Rungula Ra Matimba Ra Tivhidiyo Ra Nyikela Vumbhoni
1 “N’wana wa hina wa jaha a a hlalela vhidiyo hambiloko a nga si sungula ku famba. U ti hlalela hi ku phindha-phindha. I swinene swonghasi ku va ni switirho leswi swi endlaka vana va hina va rhandza Yehovha!” Xana hi yihi vhidiyo leyi wansati loyi wa Mukreste a vulavulaka ha yona? Hi leyi nge Noah—He Walked With God. Manana la nga riki mbhoni loyi jaha rakwe ri voneke vhidiyo ya Noah endyangwini wun’wana, u rhumele munyikelo wo ringana R670 erhavini a tlhela a vutisa loko ku ri ni tivhidiyo tin’wana ta vana. Tivhidiyo leti endliweke hi nhlengeletano ya Yehovha ti va khumba swinene vanhu lavakulu ni lavatsongo.
2 Endyangwini: Endzhaku ka loko ndyangu wun’wana wa Timbhoni wu hlalele vhidiyo leyi nge Jehovah’s Witnesses Stand Firm Against Nazi Assault, manana wa muti u hlamuserile a ku: “Ndzi anakanyisise siku hinkwaro hi ndlela leyi Yehovha a pfunaka vanhu lava tolovelekeke hakona leswaku va tiyisela swiyimo leswi nga tolovelekangiki! Ku anakanya hi sweswo swi ndzi endla ndzi vona leswaku swiphiqo leswi ndzi nga na swona a swi nyawuli. Ku hlalela vhidiyo leyi ni vana va hina, swi va pfune leswaku va xi vona kahle xilaveko xo titshega hi Yehovha. Loko hi vulavula na vona ha yona endzhaku, hi pfune vana va hina va vanhwanyana leswaku va hlomela ku langutana ni mintshikilelo swin’we ni minxaniso leyi nga tshukaka yi va fikela.”
3 Exikolweni: Eka xiviko xa yena, n’wana wa kondlo-a-ndzi-dyi la nga Mbhoni u kote ku kombisa tlasi yakwe xiphemu xa vhidiyo leyi nge Stand Firm. Mudyondzisi u tshame a vula leswaku a nga ti lavi Timbhoni. Endzhaku ko hlalela vhidiyo, u te: “Leswi swi yi cincile ndlela leyi a a ndzi titeka ha yona Timbhoni ta Yehovha. Ndza tshembisa leswaku enkarhini lowu taka loko ti ndzi endzela, ndzi ta ti yingisela ni ku sungula ku dyondza na tona Bibele!” I yini lexi cinceke ndlela leyi a a hi languta ha yona? U vule leswaku i “rirhandzu ra hina ra ntiyiso ni ku tshembeka.”
4 Ensin’wini: Makwerhu un’wana waxisati u hlangane ni wansati loyi a a kanakana ku amukela minkandziyiso, hambileswi a a ri ni swivutiso malunghana na hina ni ripfumelo ra hina. Makwerhu loyi wa xisati u tlhele a vuya, a tamele vhidiyo leyi nge Jehovah’s Witnesses—The Organization Behind the Name kutani a yi komba wansati loyi ni nuna wakwe. Havumbirhi bya vona va yi tsakerile swinene naswona va pfumele ku dyondza Bibele. Hikwalaho ka vumbhoni lebyinene lebyi va nyikeriweke byona, va sungule ku twananisa vutomi bya vona ni ku rhandza ka Xikwembu.
5 Xana hi nga ti tirhisa njhani tivhidiyo ta hina hi ndlela leyi humelelaka? Tanihi leswi swi durhaka ku endla tivhidiyo leti, mavandlha man’wana ma tihlayisa eLayiburari ya Holo ya Mfumo kutani va pfumelela vahuweleri leswaku va ti lomba. Vahuweleri a va khutaziwi ku endla swikombelo swa tivhidiyo leti loko va nga ri na yona michini ya tivhidiyo kumbe loko va nga ta ti tirhisa ngopfu.