Ku Twarisa Mahungu Lamanene

Hi Ku Sungula Tidyondzo Hi Ku Vula Hi Ku Kongoma

1 Yesu u hi lerise ku “endla vadyondzisiwa.” (Mat. 28:19) Hakanyingi ku endla leswi swi lava ku sungula tidyondzo ta Bibele ni lava tsakelaka. Ku byela vanhu hi ku kongoma evutirhelini bya yindlu na yindlu leswaku hi lava ku sungula tidyondzo ta Bibele na vona swi nga hi pfuna ku endla leswi hi xihatla. Nakambe swi pfuna ku kombisa kahle xikongomelo-nkulu xa riendzo.

2 I yini leswi hi nga swi vulaka loko hi byela vanhu leswaku hi lava ku sungula tidyondzo ta Bibele? Ku va byela loku olovaka swinene loku kongomeke ka antswa. Hi nga ha ku: “Ndzi tsakela ku pfuna vanhu ku twisisa Bibele naswona ndzi nga tsakela ku yi dyondza na wena ni ndyangu wa wena ekaya ra wena handle ka hakelo kumbe xiboho. Hi nga tirhisa Bibele ya wena. Loko u nga ri na yona, ndzi nga ku kumela yona.”

3 Ku vula kun’wana loku kongomeke ku nga ha va loku nge: “Xikongomelo xa mina xa ku endza namuntlha i ku khutaza dyondzo ya le kaya ya Bibele, leyi nga ta ku pfuna ku twisisa leswaku misava leyi yi kongome kwihi ni leswi Xikwembu xi hi hlayiseleke swona. Ndzi nga tsakela ku ku kombisa ndlela leyi u nga pfunekaka ha yona eBibeleni ya wena. Wena a wu swi endli xiboho kumbe ku hakela.” Loko n’wini wa muti a pfumela, u nga ha tirhisa xiphephana lexi nge Vutomi eMisaveni Leyintshwa Ya Ku Rhula kumbe buku leyi nge Hanya Hi Masiku, kumbexana mi sungula eka tluka 10, ndzimana 11. Xihlokwana lexi xi kombisa xitshembiso xa Yehova xo kondletela Paradeyisi.

4 Tirhisa Swiphephana Swa Bibele: Vo tala va kume swiphephana swi pfuna loko va vula hi ku kongoma. Loko n’wini wa muti a pfula nyangwa, n’wi nyike xiphephana lexi nge Vutomi eMisaveni Leyintshwa Ya Ku Rhula xi phurumukile leswaku a ta kota ku vona xifaniso lexi heleleke. Khoma xiphephana xin’wana, ivi u hlaya kumbe u tlakusa swivutiso eka tindzimana timbirhi to sungula hi marito ya wena. Hlamusela tinhlamulo, ivi u hlaya tsalwa rin’we kumbe mambirhi lama seketelaka. Kutani boxa leswaku u tsakele bulo, ivi u hlela ku tlhela u vuya. Hlamusela nongonoko wa hina wa dyondzo ya le kaya ya Bibele ya mahala hi ku komisa, loko swi fanerile, kumbe hi ku olova u hlela ku tlhela u vuya mi ta kambisisa yinhla yin’wana exiphephanini.

5 Loko u hlelela ku tlhelela, i swinene ku boxa xo karhi lexi u vonaka leswaku xi ta tsakisa n’wini wa muti. Xi nga ha va xivutiso. Xi ta siya n’wini wa muti a langutele riendzo ra wena leri landzelaka laha xivutiso xi nga ta hlamuriwa kona.

6 Buku ya Hanya Hi Masiku i xitirho lexi hlamarisaka ku pfuna lava honisaka leswi swikongomelo swa Xikwembu swi nga swona ni leswi xi swi lavaka. Yi dyondzisa leswaku swilaveko swa Xikwembu swi katsa ku yingisa milawu ya xona, ku hlanganyela ni xitirhisiwa kumbe nhlengeletano ya xona ni ku yimela Mfumo wa xona hi vutshembeki eka van’wana xisweswo munhu a twananisa vutomi bya yena ni swilaveko swa mahanyelo leswi andlariweke eBibeleni. Yi nyika vanhu vutivi bya Yehova Xikwembu, Yesu Kriste, swikongomelo swa Xikwembu malunghana ni misava ni xiphemu xa Kriste tanihi Hosi leyintshwa ya misava. Swifaniso leswi nga eka ndzima 19 swi ta koka nyingiso wa vanhu va timbilu letinene, swi pfuxa ku tsakela Bibele ni swikongomelo swa Yehova. Kutani ke, hinkwerhu ka hina a hi tirhiseni nkarhi wun’wana ni wun’wana kahle leswaku hi sungula tidyondzo ni ku hlanganyela entirhweni wo “endla vadyondzisiwa.”—Mat. 24:14; 28:19, 20; Marka 13:10.