Xana Vana Va Wena Va Lunghekele Ku Tlhelela Exikolweni?
1 Hi January, vantshwa va Vakriste va ta va va tlhelela exikolweni. Leswi swi nga ha fambisana ni ku nyanyuka ni ku karhateka kun’wana loku kotekaka. Mintlhaveko leyi ya le ndzeni yi vumbiwa hi minkarhi ni mintlhontlho leyi languteriweke. Vantshwa van’wana va ta va va hlangana ni vadyondzi-kulobye ni mathicara lamantshwa. Vantshwa va Vakriste nakambe va swi xiya leswaku lembe rin’wana ni rin’wana lerintshwa ra xikolo ri landzeriwa hi ku ringiwa ka ripfumelo ra vona, vutshembeki ni rirhandzu ra Yehova. Xana n’wina vantshwa ebandlheni mi lunghekele ku tlhelela exikolweni? N’wina vatswari mi nga va khutaza njhani vana va n’wina hikwalaho ka miringo leyi nge mahlweni?
TIRHISA BROXARA LEYI NGE SCHOOL
2 Hi 1983 broxara leyi nge School ngopfu-ngopfu a yi lunghiseleriwe vatswari va Vakriste ni vana va vona va malembe ya xikolo. Yi kunguhateriwe ku pfuna kahle eku nyikeleni ka vadyondzisi ni vafambisi ka ripfumelo ni swiendlo swa Timbhoni ta Yehova tanihi leswi leswi swi khumbaka mintirho yin’wana ya xikolo. Nakambe yi nyikela switsundzuxo swa xiyimo xa vun’we bya Timbhoni ta Yehova malunghana ni ku xixima ka mahanyelo lamanene.
3 Eka vantshwa vo tala broxara leyi yi tikombe yi ri xisirhelelo xa ntiyiso. Hi xikombiso, mutswari la nga Mbhoni u twe leswaku tidyondzo ta rimbewu a ti ta nyikeriwa swichudeni hi vanhu lava a va tiviwa va ri na mahanyelo yo biha. Hi ku va a ri na broxara leyi, mutswari u swi kotile ku hlamusela ku landzula ka yena loku nga eMatsalweni naswona u humelerile hi ku va ku cinca loku faneleke ku endliwa etitlasini ta nhwana wa yena.
4 Xikolo xi nga si sungula, vatswari va nga ha tiyisa mianakanyo ni timbilu ta vana va vona hi ku ti nyika nkarhi wo phyuphyisa miehleketo ya vona hi leswi nga endzeni ka broxara. Hi ku languta loku faneleke ka malembe ya vana, mpimo ni xikolo, vatswari va nga tshikilela tinhla leti hlawuriweke leti humaka eka broxara leti ngopfu-ngopfu ti nga ha vaka mpfuno elembeni rero. (Swiv. 14:15; 22:3) Vulavula ni n’wana wa wena hi swiyimo leswi a nga ha langutanaka na swona, ivi u kombisa ndlela leyi mhaka leyi humesiweke yi nga ha vaka mpfuno ha yona eka ‘ku lulamisa tindlela ta milenge ya yena.’—Vahev. 12:13.
5 Vatswari va nga endla swo tala ku pfuna vana va vona leswaku va “tihlamulela eka un’wana ni un’wana” loyi a nga ha va vutisaka hi malangutelo ni ripfumelo ra vona. (1 Pet. 3:15) Eka timhaka tin’wana vatswari va nga ha hlawula ku vulavula na thicara hi voxe. Vatswari van’wana va Vukriste va hlela maendzo ya ku ya exikolweni nkarhi na nkarhi, tanihi leswi leswi swi nga pfunaka ku aka vuxaka lebyinene exikarhi ka vona ni mathicara. Nkhathalelo wo tano wa munhu hi xiyexe nakambe wu tiyisa vuxaka exikarhi ka mutswari ni n’wana. Vatswari van’wana va yingise xiringanyeto xo tinyika nkarhi hambi ku ri wo tshama loko ku ri na mabulo ya tlilasi laha leswi swi pfumeleriwaka kona. Nkarhi wun’wana leswi swi nyika mutswari ntlhaveko wa xiviri wa matshamelo ni mintshikilelo leyi hambaneke ya siku na siku leyi vana va hina va langutanaka na yona.—1 Pet. 3:8.
VANA MBHONI SIKU RIN’WANA NI RIN’WANA
6 Mbhoni yin’wana leyintsongo a yi kombela thicara wa yona ku yi pfuna hi marito yo nonon’hwa lawa yi ma kumeke loko yi hlaya xibukwana lexi nge Ku Kambisisa Matsalwa siku rin’wana ni rin’wana. Siku rin’wana u xiye leswaku xibukwana xa yena a xi nga ri kona. Endzhakunyana u swi kumile leswaku thicara wa yena u xi “lombile” hi siku leri a humeke exikolweni nkarhi wu nga si fika hikwalaho ka vuvabyi. A a nga swi lavi ku hupa ku hlaya ndzimana. Leswi swi vangele leswaku a n’wi nyika kopi ya yena n’wini ya Ku Kambisisa Matsalwa.
7 I ntiyiso leswaku lembe lerintshwa ra xikolo ri tisa minkarhi ya ku chava ni ku karhateka. Hambi swi ri tano, langutelo lerinene kun’we ni ku lunghiselela hi ku gingiriteka ku ta pfuna vatswari ni vantshwa ku ‘pfuxa miehleketo ya vona ya ntirho’ wo dzunisa Yehova hi lembe leri taka ra xikolo.—1 Pet. 1:13.