Video Leyintshwa! Ndlela Yo Yi Tirhisa

1 Hi Musumbunuku ni madyambu, October 8, 1990, mindyangu ya Bethele ya le United States ni le Canada yi yi vonile, naswona a yi nyanyukile swinene hi ku langutela ku yi tirhisa. Mpatswa wa le Bethele wu yi vitane “xin’wana xa swilo leswi khutazaka ni leswi tsakisaka swinene leswi hi tshameke hi swi vona.” Endzhaku ko hlalela video leyi leyintshwa ya timinete ta 55 leyi nge Jehovah’s Witnesses—The Organization Behind the Name, ha tshemba leswaku na n’wina mi ta tsakisiwa hi nkombiso lowu dyondzisaka, wo saseka.

2 Video leyi yi kombisa nhlengeletano ya vanhu lava tinyiketeleke va Yehova, lava hetisisaka xileriso xa Yesu xo chumayela mahungu lamanene ya Mfumo emisaveni hinkwayo. (Mat. 24:14) Hambi leswi ku kombisiwaka ngopfu mintirho ya le Bethele ya le Brooklyn ni Mapurasi ya Watchtower, nkombiso lowunene wa ntirho wa misava hinkwayo wa Timbhoni ta Yehova wa nyikeriwa. Mi ta swi xiya leswaku lowu i nchumu lowu humesiweke hi nawu naswona a wu fanelanga wu humesiwa nakambe.

3 Mi ta tsakela ku tiva leswaku laha Afrika Dzonga video leyi sweswi ya kumeka hi Xinghezi ntsena. Hikwalaho, mi nga ha sungula ku rhumela tiodara ta n’wina hi bandlha ra ka n’wina. Minxavo ya vahuweleri i R45 kasi ya maphayona i R40. Maphayona a ma nge amukeli kopi ya mahala.

4 Endzhaku ko hlalela nongonoko, handle ko kanakana u ta sungula ku anakanya hi vanhu lava u nga ta lava ku va komba wona. Kambe ngopfu-ngopfu i vamani? Ngopfu-ngopfu yi kunguhateriwe ku kombisiwa eka tidyondzo ta le kaya ta Bibele laha nhluvuko lowunene wu endliwaka kona. Hi tsakela leswaku u yi hlalela ni xichudeni, hikuva yi ta endla xisekelo xa mabulo ya nkarhi lowu taka na xona. Loko u swi tsakela, video leyi yi nga lombiwa xichudeni leswaku xi komba van’wana, kumbe xi nga ha tikumela kopi ya xona.

5 Xana u na maxaka lama nga pfumeriki? Ha yini u nga hleli leswaku ma yi vona? Yona yi nga ha va leswi swi lavekaka ku pfuxa bulo hi nhlengeletano ya hina ni tidyondzo ta hina. Nongonoko lowu ngopfu-ngopfu wu ta tsakisa lavantshwa. Hikwalaho ko vona vantshwa van’wana vo tala va tinyiketela ku yisa swilaveko swa Mfumo emahlweni, na vona va nga ha khutazeka ku landzelela vutirheli bya nkarhi hinkwawo.

6 Hi ni ntshembo wa leswaku video leyi leyintshwa yi ta pfuxa ku tlangela ka vanhu vo tala ka nhlengeletano ya Yehova ni leswi yi swi hetisisaka emisaveni hinkwayo.