Xana Tintsumi Ti Nga Byi Khumba Vutomi Bya Wena?

Siku rin’wana hi Sonto nindzhenga, Kenneth na Filomena lava tshamaka eCuraçao, va endzele vatekani lava a va dyondza na vona Bibele.

Kenneth u ri: “Loko hi fika, yindlu a yi pfariwile naswona movha a wu nga ri kona. Kambe ku ni lexi ndzi susumeteleke ku bela nsati wa kona riqingho.”

U ri hlamurile kutani a vula leswaku nuna wa yena u ye entirhweni. Hambiswiritano, loko a xiya leswaku Kenneth na Filomena va n’wi fonela va ri ekaya kakwe u ye enyangweni kutani a va pfulela va nghena.

Va hatle va xiya leswaku a a ri eku rileni. Loko Kenneth a sungule dyondzo ya Bibele hi xikhongelo, wansati loyi u tlhele a sungula ku rila. Hi musa va n’wi vutise leswaku u karhatiwa hi yini.

U hlamusele leswaku a a kunguhate ku tidlaya ndzhenga wolowo, nileswaku riqingho ra Kenneth ri n’wi kavanyete a ri karhi a tsala papila ro lela nuna wa yena. U va byele leswaku u karhatiwa hi ntshikilelo wa mianakanyo, kutani va n’wi hlayele matsalwa ya Bibele lama chavelelaka. Xikhutazo xexo xi ponise vutomi bya yena.

Kenneth u ri: “Hi nkhense Yehovha leswi a hi tirhiseke ku pfuna wansati loyi la tshikilelekeke. Nakambe hi tlangele leswi kumbexana a tirhiseke ntsumi kumbe moya Wakwe lowo kwetsima ku hi susumetela leswaku hi n’wi fonela!”a

Xana Kenneth na Filomena va tiyisile loko va tshemba leswaku Xikwembu xi nghenelerile hi ku tirhisa ntsumi kumbe moya wa xona lowo kwetsima? Kumbe, xana riqingho ra Kenneth leri fikeke hi nkarhi a ko va ku hatlana ka swilo?

A hi tiyiseki. Kambe lexi hi xi tivaka hileswaku Xikwembu xa ti tirhisa tintsumi ku pfuna vanhu leswaku va tiyisa vuxaka bya vona na xona. Hi xikombiso, Bibele yi vula leswaku Xikwembu xi tirhise ntsumi ku kongomisa Filipi loyi a a ri muchumayeri la nga Mukreste leswaku a pfuna mutirhelamfumo wa Muetopiya loyi a a lava ku pfuniwa.—Mintirho 8:26-31.

Vukhongeri byo hambanahambana byi khutaza vanhu ku pfumela leswaku ku ni swivumbiwa swa moya leswi nga ni matimba yo tlula lama tolovelekeke, laha swin’wana swa swona ku tshembiwaka leswaku swi endla ku rhandza ka Xikwembu kumbe swi sirhelela vanhu. Vanhu vo tala a vo pfumela ntsena leswaku tintsumi ti kona kambe nileswaku ta va pfuna. Hambiswiritano, vanhu van’wana a va pfumeli leswaku tintsumi ti kona.

Xana tintsumi ti kona? Loko swi ri tano, ti huma kwihi? Hi wihi ntiyiso hi tintsumi? Xana tintsumi ti nga byi khumba vutomi bya wena? A hi kambisiseni tinhlamulo ta swivutiso leswi.