Tiletele U Ri Ni Xikongomelo Xa Ku Chava Xikwembu

¹ Xikolo Xa Vutirheli Bya Le Tilweni xi ya emahlweni xi hi letela leswaku hi ‘tamela rito ra ntiyiso hi ndlela leyinene.’ (2 Tim. 2:15) Xana u tsarisile eka xona? Loko u nga si tsarisa kambe u faneleka, hikwalaho ka yini u nga vuyeriwi hi lunghiselelo leri lerinene hi ku tsarisa sweswi?

² Yinhla ya nkoka ya xikolo lexi i nongonoko wa vhiki na vhiki wa ku hlaya Bibele. Xiyimiso xa wena xa dyondzo ya munhu hi xiyexe xi fanele xi katsa ku hlaya tindzima leti aviweke eBibeleni leswaku hi ku famba ka nkarhi u va u hlaye Bibele hinkwayo.

³ Ku sukela eka xiyimiso xa xikolo xa 1993, ku hlaya ka Bibele loku hlanganisiwaka hi Nkulumo ya No. 2 ku ta hlayiwa hinkwako handle ko yima-yima eka tindzimana tin’wana. Leswi swi vula leswaku xichudeni lexi nga ni nkulumo leyi xi ta katsa rungula ro hlamusela eka xingheniso xa xona ni le ku heteleleni ntsena. Makwerhu la averiweke tinhla-nkulu ta Bibele u fanele a nga hlamuseli ngopfu eka tinhla leti averiweke Nkulumo ya No. 2 leswaku xivulavuri xa nkulumo yoleyo xi kota ku ndlandlamuxa rungula ra xona loko xi hlaya Bibele.

⁴ Mulanguteri wa xikolo u ta fungha xiphephana xa Speech Counsel xa lava nyikaka Tinkulumo ta No. 2, 3 na 4. A swi bohi leswaku a famba hi ku landzelana ka tinhla ta xiphephana xa ndzayo, kambe a nga nyika ndzayo, leyi kongomeke eka tinhla leti xichudeni xi faneleke ku antswisa eka tona. Xiphephana xa ndzayo xa xivulavuri lexi nyikaka Xiavelo xa No. 1 a xi fanelanga ku funghiwa, hambi leswi ndzayo ya le tlhelweni yi nga ha nyikiwaka loko yi laveka.

⁵ Hinkwavo lava fanelekaka va fanele va ma tirhisa kahle malunghiselelo ya moya lama endliwaka hi Yehovha, ku katsa ni vuleteri lebyi nyikiwaka eXikolweni Xa Vutirheli Bya Le Tilweni. Vuleteri lebyi byi nga yisa eka vutirheli lebyi humesaka mihandzu swinene.—1 Tim. 4:7.