NHLOKOMHAKA YA XIFUNENGETO—I YINI LESWI BIBELE YI SWI VULAKA HI TINTSUMI?

Ntiyiso Hi Tintsumi

Xana wa swi lava ku tiva leswaku tintsumi i vamani, ti ve kona njhani, nileswaku ti endla yini? Rito ra Xikwembu leri huhuteriweke, ku nga Bibele, hi rona ri nga hi nyikaka tinhlamulo. (2 Timotiya 3:16) Xana Bibele yi hi byela yini?

Tanihi leswi Xikwembu xi nga Moya, tintsumi na tona i swivumbiwa swa moya leswi nga vonakiki “a [swi] na nyama ni marhambu.” Tintsumi to tshembeka ti tshama etilweni naswona ti na lunghelo ro nghena laha Xikwembu xi tshamaka kona.—Luka 24:39; Matewu 18:10; Yohane 4:24.
Mikarhi yin’wana tintsumi a ti humelela hi xivumbeko xa vanhu leswaku ti hetisisa swiavelo leswi ti nyikiweke swona hi Xikwembu ivi endzhaku ko swi hetisisa ti tlhelela eka mimiri ya tona ya moya.—Vaavanyisi 6:11-23; 13:15-20.
Hambileswi tintsumi ti hlamuseriweke tanihi vavanuna eBibeleni ni leswi mikarhi hinkwayo a ti humelela hi xivumbeko xa vona, a ku na tintsumi ta vavasati kumbe ta vavanuna. A ti tekani kumbe ku tswala vana. Ku tlula kwalaho tintsumi a ti sungulanga hi ku va vanhu emisaveni. Tintsumi ti vumbiwe hi Yehovha; xisweswo Bibele yi ti vitana “vana va Xikwembu xa ntiyiso.”—Yobo 1:6; Pisalema 148:2, 5.
Bibele yi vulavula hi “tindzimi ta vanhu ni ta tintsumi,” leswi kombisaka leswaku tintsumi ti na ririmi naswona ta vulavula. Hambileswi Xikwembu xi tirhiseke tintsumi ku vulavula ni vanhu a xi swi lavi leswaku hi ti gandzela kumbe ku ti khongela.—1 Vakorinto 13:1; Nhlavutelo 22:8, 9.
Ku ni tintsumi ta timiriyadi ni timiriyadi kumbexana ti fika eka tibiliyoni.a—Daniyele 7:10; Nhlavutelo 5:11.
Tintsumi ti ni “matimba lamakulu” ku tlula vanhu naswona ti tlharihe ku va tlula. Ti ni rivilo lerikulu ku tlula nchumu wihi ni wihi emisaveni.—Pisalema 103:20; Daniyele 9:20-23.
Hambileswi tintsumi ti nga swivumbiwa leswi tlakukeke ti ni swipimelo naswona ku ni swilo leswi ti nga swi tiviki.—Matewu 24:36; 1 Petro 1:12.
Tintsumi ti vumbiwe ti ri na vumunhu, timfanelo to fana ni ta Xikwembu, ni ntshunxeko wo tihlawulela. Tintsumi ti nga hlawula ku endla leswinene kumbe swo biha. Lexi twisaka ku vava, tintsumi tin’wana ti hlawule ku xandzukela Xikwembu.—Yudha 6.

a Miriyadi yi ringana na 10 000. Loko miriyadi yi andzisiwa hi miriyadi, swi hi nyika 100 wa timiliyoni. Kambe Nhlavutelo yi vulavula hi “timiriyadi ta timiriyadi” ta tintsumi. Sweswo swi vula madzana ya timiliyoni, kumbexana tibiliyoni ta swivumbiwa swa moya.

Xana Tintsumi Ta Xikwembu Ti Hleriwe Njhani?

Ntsumi leyikulu, Mikayele i ntsumi leyikulu hikuva hi yona yi nga ni matimba lamakulu ni vulawuri. Matsalwa ma swi veka erivaleni leswaku Mikayele, i vito rin’wana ra Yesu Kreste.—1 Vatesalonika 4:16; Yudha 9.

Tiserafi ti tlakukile eka tintsumi letin’wana loko swi ta eka malunghelo ni ku xiximeka naswona ti tshama laha ku nga ni xiluvelo xa Xikwembu.—Esaya 6:1-3.

Makerubu na wona ma tlakukile naswona ma ni vutihlamuleri byo hlawuleka lebyi fambisanaka ni ku vangama ka Lowa Matimba Hinkwawo. Naswona hakanyingi, ma hlamuseriwa ma ri ekusuhi ni Xikwembu.—Genesa 3:24; Ezekiyele 9:3; 11:22.

Tintsumi tin’wana to tala leti nga varhumiwa ti tirha tanihi vayimeri ni vaseketeri va La nge Henhlahenhla eku hetisiseni ka ku rhandza ka Xikwembu.b—Vaheveru 1:7, 14.

b Loko u lava ku tiva leswi engetelekeke hi tintsumi, vona ndzima 10 ya buku leyi nge Xana Bibele Yi Dyondzisa Yini Hakunene? ni xiengetelo lexi fambisanaka na yona lexi nge, “Mikayele Ntsumi Leyikulu, I Mani?” leyi kandziyisiweke hi Timbhoni ta Yehovha naswona ya kumeka eka www.jw.org/ts.