Ku Hetisisa Vutirheli Bya Hina Bya Mfumo Hi Mpfuno WaXikombo

1 Tanihi Vakriste lava tinyikeleke, hi ku hiseka hi ringeta ku hetisisa vutirheli bya hina. Leswaku a hi pfuna ku endla leswi, Yehova u nyikele rifuwo ra ndzetelo ni xikhutazo hi layiburari leyikulu ya tibuku ta ntikelo. Xana hi nga ti tirhisa ku antswa? Mpfuno lowukulu wa ku endla leswi i Watch Tower Publications Index, leyi humesiwaka nkarhi na nkarhi hi tindzimi to hambana-hambana ku sukela hi 1961. (Loko u nga xi twisisi Xinghezi, hi ku khutaza leswaku u tirhisa Xikombo Xa Tinhloko-mhaka lexi humesiweke eka minkandziyiso ya Xihondzo xo Rindza na Awake! ya December 15 na December 22. Xikombo lexi xi nga ku pfuna ku kuma hi ku olova swihloko leswi humeleleke eka Xihondzo xo Rindza na Awake! swa lembe leri nga hundza.)

2 Index yi nga ku pfuna njhani leswaku u hetisisa vutirheli bya wena? Yi endla tano hi ku kombetela eka ndzayo ni tinhlamuselo letinene leti ana se ti nyikeriweke. Index yi lunghiseleriwe ku ri karhi ku tsundzukiwa vumakwerhu bya misava hinkwayo. Ku sukela eka vana ku ya eka vakokwana, swichudeni leswintshwa swa Bibele ku ya eka vakulu, hinkwavo va nga kuma tinhlamuselo leti va ti lavaka ta xikongomelo xihi na xihi lexi nga mpfuno.

NDLELA YO KUMA LESWI U SWI LAVAKA

3 Loko ku tsakela ka wena ku ri eka nhlamuselo ya ndzimana yo karhi kumbe nongonoko wa tindzimana, u ta vona swi antswa ku sungula u pfula eka xikombo xa matsalwa endzhaku. Xana un’wana u tshahe Yohane 10:30 hi ku ringeta ku kombisa dyondzo ya Vunharhu-un’we? Xikombo xa matsalwa xi ta ku yisa emhakeni leyi hlamuselaka leswaku ha yini Yesu a vule marito wolawo. Xikombo xa matsalwa xi ta fuwisa ku hlaya ka hina ka Bibele ka munhu hi xiyexe loko hi lava tinhlamuselo ta tindzimana leti tikombaka ti nonon’hwa kumbe ti nga twali kahle.

4 Xikombo xa tinhloko-mhaka xi nyikela tindlela to hambana-hambana eka rungula leri fanaka leri tirhaka. Hi xikombiso, u nga ha lava rungula eka leswi u nga swi endlaka loko munghana la nga pfumeriki a kaneta ku famba ni vana va wena eminhlanganweni. Leswaku u kuma nhlamulo, u nga ha pfula eka tinhlo-mhaka leti nge “Husbands,” “Wives,” “Children,” “Opposition,” kumbe “Meetings.” Mayelana ni mhaka yihi na yihi, loko leswi u swi lavaka u nga swi kumi ehansi ka nhloko-mhaka yo sungula leyi u pfulaka ka yona, ringeta yin’wana. Tivutise: ‘I mani la katsekaka? Xana ndhawu leyi kongomeke i ya nkoka? I nkoka wo karhi kumbe vutshila? I ntlhaveko lowu lawulaka? I pakani?’ Loko u kuma nhloko-mhaka-nkulu leyi tikombaka yi ri yinene, xo sungula kambisisa tinhlamuselo ta le handle ehansi ka yona hi ku kongoma. Hakanyingi leswi swi hlayisa nkarhi hi ku kombisa nhloko-mhaka yin’wana leyi kongomeke ngopfu.

5 Vuswikoti eku tirhiseni ka Index byi nga pfuna ngopfu eku humeleleni ka ku hetisisa vutihlamuleri bya hina byo kwetsima. Mindyangu ya hina, swichudeni swa hina swa Bibele ni mabandlha ya hina ma ta pfuneka loko hi va ni vuswikoti eku tirhiseni ka xitirho lexi hi laha ku engetelekeke. Minkandziyiso leyi taka ya Vutirheli Bya Hina Bya Mfumo yi ta kambisisa tindhawu ta nkoka laha Watch Tower Publications Index yi nga vaka mpfuno lowukulu eku hetisiseni ka vutirheli bya hina bya Mfumo eka tona.