Ku Sungula Tidyondzo Ta Le Kaya Ta Bibele

¹ Wun’wana wa mintokoto leyi vuyerisaka ni leyi enerisaka swinene eka Vakreste va ntiyiso i ku dyondzisa munhu ntiyiso hi dyondzo ya le kaya ya Bibele. Kambe, van’wana swi nga ha endleka va nga xi endli xiyenge lexi xa vutirheli hi ku va va vona onge a va nge swi koti ku sungula ni ku fambisa dyondzo ya Bibele. Vahuweleri ni maphayona yo tala lamanene ma tshama ma titwa hi ndlela yoleyo. Hambi swi ri tano, hi ku tshembela eka Yehovha ni ku tirhisa swiringanyeto leswi humaka eka Vutirheli Bya Hina Bya Mfumo, va dyondze ndlela yo sungula tidyondzo ta Bibele ni ku ti fambisa, naswona va engetele ntsako wa vona evutirhelini. Na wena u nga ha va ni pakani yoleyo.

² Ku Tirhisa Ndlela Leyi Kongomeke Ni Swiphephana: Yin’wana ya tindlela to olova ta ku sungula dyondzo i ku tirhisa ndlela leyi kongomeke. Lexi xi laviwaka hi vanhu van’wana i ku va rhambela dyondzo ya Bibele hi mukhuva lowunene. Leswi swi nga ha endliwa hi ku vutisa n’wini wa muti u ku: “Xana u nga swi tsakela ku va ni dyondzo ya wena ya le kaya ya Bibele leswaku u kurisa vutivi bya wena bya Bibele ni xikongomelo xa Xikwembu hi misava leyi?” Kumbe u nga ha byela n’wini wa muti leswaku u nga tsakela ku n’wi komba ndlela leyi dyondzo ya le kaya ya Bibele yi fambisiwaka ha yona. Hambi loko vo tala va ta ala nyiko leyi, ehleketa leswaku u nga tsaka njhani loko wo kuma loyi a yi amukelaka!

³ Ndlela yin’wana ya ku sungula dyondzo ya Bibele i ku tirhisa xin’wana xa swiphephana swa hina. Hambi leswi swi nga switsongo hi mpimo, swi ni rungula ra matimba, leri khorwisaka. Dyondzo yi nga sungurisiwa ku yini hi xiphephana? Hi ku nyika n’wini wa muti xiphephana lexi u vonaka leswaku xi ta n’wi tsakisa. Kutani, wena u kombela n’wini wa muti leswaku a hlaya ndzimana yo sungula na wena. U pfula matsalwa lama kombisiweke kutani u hlamusela leswaku ma tirha njhani emhakeni leyi. Eka riendzo ro sungula, mi nga ha hlaya ndzimana yin’we kumbe timbirhi. Loko n’wini wa muti se a swi vona leswaku u dyondza swilo swo tsakisa eBibeleni, u nga ha kota ku engetela nkarhi lowu mi wu hetaka eka mabulo ya n’wina.

⁴ Ku Tirhisa Bibele Ntsena: Nkarhi wun’wana munhu u pfumela ku bula hi Bibele kambe a nga swi lavi kahle ku amukela dyondzo kumbe ku tirhisa tibuku ta hina. U nga ha sungula dyondzo ya Bibele u tlhela u yi fambisa hi ku lunghiselela mabulo lama tsakisaka ya Matsalwa lama humaka eka swiyenge swa buku leyi nge Hanya Hi Masiku kumbe buku leyi nge Reasoning, kambe loko se u endzela munhu la tsakelaka u tirhisa Bibele ntsena. Mabulo wolawo ma nga ha teka timinete ta 15 kumbe 20, hambi ku tlula kwalaho, hi ku ya hi swiyimo swa kona. Loko swi endliwa nkarhi na nkarhi ni hi ndlela leyi yaka emahlweni ya ku dyondzisa ntiyiso wa Bibele, u sungule dyondzo ya Bibele hi ndlela yoleyo, kutani u nga yi vika. Loko nkarhi se wu fikile, u nga n’wi komba buku leyi nge Hanya Hi Masiku, u sungula dyondzo ya xiviri hi yona.

⁵ Ku tlula ku kuma nkarhi lowunene wa ntirho wa nsimu, xana u ringetile ku sungula tidyondzo ta Bibele ni vaakelani, vanghana kumbe swirho swa ndyangu? Xana u swi endle khale? Xana u tlhele u swi ringeta sweswi? Loko ndlela yo karhi yi nga humelelanga, xana u yi ringetile yin’wana?

⁶ U nga humelela hi ku sungula tidyondzo loko u tirhisa swiringanyeto leswi nyikiwaka, u phikelela entirhweni wa nsimu naswona u tshembela eka Yehovha leswaku a ku katekisa. U nga tshuki u langutela ehansi matimba ya ntiyiso ni mpfuno lowu nyikiwaka hi Yehovha. Onge u nga engetela ntsako wa wena evutirhelini hi ku sungula ni ku fambisa tidyondzo ta le kaya ta Bibele.