N’hweti Yo Hlawuleka Ya Ntirho Wa Nsimu

¹ Xana December yi nga va n’hweti yo hlawuleka ya ntirho wa nsimu eka wena? Swi nga ha lava leswaku u hundzulanyana mintirho ya wena ya siku na siku, kambe xana vuyelo bya kona a byi fanelanga byi swi endla swi faneleka?

² Vahuweleri van’wana lavatsongo lava khuvuriweke va ta kuma masiku lama engetelekeke ya ku wisa exikolweni naswona va nga tsarisa vuphayona bya nkarhinyana n’hweti yoleyo. Vona ndlela leyi va nga tiyaka nhlana ha yona loko va ri ni vakulu, malandza ya vutirheli ni vahuweleri van’wana va tirha na vona ensin’wini! Loko swiyimo swa wena swi nga ku pfumeleli ku phayona n’hweti leyi, xana u nga swi kota ku heta tiawara leti engetelekeke ensin’wini kun’we ni lava phayonaka? Leswi swi ta va xikhutazo hakunene.

³ Nakambe u fanele ku tirhisana na hina leswaku swiviko hinkwaswo swa ntirho wa nsimu swa December swi tisiwa hi nkarhi. Hi ta va ni Mintsombano ya hina ya Muganga ya “Dyondzo Ya Xikwembu” hi December naswona van’wana va hlanganisa nkarhi wa vona wa ku wisa wa lembe ni nkarhi wa ku ya entsombanweni. Loko u ta va u nga ri kona evandlheni ra ka n’wina eku heleni ka December, tiyiseka leswaku u hlanganyela entirhweni wa nsimu eku sunguleni ka n’hweti. Tisa xiviko xa wena xa ntirho wa nsimu u nga si famba u ya eku wiseni kumbe u xi rhumela eka matsalana wa vandlha ka ha ri ni nkarhi leswaku xi hlanganisiwa ni Xiviko xa Vandlha xa n’hweti yoleyo.

⁴ Loko vahuweleri hinkwavo va endla matshalatshala lama engetelekeke, vakulu va ta kota ku hlela ku va ni mintlawa yo nyikela vumbhoni siku na siku hi nkarhi wa tiholideyi leswaku lava va nga ta phayona va hamba va kuma munhu wo tirha na yena entirhweni wa nsimu. Sweswi i nkarhi, wa wena n’wini na wa ndyangu swin’we ni vandlha hinkwaro, leswaku mi hlela ku endla December yi va n’hweti yo hlawuleka ya ntirho wa nsimu evandlheni ra n’wina.