetelekeke, vona ndzima 15 na 16 ta buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Laha Xifaniso Xi Humaka Kona eka tluka 16]

The Complete Encyclopedia of Illustration/​J. G. Heck