Ku Twarisa Mahungu Lamanene Hi Ku Nyikela Tidyondzo Ta Le Kaya Ta Bibele

1 Xiengetelo xa Vutirheli Bya Hina Bya Mfumo bya August 1991 xi hi tsundzuxe vutihlamuleri bya hina byo byala ni ku cheleta eka magoza yo endla vadyondzisiwa va Kriste. Xi hi kombise leswaku hi fanele hi susumeteleka ku fambisa tidyondzo ta Bibele hikwalaho ka leswi hi rhandzaka vanhu lava amukelaka rungula ra Mfumo. Ku nyikela tidyondzo ta le kaya ta Bibele swi ta hi pfuna hi hetisisa ntirho wa hina wo endla vadyondzisiwa.—Mat. 28:19, 20.

2 I swinene ku vona leswaku vo tala va hina va sungurile ku tirhisa xikhutazo lexinene lexi nyikeriweke. Swiviko swi kombisa leswaku tidyondzo ta Bibele leti engetelekeke ta karhi ta fambisiwa. Nhlayo ya tidyondzo ta Bibele leti vikiwaka eAfrika Dzonga yi engetelekile hi tiphesente ta kwalomu ka 6 hi 1991, ku tlula lembe ra ntirho ra 1990. Entiyisweni lava va sunguleke ku fambisa tidyondzo ro sungula va tsakisiwa hi xiphemu lexi va nga na xona entirhweni wo endla vadyondzisiwa. Kambe xana lava engetelekeke va nga hlanganyerisa ku yini eka xivumbeko lexi xi vuyerisaka xa vutirheli bya hina?

3 Tirhisa Nyiko Ya N’hweti: November i n’hweti leyi fanelekaka swinene yo lava ku sungula tidyondzo letintshwa ta Bibele. Hi ta va hi fambisa buku leyi nge Bibele—I Rito Ra Xikwembu Kumbe I Ra Munhu? Ndlela leyinene yo engetela ku tsakela ka n’wini wa muti i ku tirhisa swiringanyeto leswi kumekaka ebukwini leyi nge Reasoning.

4 Hi nga nyikela Bibele hi ku tirhisa swingheniso leswi ringanyetiweke eka tluka 10 ra buku leyi nge Reasoning. Ku na tindlela ta ntlhanu to hambana-hambana leti xaxametiweke to yisa nyingiso eBibeleni. Ku khutaza vanhu ku lava tinhlamulo ta Bibele eka swivutiso swa vutomi ku nga ha pfula ndlela ya dyondzo ya Bibele.

5 Ehansi ka xihlokwana lexi nge “Home Bible Study” eka tluka 12 ra buku leyi nge Reasoning, ku na swiringanyeto swimbirhi leswi swi nga tirhaka ku yisa nyingiso ebukwini leyi nge Rito Ra Xikwembu. Ha swimbirhi swi khutaza ku tirhisa buku hi ndlela ya dyondzo leyi hlelekeke. Loko u tirhisa xingheniso lexi kongomeke ku sungula dyondzo ya Bibele, u nga landzela swiringanyeto leswinene leswi nga eka Vutirheli Bya Hina Bya Mfumo bya September 1991.

6 Tshemba Yehova: Leswaku hi humelela entirhweni wa dyondzo ya Bibele, hi fanele hi tsundzuka leswaku ku humelela eku endleni ka tidyondzo ta le kaya ta Bibele ku nga endliwa ntsena hi ku pfuniwa hi Yehova. U endla xiphemu xa nkoka eka matshalatshala ya hina yo pfuna vanhu. (1 Vakor. 3:6) Hikwalaho, hi fanele hi khongelela ni nhluvuko lowu endliwaka hi vanhu lava tsakelaka lava hi va kumeke, ku nga ri ku kuma munhu wo dyondza na yena ntsena. (Yoh. 16:23) Hi fanele hi tsundzuka leswaku hina hi “vatirhi-kuloni eka Xikwembu.”—1 Vakor. 3:9.