NHLOKOMHAKA YA XIFUNENGETOT | XANA LOKO MUNHU A FILE U YA EMAHLWENI A HANYA KUN’WANA?
Ku Endleka Yini Hi Munhu Loko A File?
“A ndzi ehleketa leswaku ku ni tindhawu tinharhu leti munhu a yaka eka tona loko a file: etilweni, etiheleni kumbe epagatori. A ndzi swi tiva leswaku a ndzi faneleki ku ya etilweni kumbe etiheleni. A ndzi nga swi twisisi leswaku ku endleka yini epagatori. A ndzi nga si tshama ndzi swi kuma eBibeleni. A ko va ntsena leswi vanhu va swi vulaka.”—Lionel.
“A ndzi dyondzisiwe leswaku loko vanhu va fa va ya etilweni, kambe a ndzi nga swi tshembi. A ndzi anakanya leswaku loko munhu a fa swi herile hi yena naswona vafi a va na vumundzuku.”—Fernando.
Xana u tshame u tivutisa leswaku ku endleka yini loko munhu a file? Xana varhandziwa va hina lava feke va xaniseka? Xana hi nga tlhela hi va vona? Hi nga tiyiseka njhani leswaku hi ta va vona? Xiya leswi Matsalwa ma swi dyondzisaka. Xo sungula, a hi kambiseni leswaku Bibele yi ri hlamusela njhani rifu. Kutani hi ta bula hi ntshembo lowu Rito ra Xikwembu ku nga Bibele ri hi nyikaka wona.
Xana vafi va le ka xiyimo xihi?
NHLAMULO YA BIBELE: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo, naswona a va ha ri na hakelo, hikuva ku tsundzukiwa ka vona ku rivariwile. Hinkwaswo leswi voko ra wena ri swi kumaka leswaku ri swi endla, swi endle hi matimba ya wena, hikuva a ku na ntirho hambi ku ri kungu, vutivi kumbe vutlhari eSheol, ndhawu leyi u yaka eka yona.”a—Eklesiasta 9:5, 10.
Swi le rivaleni leswaku sirha i ndhawu leyi vanhu va yaka eka yona loko va fa, i ndhawu yo fanekisela kumbe xiyimo lexi munhu a nga kotiki ku twa kumbe ku endla nchumu. Xana Yobo wanuna wo tshembeka a a ri teka njhani Sirha? A a lahlekeriwe hi swilo swa yena hinkwaswo ni vana vakwe hi siku rin’we, a tlhela a huma swilondza swo chavisa swinene emirini wakwe hinkwawo. U kombele Xikwembu a ku: “Onge u nga ndzi tumbeta eSheol [“etiheleni” Catholic Douay Version] u ndzi hlayisa exihundleni.” (Yobo 1:13-19; 2:7; 14:13) Yobo u swi veke erivaleni leswaku a a nga teki sirha ku ri tihele ta ndzilo, laha ku xaniseka kakwe a ku ta nyanya. Kambe u yi teke tanihi ndhawu yo wisa eka yona.
Ku ni ndlela yin’wana yo dyondza hi xiyimo xa lava feke. Hi nga kambisisa leswi Bibele yi swi vulaka hi vanhu va nhungu lava pfuxiweke eku feni.—Hlaya bokisi leri nge “Ku Pfuxiwa Ka Vanhu Va Nhungu Lava Ku Vulavuriwaka Ha Vona eBibeleni.”
A nga kona ni un’we eka lava nhungu loyi a vuleke leswaku ndhawu leyi a a ri eka yona a yi tsakisa kumbe a a xaniseka. Loko ku ri leswaku vanhu lava pfuxiweke a va ye eka tindhawu teto loko va file, a va ta va va byele vanhu hi tindhawu toleto. A swi ta va swi tsariwile eBibeleni leswaku vanhu hinkwavo va swi hlaya. EBibeleni a ku na laha ku tsariweke sweswo. Swi le rivaleni leswaku lava nhungu a ku nga ri na lexi a va ta xi vula hi mhaka yoleyo. Hikwalaho ka yini? Hikuva a va nga twi nchumu, a swi fana ni loko va etlele vurhongo lebyikulu. Ntiyiso hileswaku minkarhi yin’wana Bibele yi fanisa rifu ni ku etlela vurhongo. Hi xikombiso, Davhida lowo tshembeka na Stefano, va ‘etlele eku feni.’—Mintirho 7:60; 13:36.
Hi wihi ntshembo lowu hi nga na wona hi lava feke? Xana va ta pfuka?
a Eka Vuhundzuluxeri Bya Misava Leyintshwa Bya Matsalwa Yo Kwetsima, rito “Sirha” ri huma eka rito ra Xiheveru “Sheol” ni ra Xigriki “Hades.” Tibibele tin’wana ti tirhisa rito leri nge “tihele” kambe mhaka ya ku xanisiwa ka vafi endzilweni, a yi kona eBibeleni.