Ku Khathalela Swilaveko Swa Moya Swa Lava Feke Tindleve
1 Nhlayo leyi kulaka ya vanhu lava feke tindleve yi tisiwa eka Murisi Lonene naswona yi va ni vuxaka na Yehovha Xikwembu hi ku tinyiketela. (Yoh. 10:3, 11) Van’wana evandlheni, ngopfu-ngopfu vakulu va fanele va xalamukela swilaveko swa moya swa vamakwerhu va xinuna ni va xisati lava feke tindleve.
2 Ku Enerisa Swilaveko Swa Lava Feke Tindleve: Ku endliwa malunghiselelo ya ku toloka minhlangano ya vandlha hi ririmi ra mavoko loko ku ri ni vatoloki lava swi kotaka. Loko ku ri hava munhu evandlheni loyi a tivaka ririmi ra mavoko, swi nga ha fanela ku yisa vanhu lava feke tindleve eka vandlha ra le kusuhi leri ri endlaka sweswo. Kunene, loko lunghiselelo ro tano ri nga ri kona endhawini ya ka n’wina, swi nga ha koteka ku hlawula vahuweleri leswaku va siyerisana ku tshama ni vanhu lava feke tindleve, va va tsalela tinotsi ta tinhla-nkulu leti ku buriwaka ha tona.
3 Malunghiselelo Ya Xifundzha Ni Ya Vandlha: Malunghiselelo ya ku toloka ririmi ra mavoko etinhlengeletanweni ta xifundzha ni tinhlengeletano ta siku ro hlawuleka ma endliwa hi mulanguteri wa xifundzha. Ku nga ha hlawuriwa nkulu kumbe nandza wa vutirheli leswaku a ma endla. Ku nga ha averiwa vamakwerhu va xinuna ni va xisati lava vekaka xikombiso lexinene leswaku va toloka nongonoko wa nhlengeletano. Ku nga ha endliwa leswi fanaka ni le vandlheni, ku tiyisekisiwa leswaku swilaveko swa lava feke tindleve swa khathaleriwa.
4 Swi nga va swinene leswaku lava feke tindleve va tshamisiwa lomu va nga ta vona vatoloki ni platfomo. Ku fanele ku endliwa swona ni le minhlanganweni ya vandlha ni ya tinhlengeletano ta xifundzha. Eminhlanganweni ya vandlha swi nga antswa leswaku mutoloki a tshama ehansi loko nhlayo ya lava feke tindleve yi ri yitsongo. I swinene leswaku vakulu va vulavurisana ni makwerhu la feke tindleve la wupfeke, loko swi koteka, leswaku a nyika swiringanyeto malunghana ni matshamelo lama faneleke.
5 Loko ku ri ni mutoloki la fanelekaka la nga nkulu kumbe nandza wa vutirheli ni loko nhlayo ya vamakwerhu va xinuna ni va xisati lava feke tindleve yi andzile, vakulu va nga ha boha leswaku minhlangano yin’wana yi fambisiwa hi ririmi ra mavoko. Ku nga rhanga ku hleriwa Dyondzo ya Buku ya Vandlha ya vhiki na vhiki. Loko vandlha ri lava ku khoma minhlangano yin’wana eka leya ntlhanu ya vhiki na vhiki hi ririmi ra mavoko, kumbe hi (ti-)ririmi rin’wana leri nga tirhisiwiki ngopfu, vakulu va fanele va tivisa Sosayiti hi mhaka leyi.
6 Hambi leswi ku vulavurisana exikarhi ka vanhu lava feke tindleve ni lava twaka swi nga ha lavaka matshalatshala yo hlawuleka eka vona, swirho hinkwaswo swa vandlha swi fanele swi tikarhatela ku tolovelana leswaku swi khutazana hi xiviri. (Hev. 10:24) Moya lowu exikarhi ka vamakwerhu wu ta endla vanhu hinkwavo lavantshwa va titwa va amukelekile.