Dyondzisa Vanhu Hi Ku Tirhisa Tivhidiyo
1. Xana Yehovha u swi tirhise njhani swivono swa xiviri leswaku a dyondzisa malandza ya yena ya khale, naswona swi ve ni vuyelo byihi?
1 Minkarhi yin’wana Yehovha u tirhise swivono ni milorho loko a byela malandza ya yena ya khale rungula ra nkoka. Ezekiyele u vone kalichi ya Yehovha ya le tilweni. (Ezek. 1:1-28) Daniyele u fanele a hlamale ngopfu endzhaku ko lorha norho wa vuprofeta, lowu hlamuselaka mimfumo ya misava. (Dan. 7:1-15, 28) Nakambe muapostola Yohane u kombiwe xivono lexi hlamarisaka xi ri tanihi “swikombiso,” leswi a swi hlavutela leswi nga ta endleka “esikwini ra Hosi!” (Nhlav. 1:1, 10) Yehovha u va dyondzise hi ku tirhisa swivono swa xiviri kutani a va swi rivalanga.
2. I yini lexi hi nga xi tirhisaka ku dyondzisa van’wana mintiyiso ya Bibele?
2 Loko hi lava leswaku vanhu lava hi va dyondzisaka ntiyiso wa Bibele wu dzika eka vona, wu nga rivaleki na hina hi fanele hi tirhisa tivhidiyo. Tivhidiyo ta hina ti hlamusela timhaka to hambana-hambana leti endlaka leswaku vanhu va tshemba Bibele, va tshemba nhlengeletano ya Yehovha ni ku tshemba misinya ya milawu leyi hi endlaka leswaku hi va Vakreste va ntiyiso. Anakanya tindlela ti nga ri tingani leti hi nga ti tirhisaka leswaku tivhidiyo ta hina ti dyondzisa. Hi leswi swikombiso swi nga ri swingani swa tivhidiyo leti hi nga ti tirhisaka.
3. I yini lexi hi nga xi tirhisaka leswaku xichudeni xa Bibele xi ta enhlengeletanweni?
3 Ensin’wini: Xana u tshama u ri karhi u byela xichudeni xa Bibele hi vamakwerhu va misava hinkwayo? Xi kombe vamakwerhu volavo eka vhidiyo leyi nge Our Whole Association of Brothers. U nga ha xi lomba yona leswaku xi sala xi yi hlalela kumbe mi yi hlalela swin’we eka dyondzo leyi landzelaka. Kutani mi bula hi swivutiso leswi kumekaka eka Vutirheli Bya Hina Bya Mfumo bya October 2002.
4. Hi swihi swipfuneto swo dyondzisa leswi muntshwa la nga Mbhoni a nga swi tirhisaka exikolweni?
4 Vantshwa, mi nga ha kombela vadyondzisi va n’wina loko swi nga koteka leswaku mi komba vadyondzi-kuloni vhidiyo leyi nge Jehovah’s Witnesses Stand Firm Against Nazi Assault kumbe leyi nge Faithful Under Trials—Jehovah’s Witnesses in the Soviet Union. Kombela ku ta ni swivutiso leswi u nga ta swi vutisa vadyondzi-kuloni, leswi kumekaka eka Vutirheli Bya Hina Bya Mfumo bya February 2003.
5. I yini lexi vatswari va nga xi tirhisaka edyondzweni ya ndyangu?
5 Eka Swirho Swa Ndyangu Ni Vanghana: Vatswari, a swi kanakanisi leswaku se ku hundze malembe yo hlayanyana ku sukela loko ku humesiwe vhidiyo leyi nge Young People Ask—How Can I Make Real Friends? naswona vana va n’wina se va kulakurile. Swi nga va swinene loko mo tlhela mi yi hlalela swin’we hi nkarhi wa dyondzo ya ndyangu! Vutirheli Bya Hina Bya Mfumo bya April 2002 byi ni swivutiso leswi nga mi pfunaka leswaku mi va ni bulo leri hanyaka ni tinhlamulo leti humaka embilwini.
6. Xana u nga lunghiselela njhani leswaku mi akana ni vamakwenu?
6 Xana ku ni vamakwerhu evandlheni lava a wu navela ku va rhambela ekaya ra wena? Mi nga akana siku rin’wana nimadyambu hi ku hlalela swin’we vhidiyo leyi nge Respect Jehovah’s Authority, ngopfu-ngopfu loko mo pfuxeta leswi mi swi tweke, mi tirhisa swivutiso leswi kumekaka eka Vutirheli Bya Hina Bya Mfumo bya September 2004.
7. Xana u ehleketa leswaku u nga ti tirhisa rini tivhidiyo ta hina?
7 Minkarhi Yin’wana: Hi tihi tindlela tin’wana leti hi nga ti tirhisaka ha tona tivhidiyo ta hina to hambana-hambana ta 20? Xana loko wo ti komba munhu un’we kumbe vambirhi lava u tshamelaka ku va endzela, swi nga va pfuna leswaku va kula hi tlhelo ra moya? Xana u nga kombela ku ti tlanga endhawini yo hlayisa vadyuhari kumbe vanhu lava lamaleke ya le mugangeni wa ka n’wina? Xana tivhidiyo leti ti nga ku pfuna leswaku u xiximiwa hi maxaka lama nga riki Timbhoni swin’we ni vaakelani ni vatirhi-kuloni? Tivhidiyo ta hina ta tsakisa, ta dyondzisa naswona ti pfuna ku dyondzisa vanhu leswi va nga le ku swi voneni. Ti tirhisele ku dyondzisa vanhu.