Vona Ndlela Leyi Swi Pfunaka Ha Yona Ku Tsundzuka Leswi Yehovha A Swi Endleke!
1 Mutsari wa Pisalema 48 la huhuteriweke u kombele lava a va ri eIsrayele ku ‘tsemakanya exikarhi ka Siyoni, va hlaya makhokholo ya wona, va langutisisa rirhangu ra wona, leswaku va ta ambela rixaka leri nga tata.’ Hi ku susumetiwa hi ku rhandza Yehovha, a a va ta tsakela ku tiva vuxokoxoko hinkwabyo bya xivandla xexo xa le misaveni xa mfumo wa le tilweni. Vona ndlela leyi vuxokoxoko lebyi a byi ta va bya nkoka ha yona hikuva lowu i muti lowu Yehovha a vekeke vito ra yena eka wona! Va ta vulavula ha wona, naswona ngopfu-ngopfu loko va ta tiyiseka leswaku vatukulu va vona va ti twile timhaka ta swilo leswi va tifuweleke swona etimbilwini ta vona.—Ps. 48:12, 13.
2 Sweswi hi hanya enkarhini lowu mfumo wa le tilweni wa Mesiya wa Yehovha wu nga ha riki eSiyoni ya le misaveni, kambe wu nga le Yerusalema wa le matilweni. (Hev. 12:22) Mfumo wa Yehovha lowu nga emavokweni ya Yesu Kreste a wu ri karhi wu fuma ku sukela hi 1914. (Nhlav. 12:10) Ntirho wa wona wu ta hi vuyerisa ngopfu. Hi tlhela hi tsakisiwa ngopfu hi ndlela leyi Yehovha a rhangeleke malandza yakwe emisaveni leswaku ma hetisisa ku rhandza kakwe tanihi vayimeri lava vonakaka va Mfumo wolowo. Vuxokoxoko lebyi tsakisaka bya hlamuseriwa ebukwini ya hina leyintshwa leyi nge Timbhoni Ta Yehovha—I Vahuweleri Va Mfumo Wa Xikwembu. Vona ndlela leyi hi tsakeke ha yona loko hi yi kuma eNtsombanweni wa hina wa Muganga wa “Dyondzo Ya Xikwembu” wa sweswinyana!
3 Hi September 1, buku leyi ana se a yi humesiwile hi tindzimi ta 20, naswona ku hundzuluxela ka tibuku tin’wana a ku ya emahlweni leswaku ku enetiwa swilaveko swa vanhu lava vulavulaka tindzimi tin’wana ta 13. Xana ndyangu wa wena wu yi kumile kopi ya yona? Xana ma yi hlaya? Xana ma vulavula hi swilo leswi mi swi dyondzaka eka yona?
4 Endzhaku ko languta swifaniso ni ku hlaya marito lama nga le tlhelo ka swona, hi laha swi ringanyetiweke ha kona entsombanweni, vamakwerhu vo tala va xinuna ni va xisati va hatle va nghena emhakeni hi xitalo. Xana va hlamusele yini? Hi leti tinhlamuselo to hlayanyana.
5 Makwerhu un’wana wa xisati u tsarile: “I buku yo sungula leyi ndzi tshameke ndzi yi kuma leyi ndzi hisekelaka ku yi heta hi xihatla leswaku ndzi ta tlhela ndzi yi hlaya. Sweswi ndzi le ka ndzima 25. Loko ndzi ya ndzi yi hlaya, mihloti yi ya yi khapa, naswona mbilu ya mina yi ya yi rhandza Yehovha swinene. Buku leyi ya khutaza naswona ya tiyisa eripfumelweni.”
6 Makwerhu loyi a tirheleke Yehovha ku tlula 40 wa malembe u te: “A ndzi swi xiyanga leswaku buku leyi yi ta ndzi tsakisa hi ndlela leyi. A ndzi etlela ni vusiku ngopfu naswona ndzi pfuka ka ha ri ni mixo swinene naswona ndzi hete ku yi hlaya hi mavhiki mambirhi. Entiyisweni hi yin’wana ya tibuku leti tsakisaka ngopfu leti ndzi tshameke ndzi ti hlaya. I xiphemu xa nkoka xa ndzavisiso naswona xi tlhela xi va xiphemu xa nkoka xa xikhutazo.”
7 Xiyimiso Xa Nkarhi Na Nkarhi Xo Hlaya: Van’wana lava hatleke va hlaya buku leyi hinkwayo va ehleketa ku tlhela va yi hlaya kambe sweswi va ta yi hlaya va nga tsutsumi.
8 Loko ku ri ni vanhu vo tlula un’we endyangwini wa wena lava nge entiyisweni, u nga ha rhandza ku tirhisa xiphemu xa buku leyi edyondzweni ya n’wina ya ndyangu. Mindyangu yin’wana yi sungule ku endla tano emasikwini ma nga ri mangani endzhaku ka loko yi kume buku leyi entsombanweni. Leswi a swi vuli swona leswaku swilo swin’wana, swo tanihi ku lunghiselela Dyondzo ya Xihondzo xo Rindza, swi fanele swi nga endliwi. Kambe u nga ha swi kuma swi pfuna ngopfu ku tirhisa 15 ku ya ka 20 wa timinete mi hlaya ni ku vulavula hi mhaka leyi humaka ebukwini leyi nge Vahuweleri.
9 Mindyangu yin’wana yi hlaya matluka mambirhi kumbe manharhu—kumbexana xihlokwana xin’we kumbe swimbirhi—madyambu man’wana ni man’wana yi nga si suka eswakudyeni swo lalela. Hi munhu hi xiyexe swi nga ha endleka va hlaye xiphemu lexikulu xa buku leyi, kambe va pfuneka hi ku hlaya va nga tsutsumi, laha ku nga ni nkarhi wa ku vulavula hi mhaka leyi. Van’wana lava endlaka leswi hi lava va tirheleke Yehovha malembe yo tala. Loko va ri karhi va hlaya, va tsundzuka swilo swo tala leswi tsakisaka. Swa va khutaza etimbilwini loko va vulavula swin’we hi swiphemu leswi va veke na swona eka swiendlakalo leswi va swi hlayaka.
10 Hikwalaho ka swiyimo swo karhi ekaya ra wena, u nga ha kuma leswaku u hlaya u ri wexe. Makwerhu un’wana wa xisati loyi a tsaleleke Sosayiti u te: “A ndzi hlayanyana buku leyi madyambu man’wana ni man’wana ndzi nga si etlela. Buku leyi yi aka ku tsakela ni ku rhandza ntiyiso eka mina, naswona ndzi titwa ndzi ri ekusuhi na Yehovha naswona ndza tlangela ngopfu hi leswi ndzi nga xiphemu xa nhlengeletano yakwe. Entiyisweni ndzi tsakela tluka rin’wana ni rin’wana leri ndzi ri hlayaka.”
11 Hambi leswi buku leyi yi nga yikulu, swiyenge swa yona a hi swikulu. Xiyenge xo sungula xi komile, kambe xi hlanganisa swiendlakalo hi ndlela leyi tsakisaka ku sukela emasikwini ya Avele ku ya fika elembeni ra 1992—eka matluka ya 108 ntsena. Swiyenge swin’wana swi hlanganisa matluka ya 13 ku ya eka 150. Xiyenge xin’wana ni xin’wana xi avanyisiwe hi tindzima. Ematshan’wini yo swi hlaya hi ku tsutsuma, hlaya xiyenge xin’we, ndzima yin’we, kumbe nhloko-mhaka yin’we hi nkarhi wo karhi; tiphine hi yona; naswona u pfuneka eka yona.
12 Vana Ni Nkarhi Wa Ku Ehleketa Hi Leswi U Swi Hlayaka: Xana xikongomelo xa wena xi ta va yini loko u ri karhi u hlaya? Ku hlaya ntsena—u heta buku—a xi fanelanga xi va xikongomelo xa wena. Buku leyi nge Vahuweleri yi khome matimu ya ndzhaka ya wena ya moya. U fanele u ma tiva kahle. Vana ni nkarhi lowu eneleke wa ku ehleketisisa hi ntikelo wa leswi u hlayaka ha swona. Loko u ri karhi u pfuxeta mintirho ya timbhoni ta khale ta Yehovha, ehleketa hi ndlela leyi u nga tekelelaka ripfumelo ra tona ha yona. (Hev. 12:1, 2) Loko u hlaya hi ndlela leyi vagwinehi lavakulu va sunguleke ha yona, xiya kahle xirimbana lexi phaseke lava gwineheke, hi xikongomelo xo hlayisa vumoya bya wena. Naswona loko u ri karhi u pfuxeta matimu ya manguva lawa, xiya timfanelo ta moya ta lava va tirhisiweke hi Xikwembu, ndlela leyi va kombiseke ha yona leswaku ku endla ku rhandza ka Xikwembu i nchumu wa nkoka swinene evuton’wini bya vona, ni ndlela leyi va anguleke ha yona eka swiyimo swin’wana—leswi swin’wana swa swona a swi tika—leswi Xikwembu xi swi pfumeleleke.—Hev. 13:7.
13 U ta swi kuma swi tiyisa ripfumelo ku dyondza hi vuxokoxoko lebyi kombisaka ndlela leyi Yehovha a nga kongomisa vanhu vakwe ha yona eku twisiseni lokunene ka ntiyiso wa Bibele lowu hi wu tsakelaka sweswi. Ku tlangela ka wena lunghiselelo leri Yehovha a ri tirhisaka ku ta kula loko u ri karhi u tolovelana kahle ni ndlela leyi nhlengeletano leyi yi kuleke ha yona. Entiyisweni u ta tsaka loko u hlaya ndlela leyi mahungu lamanene ma fikeleleke swiphemu swa le kule swa misava hi ndlela leyi hetisisaka vuprofeta. Mbilu ya wena yi ta tsakisiwa hi mintokoto ya lava tshembekeke eswiphen’wini hinkwaswo swa misava lava tirheke hi ku hiseka eku huweleleni ka Mfumo. U ta khutazeka leswaku u langutana ni miringo ya munhu hi xiyexe, loko u hlaya hi leswi vamakwerhu va xinuna ni va xisati vo tshembeka va swi tiyiseleleke hikwalaho ka ku rhandza ka vona Yehovha.
14 Endzhaku ka loko mi hlaye mhakanyana yo karhi, tinyikeni nkarhi wa ku burisana hi nkoka wa yona naswona mi pfuxeta vuxokoxoko bya yona. Loko u ri ni vana lavatsongo, va katse eku hlamuseleni ka swifaniso naswona u va byela va ku hlamusela leswi va swi tivaka hi vanhu lava kombisiweke. Hambi loko u hlaya u ri swaku, lwela ku vulavula ni van’wana hi leswi u swi dyondzeke. Loko swi fanela, tirhisa mhaka leyi u yi dyondzeke eka maendzo yo vuyela ni loko u fambisa tidyondzo ta Bibele. Loko u yi phindha-phindha, yi ta dzika emiehleketweni ni le mbilwini ya wena, naswona yi ta ku pfuna.
15 Tsakela Vuxokoxoko Bya Yona: Nkarhi lowu u nga ta wu tirhisa ku hlaya buku leyi nge Vahuweleri wu fanele wu va lowu tsakisaka naswona wu va lowu pfunaka.
16 Xana u ta tsakela leswaku ndyangu wa wena wu endzela yindlu-nkulu ya misava hinkwayo ya Timbhoni ta Yehovha? Matluka 208-9 ma kombisa miako leyi a yi tirhisiwa hi Sosayiti eka lembe xidzana leri hundzeke ePittsburgh. Matluka 216-17 ma ku kombisa miako leyi tirhisiweke endzhaku eBrooklyn. Swifaniso leswi nga eka matluka 352-6 swi nga ku pfuna ku vona yindlu ya misava hinkwayo namuntlha hi mahlo ya miehleketo. Tindzima 26 na 27 ti tele hi vuxokoxoko bya mintirho leyi endliwaka eBethele, naswona matluka 295-8 ma ni marungula lama engetelekeke hi vutomi bya le Bethele.
17 Vo tala va hina a hi swi koti ku endzela marhavi yo tala ya Sosayiti. Matluka 357-401 ya buku leyi nge Vahuweleri ma ku tekisa pfhumba ra misava hinkwayo. A ku na xivangelo xo tsutsuma. Heta nkarhi wo hlayanyana etikweni rin’wana ni rin’wana naswona u eneriseka. Tirhisa mepe wa misava eka matluka 415-17 leswaku u vona ndhawu yin’wana ni yin’wana. Hlaya tinhlamuselo leti nga le kusuhi ni xifaniso xin’wana ni xin’wana xa rhavi. Hi ku tirhisa xikombo, u nga tlhela u kuma marungula lama tsakisaka hi tiko rin’wana ni rin’wana. Tirhisa nkarhi lowu ku tiva swirho swa kaya ra wena ra moya ematikweni man’wana.
18 Loko vanhu va hlanganile minkarhi yin’wana va tlanga mintlango yin’wana leyi lavaka vutivi bya swiendlakalo swa tiko. Xana a swi nga ta va swi antswa ku tiva masiku ya nkoka ni swiendlakalo swa nkoka swa matimu ya manguva lawa ya vanhu va Yehovha? U ta kuma swiendlakalo swo tala swo tano swi xaxametiwile eka matluka 718-23 ebukwini leyi nge Vahuweleri. Nxaxamelo wolowo wu nyikela xisekelo-nkulu xa ntirho; u nga wu engetela hi timhaka leti u tikumeke ebukwini yoleyo hinkwayo. Ti tirhise tanihi xisekelo xa mpfuxeto. Vana lavatsongo emindyangwini hakanyingi hi vona lava nga swi vekaka emianakanyweni hi xihatla. Van’wana va hina lavakulu hi nga ha hlwelanyana. Kambe leti i timhaka ta matimu ya swa le tilweni leti hinkwerhu ka hina hi nga pfunekaka hi ku titiva. Endzhaku ko tiva masiku ni swiendlakalo-nkulu, aka xisekelo ehenhla ka swona. Vona leswaku i timhaka tingani leti u nga ti tsundzukaka mayelana ni xiendlakalo xin’wana ni xin’wana. Kutani vulavula hi xiphemu xa xiendlakalo xin’wana ni xin’wana lexi veke kona eku hetisekeni ka ku endla ku rhandza ka Xikwembu. Lexi landzelaka, vulavula hi ndlela leyi swi khumbeke vutomi bya wena ha yona ni ndlela leyi u fanelekaka ha yona eka leswi Yehovha a swi endlaka.
19 Vona Minkarhi Leyi Ku Pfulekeleke: Loko u ri karhi u hlaya ni ku vulavula hi buku leyi nge Timbhoni Ta Yehovha—I Vahuweleri Va Mfumo Wa Xikwembu, u ta vona ku hetiseka lokukulu ka Esaya 60:22 ku paluxeka. Buku leyi yi ri eka tluka 519: “Ku hetiseka ka xitshembiso xa leswaku ‘lontsongo u ta va gidi’ hakunene ku humelerile, naswona hi ndlela leyikulu swonghasi! Eka rin’wana ni rin’wana ra matiko lama tlulaka 50 laha ‘lontsongo’ a a nga ri kona ni ku va kona—laha a ku ri na un’we wa Timbhoni ta Yehovha hi 1919, laha a va nga si chumayela nikatsongo—namuntlha ku ni vadzunisi va Yehovha lava tlulaka gidi. Eka man’wana ya matiko lawa, ku na makume ya magidi, ina, hambi ku ri ku tlula dzana ra magidi ya Timbhoni ta Yehovha leti nga vahuweleri lava hisekaka va Mfumo wa Xikwembu! Timbhoni ta Yehovha emisaveni hinkwayo ti hundzuke ‘tiko lera matimba’—ti tele tanihi vandla leri nga ni vun’we ra misava hinkwayo ku tlula vanhu vahi ni vahi va tinxaka leti nga kwalomu ka 80 ta matiko lama tifumaka emisaveni.”
20 Ntirho wolowo wa ku andza ka Mfumo a a wu si hela. Ematshan’wini ya sweswo, Yehovha u hatlisise ntirho hi rivilo leri nga si tshamaka ri va kona. Xana u ta wu endla ku fikela kwihi? Xana wa yi vona hakunene minkarhi leyi ku pfulekeleke? Loko u ri karhi u dyondza leswi van’wana va swi endlaka, onge mbilu ya wena yi nga ku susumetela ku tiendla u kumeka, u hlanganyela hi xitalo entirhweni lowunene lowu Xikwembu xa hina xa rirhandzu xi wu kongomisaka hi ku tirhisa Yesu Kreste esikwini ra hina.