Bokisi Ra Swivutiso

◼ Xana maambalelo lamanene ma nga va wahi loko u ya eku ekhuvuriweni?

 Hambi leswi ndlela ya maambalelo yi hambanaka eswiphen’wini swo tala swa misava, xitsundzuxo xa Bibele xa ku ambala ‘hi ku ringanisela ni hi vutlharhi’ xa fana eka Vakreste hinkwavo, ku nga khathariseki leswaku va tshama kwihi. (1 Tim. 2:⁠9) Nawu lowu wu fanele wu tirhisiwa loko ku langutiwa maambalelo lama fanelaka nkhuvulo.

 Xihondzo xo Rindza xa June 1, 1985, tluka 30, xi nyika ndzayo leyi eka munhu loyi a khuvuriwaka: “Entiyisweni ku ringanisela ku fanele ku va kona eka mpahla yo hlambela leyi tirhisiwaka. Leswi i swa nkoka namuntlha leswi vaendli va tifexeni va lavaka ku kombisa rimbewu ni ku nga ambali nchumu. Mhaka yin’wana leyi nga tsundzukiwaka hi leswaku mpahla yin’wana leyi vonakaka yi languteka loko yi omile a yi tano loko yi tsakama. Ku hava munhu loyi loko a khuvuriwa a nga lavaka ku hambukisa kumbe ku khunguvanyisa van’wana eka xiendlakalo xa nkoka ku fana ni nkhuvulo.​​—⁠⁠Vafilipiya 1:​10.”

 Hi ku pfumelelana ni ndzayo leyi, lava khuvuriwaka va fanele va ambala mpahla leyi langutekaka, va tsundzuka nkoka wa xiendlakalo lexi. Xisweswo, mpahla yo hlambela leyi manyaka kumbe leyi khomaka miri loko yi tsakama, a hi xiambalo lexinene eka Mukreste naswona yi fanele ku papalatiwa. Hi ku fanana, a swi faneleki leswaku munhu a languteka a nga kamanga misisi ni ku va a thyakile. Nakambe, a swi fanelanga ku ambala swikipa leswi nga ni marito ya misava kumbe ya mabindzu.

 Loko vakulu lava averiweke va pfuxeta swivutiso swa nkhuvulo ni loyi a yaka eku khuvuriweni, lowu ku ta va nkarhi lowunene wo bula hi nkoka wa ku ambala kahle. Hi ndlela leyi ku ta hlayisiwa ku hlawuleka ka xiendlakalo, naswona hi ta hambeta hi hambanile ni misava.​​—⁠⁠Ringanisa Yohane 15:⁠19.