Ku Gingiriteka Entirhweni Wa Yehova

1 Hakunene hi na lunghelo ro tirhela Yehova. Loko hi nghenise vutivi lebyi kongomeke ha yena ni N’wana wakwe la nga swakwe, Yesu, hi susumetiwa hi rirhandzu leswaku hi tinyiketela hi xitalo eku endleni ka ku rhandza ka Yena. (Yoh. 17:3) Hi nga ha karhala, kambe Yehova u hi nyika matimba leswaku hi tala hi ntamu.—Esa. 40:29.

2 Hi nga ri tlangerisa ku yini rirhandzu lerikulu leri Yehova Xikwembu na Yesu Kriste va ri kombiseke eka hina? (2 Vakor. 5:14, 15) Ndlela-nkulu i ku tekelela Yesu, loyi handle ko karhala a nyikeleke vumbhoni hi vito ni Mfumo wa Tata wakwe. (1 Pet. 2:21) Loko hi ri na ripfumelo leri tiyeke, vutomi bya hina byi ta tshama entirhweni lowu humaka eka Xikwembu, wo chumayela mahungu lamanene.—Mat. 24:14.

3 Xana wu kona nkarhi lowu pimiweke lowu hi faneleke hi wu nyikela evutirhelini bya nsimu? Swiyimo swa cinca-cinca. Hi nga ha hikiwa hi ku dyuhala, rihanyo leri tsaneke kumbe vutihlamuleri bya ndyangu. Kambe, hinkwerhu ka hina hi fanele hi tinyiketela eku tirheleni ka hina Yehova. Leswi swi vula leswaku un’wana ni un’wana u fanele a kombisa vuenti bya ku tinyiketela ka yena, ni ku tiya ka ku tinyiketa ka yena, hi ku endla leswi hi nga swi kotaka evutirhelini. (2 Tim. 2:15) Ku na minkarhi leyi pfulekeleke un’wana ni un’wana wa hina hi ku ya hi xiyimo xa hina hi hexe. Yin’wana ya yona hi yihi?

4 Tindlela To Engetela Vutirheli Bya Hina: Xo sungula hi fanele hi tsakela ku antswisa ntikelo wa vutirheli bya hina. Leswi swi nga endliwa hi ku kurisa vutshila lebyi engetelekeke tanihi mudyondzisi. Xin’wana xa swikongomelo-nkulu swa Xikolo xa Vutirheli bya le Tilweni i ku hi pfuna leswaku hi humelela hi laha ku engetelekeke evutirhelini bya nsimu. Xana hi anakanya hi ntirho wa nsimu loko hi lunghiselela swiavelo swa hina? Xana ha yi tirhisa ndzayo leyi hi yi kumaka leswaku hi antswisa vutirheli bya hina hi hexe? (sg matl. 96-9) Hi ku fanana, swiringanyeto swo tala swa vutirheli bya nsimu swa nyikeriwa hi nkarhi wa Nhlangano wa Ntirho. A hi swi tirhiseni hi xihatla hi laha swi kotekaka ha kona.

5 Lexi landzelaka, anakanyisisa hi vuswikoti byo ololoxa swiyimo swa wena leswaku u hlanganyela entirhweni wo phayona nkarhinyana kumbe nkarhi hinkwawo. Entiyisweni, ku endla tano swi ta ku hlayisa u khomekile entirhweni wa Tata wa hina, Yehova. (1 Vakor. 15:58) Ku vuriwa yini hi loko u nga swi koti ku phayona? U nga kombisa moya wa vuphayona hi ku hlakulela ku rhandza vutirheli hi xiviri ni ku khathalela vanhu hi laha ku enteke, ensin’wini. Nakambe u nga tirhisa nkarhi wun’wana ni wun’wana ku pfuna vanhu lavanene ku tiva Yehova ni swikongomelo swakwe leswi tsakisaka, hi ku endla maendzo yo vuyela ni ku fambisa tidyondzo ta Bibele.

6 Ku amukela xirhambo xo tirha laha xilaveko xi nga xikulu kona na swona swi nga va xiphemu xa nhluvuko wa hina. (Esa. 6:8) Lava rhurheleke eka bandlha leri ri lavaka mpfuno wa malandza kumbe leri a a ri lava ku pfuniwa leswaku ri hlanganisa nsimu ya rona, va kume mikateko yo tala hakunene.

7 Loko hi dyondza ntiyiso eku sunguleni, ku rhandza Yehova na Yesu Kriste ku hi susumetele ku endla mindzulamiso leyikulu evuton’wini bya hina. Sweswi, tanihi leswi hi kulaka hi ku twisisa vunghana bya hina ni Tata wa hina wa le tilweni ni leswi N’wana wakwe a hi endleleke swona, xana ku na mindzulamiso leyi hi nga yi endlaka leswaku hi engetela vutirheli bya hina? Onge hinkwerhu ka hina hi nga tinyiketela hi ku tshama hi gingiriteka entirhweni wa Yehova.—Varhoma 12:11.