Xana Wa Wu Tlangela Nkoka Wa Yona?

1 Ku sukela loko yi humesiwile hi 1978, Buku Yanga Ya Timhaka Ta Bibele yi tikombe yi ri mpfuno wa nkoka swinene eka vatswari ni vantshwa. Eka rhavi ra hina ntsena tikopi ta 627 846 ti humesiwile leswaku ti hangalasiwa. Vatswari va yi tirhise hi laha ku humelelaka swinene eku dyondziseni ka vana va vona, naswona vantshwa va hina vo tala va kombise ku hiseka lokukulu swinene ku dyondza leswi nga endzeni ka yona.

2 Sweswinyana, mutswari un’wana u tsarile: “Loko a nga si va ni malembe mambirhi, mufana wa hina Vaughan u nyanyuriwile swinene hi buku ya timhaka ta Bibele. U rhandze swifaniso swa yona naswona a a ala ku ya eku etleleni loko a nga si hlayeriwa mhaka ya yona. Loko a ri na kwalomu ka malembe mambirhi ni hafu, u sungule ku yingisela timhaka ta yona eka thepi. U dyondze ku nghenisa ni ku hundzuluxa tikhasete hi yexe. Siku hinkwaro a yingisela timhaka leti hi ku phindha-phindha, hakanyingi a langutisa swifaniso ebukwini ya yena. Sweswi, a ri na malembe ya mune, u tiva timhaka hinkwato. Tindzimana to tala u ti tiva hi mbilu. Nakambe u tsakela ku hlamusela swifaniso eka makwavo wa yena wa xisati lontsongo wa tin’hweti ta khume-nhungu loyi a tsakelaka buku yakwe hi laha ku fanaka.”

3 I nkucetelo wihi lowu dyondzo leyi hinkwayo wu veke na yona eka mianakanyo leyi leyintsongo? Tata wa yena u ri: “Loko mimphikamakaneta yi tlakuka etimhakeni to tanihi ku hemba, ku nga yingisi ni swin’wana, Vaughan u kombiwa dyondzo leyi vulavulaka hi nsinya wa nawu lowu katsekaka ivi a twisisa mhaka hi nkarhi wolowo. Naswona sweswi eswikhongelweni swakwe, u sungule ku nkhensa Yehova hi ku rhumela Yesu emisaveni.”

4 Wena hi wexe swi nga ha endleka u nga ri na yena n’wana lontsongo. Kambe u nga ha swi kota ku tirhisana ni vantshwa ebandlheni. Vantshwa va Vakriste va khutaziwa ni ku susumeteleka loko malandza lama hlawuriweke ebandlheni ma kombisa ku va tsakela. (Swiv. 27:23) Xana u nga heta nkarhi lowu engetelekeke ni vantshwa, ngopfu-ngopfu entirhweni wa nsimu?

5 Ku nyikela buku ya Timhaka Ta Bibele: Hi n’hweti ya December, hi ta va hi nyikela Buku Yanga Ya Timhaka Ta Bibele. Tanihi leswi ku nga buku leyi tsakisaka vantshwa ni lavakulu hi ku fanana, hi tsakela ku khutaza un’wana ni un’wana ebandlheni ku heta nkarhi wo tala hi laha swi nga kotekaka ha kona ensin’wini a nyikela nyiko leyi.

6 N’wina lavantshwa ha mi khutaza leswaku mi endla matshalatshala lama hlawulekeke hi December yo nyikela buku leyi eka vadyondzi-kuloni, masiku ya xikolo yo wisa ma nga si sungula, ni ku famba ni vatswari va n’wina ni van’wana va le bandlheni ensin’wini.

7 Minkarhi yin’wana vana va lava xikhutazo xintsongo ntsena leswaku va teka goza ro avelana mahungu lamanene ni van’wana. Leswi swi voniwile eka ntokoto wa xifanyetana xa malembe ya ntlhanu hi vukhale le vupela-dyambu bya Kenya, lexi phofuleke ku tsakela ka xona ku va phayona leri hlawulekeke. Mana wa xona u xi byele leswaku hambi ku ri ku va phayona ra nkarhi hinkwawo a xi nge vi rona hi mhaka ya leswi a a xi nga ri na yona dyondzo ya Bibele. Mana wa xona u ringanyete leswaku xi dyondzisa lava xi tlangaka na vona hi kopi ya xona ya Buku Yanga Ya Timhaka Ta Bibele. Xifanyetana lexi xa malembe ya ntlhanu hi vukhale xi teke buku ya xona ya Timhaka Ta Bibele ivi xi famba xi endzela vanghana va xona, xi va rhamba leswaku va ta dyondza Bibele na xona. Vuyelo byi ve byihi? Xi vumbe ntlawa wa vanhu va khume lowu a a xi ta dyondza na wona. Xi tirhise swifaniso, hi vukheta xi vutisa swivutiso leswi enteke ivi xi vutisa swivutiso swa mpfuxeto eku heteleleni ka dyondzo. Loko va nga ha swi tsundzuki, a xi tlhela xi kambisisa mhaka na vona. Manana u hlamusele leswaku a a swi tsakisa hakunene ku vona vana lava hinkwavo va tshamile ehansi emahlweni ka yindlu yakwe va dyondza swin’we! A a ku ri ntsako lowu engetelekeke eka manana swin’we ni le ka bandlha, ku vona nhungu wa vana lava va va kona eminhlanganweni ya bandlha. Lavan’wana vambirhi a va ha ri vantsongo swinene.

8 Vatswari, kambisisani timhaka leti ringanyetiwaka swin’we ni vana va n’wina. Va pfuneni va tirhisa matsalwa lama nga eka Nhloko-mhaka Ya Mbulavurisano. Kombani vantshwa ndlela yo hlayisa tirhekhodo letinene ta yindlu na yindlu leswaku va swi kota ku endla maendzo yo vuyela eka lava tsakelaka. Va pfuneni va sungula tidyondzo ta Bibele hi buku naswona loko swi laveka, va pfuneni loko va swi kotile ku yi sungula.

9 Onge ku tlangela ka hina buku leyi leyinene ku nga hi susumetela leswaku hi yi nyikela nkarhi wun’wana ni wun’wana ni ku yi tirhisa ku sungula tidyondzo ta le kaya ta Bibele leti engetelekeke hi December.