Siku Ro Hlawuleka Ro Sungula Tidyondzo Ta Bibele

¹ Ku sukela hi January, vandlha rin’wana ni rin’wana ri ta tivekela mahelo-vhiki man’we n’hweti yin’wana ni yin’wana, kumbexana hi vhiki ro sungula leswaku ri tiyimisela ku ya sungula tidyondzo ta Bibele. Leswi swi ta endliwa hi Mugqivela kumbe hi Sonto, hi ku ya hi swiyimo swa vandlha. Loko vini va miti va nga yi amukeli, vahuweleri va nga ha fambisa buku leyi nge Leswi Bibele Yi Swi Dyondzisaka kumbe timagazini leta ha ku humaka. Vakulu ni malandza ya vutirheli hinkwavo va fanele va hlela leswaku va ta hlanganyela hi xitalo eka lunghiselelo leri ni ku pfuna vahuweleri leswaku va sungula tidyondzo ta Bibele.

² Komiti ya Ntirho ya Vandlha yi ta hlawula leswaku hi rihi siku leri nga ta vekeriwa ku ya sungula tidyondzo ta Bibele. Nkarhi na nkarhi va fanele va tsundzuxa vahuweleri leswaku va ti lunghiselela ni ku endla matshalatshala yo hlawuleka leswaku va sungula tidyondzo ta Bibele eka riendzo ro sungula niloko va tlhelela eka vanhu lava kombiseke ku tsakela.

³ Ndlela Yo Lunghiselela: Eka xiengetelo xa Vutirheli Bya Hina Bya Mfumo bya January 2006 ni le bukwini leyi nge Ku Hlamulana eka tluka 10 hi nga kuma swiringanyeto swo sungula tidyondzo ta Bibele. Van’wana va nga ha hlawula ku tirhisa xiphephana xo tanihi lexi nge Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? Nakambe eka Vutirheli Bya Hina Bya Mfumo bya August 2007, tluka 3 ku ni swiringanyeto swo sungula tidyondzo ta Bibele loko hi endzela vanhu lava hi nga va siyela timagazini eka riendzo ro sungula. Vakulu ni malandza ya vutirheli va ta averiwa ku fambisa nhlangano wa nsimu lowu nga ta teka khume ku ya eka 15 wa timinete, naswona eka nhlangano wolowo va fanele va hlamusela va tlhela va endla nkombiso wun’we kumbe yimbirhi yo sungula tidyondzo ta Bibele.

⁴ I ntiyiso leswaku a hi vanhu hinkwavo lava nga ta amukela dyondzo ya Bibele kumbe va ya emahlweni va dyondza. Leswi a swi fanelanga swi hi heta matimba, tanihi leswi ku nga Yehovha la kokaka vanhu lava fanaka ni tinyimpfu leswaku va nghena enhlengeletanweni yakwe. (Yoh. 6:44) Vutihlamuleri bya hina i ku byala mbewu ya ntiyiso ni ku tlhela hi yi hlakulela ni ku yi cheleta leswaku yi ta mila, naswona sweswo swi katsa ku dyondza Bibele ni vanhu va timbilu letinene. Loko hi endla tano, hi tikombisa hi ri vatirhi-kulobye ni Xikwembu.—1 Kor. 3:9.