Vantshwa​​—⁠⁠Tsakisani Mbilu Ya Yehovha

¹ Loko muntshwa a tirhisa matimba ni ntamu wa vuntshwa hi ndlela leyinene, vutomi byi nga tsakisa swinene. Solomoni Hosi yo tlhariha u tsarile: “Džaha, ṭakela v̌untŝha bya wena, mbilu ya wena yi ku ṭakisa hi masiku ya vuntŝha bya wena.” (Ekl. 11:⁠9) N’wina vantshwa mi ta tihlamulela eka Xikwembu hi leswi mi swi endlaka.

² Ndlela leyi u hanyaka ha yona i ya nkoka eka wena swin’we ni le ka vatswari va wena. Swivuriso 10:⁠1 yi ri: “Ṅwana l’a tlhariheke o ṭakisa tata wa yena, kambe ṅwana wo hunguka i nhlomulo e ka mana wa yena.” Kambe xa nkoka swinene hi leswaku ndlela leyi u hanyaka ha yona yi khumba Muvumbi wa wena, Yehovha Xikwembu. Hi yona mhaka leyi Swivuriso 27:​11 yi tlhelaka yi khutaza vantshwa yi ku: “Ṅwana nga, tlhariha, u ṭakisa mbilu ya mina, nḍi ta kuma rito e ku hlamula la’v̌a nḍi rukanaka.” Xana n’wina vantshwa mi nga yi tsakisisa ku yini mbilu ya Yehovha namuntlha? Leswi swi nga endliwa hi tindlela to tala.

³ Hi Ku Veka Xikombiso Lexinene: N’wina vantshwa mi langutana ni “mikari yo nonoṅhwa” leyi vhumbhiweke eRitweni ra Xikwembu. (2 Tim. 3:⁠1) Nkarhi wun’wana mi nga ha tshikileriwa hi vadyondzi-kuloni lava nga riki vapfumeri hambi ku ri vadyondzisi lava va nga mi poyilaka hikwalaho ka mavonelo ya n’wina lama sekeriweke eBibeleni. Hi xikombiso, mudyondzisi un’wana u tshame a vula leswaku dyondzo ya hundzuluko i ntiyiso kambe Bibele i ntsheketo. Hambi swi ri tano, muhuweleri lontshwa wa le tlilasini yoleyo u seketele Bibele hi ku tshembeka. Hikwalaho ka sweswo, u sungule tidyondzo ta Bibele to hlayanyana. Van’wana lava tsakelaka va sungule ku va kona eminhlanganweni. Ripfumelo ra n’wina vamakwerhu lavantshwa va xinuna ni va xisati ri cukumeta misava leyi nga xi chaviki Xikwembu ivi ri koka vanhu va timbilu letinene va ta entiyisweni.​​—⁠⁠Ringanisa Vaheveru 11:⁠7.

⁴ Xana u nga khutaza tintangha ta wena evandlheni leswaku ti nga amukeli leswo biha? Hi ku veka xikombiso lexinene exikolweni, ekaya ni le vandlheni, u nga tiyisa ripfumelo ra vahuweleri van’wana lavatsongo. (Rhom. 1:​12) Tsakisa mbilu ya Yehovha hi ku vekela van’wana xikombiso lexinene.

⁵ Hi Maambalelo Ni Ku Tilunghisa: Makwerhu un’wana wa xisati lontsongo u hlekuriwile a tlhela a sandziwa hikwalaho ka maambalelo yakwe lamanene naswona a va n’wi thye ni vito va ku i “n’waswakwe.” Leswi a swi n’wi chavisanga lerova a teka tindlela ta misava ta ku nga chavi Xikwembu. Ematshan’wini ya sweswo u hlamusele leswaku yena i un’wana wa Timbhoni ta Yehovha ni leswaku u hlayisa mpimanyeto lowu tlakukeke wa Timbhoni. Xana u ni xivindzi xo tano? Kumbe xana u pfumelela misava ya Sathana yi ku endla u ehleketa ni ku tikhoma ku fana na yona? A hi ku tsakisa ka swona ku vona vunyingi bya n’wina vantshwa mi yingisa dyondzo ya Yehovha kutani mi fularhela maambalelo lama nga langutekiki, tifexeni, swifaniso ni tidyondzo ta misava. Kunene, hi fanele ku lemuka leswaku swilo leswi humaka emisaveni swi kuceteriwa hi mademona!​​—⁠⁠1 Tim. 4:⁠1.

⁶ Hi Ku Hlawula Mintlango Ni Vuhungasi: Vatswari va fanele ku tsundzuka xilaveko xa ku pfuna vana va vona leswaku va hlawula mintlango ni vuhungasi bya vona hi vutlharhi. Makwerhu un’wana u bumabumele ndyangu lowunene lowu a wu rhandzeke ngopfu. Hi mhaka ya leswi a va ehleketa hi swilo swa moya, vatswari va nyike nkongomiso lowu wu ngheneke ni le ka vuhungasi bya ndyangu. Makwerhu loyi u te: ‘Ndza navela loko va endla swilo swin’we. Vatswari va pfuna vana va lunghiselela nsimu, ni loko ku ri nkarhi wa vuhungasi, va tlhela va tiphina hi ku famba-famba va tiolola, va endzela timuziyamu, kumbe va titshamela ekaya, va tlanga ni ku endla mintirho. Ku rhandzana ka vona ni ku rhandza vanhu van’wana swi ku endla u tiyiseka leswaku va ta famba entiyisweni enkarhini lowu taka, hambi ko endleka yini.’

⁷ Kunene, ku ni minkarhi leyi swi nga kotekiki leswaku ndyangu hinkwawo wu hungasa ni ku tlanga swin’we. N’wina vantshwa mi fanele ku xiya leswi, ni nkoka wa ku hlawula ndlela leyi mi nga ta heta nkarhi wa n’wina wa ku titsakisa. Sathana u tiyimisele ku hambukisa vanhu vo tala hi laha a nga kotaka ha kona. Vantshwa ni lava nga riki na ntokoto hi vona ngopfu-ngopfu lava va nga phasiwaka hi mano yakwe ni nhlohlotelo wakwe. (2 Kor. 11:⁠3; Ef. 6:​11) Kutani namuntlha Sathana u tirhisa tindlela to tala leswaku a ku xisa ivi u landzela vutomi bya ku lava ku titsakisa ni swilo swo biha.

⁸ Thelevhixini i mukanganyisi lonkulu la hlohlotelaka mahanyelo ya ku rhandza swilo leswi vonakaka ni lama thyakeke. Tibayiskopo ni tivhidiyo nkarhi hinkwawo ti kombisa madzolonga ni rimbewu leri thyakeke. Vuyimbeleri lebyi dumeke byi ni marito yo tlhava ni nhlambha. Mano ya Sathana ma nga ha vonaka ma ri manene, kambe ma phase magidi ya vantshwa va Vakreste, va va ni miehleketo ni mahanyelo yo biha. Leswaku u papalata mintshikilelo yo tano, u fanele ku landzelela ku lulama hi matimba. (2 Tim. 2:​22) Loko u fanele ku lulamisa miehleketo kumbe mahanyelo ya wena malunghana ni mintlango kumbe vuhungasi, xana leswi u nga swi endlisa ku yini? Mupisalema u nyika nhlamulo: “Nḍi ku lav̌a hi mbilu ya mina hikwayo: u nga nḍi ṭhiki nḍi hambuka ku lerisa ka wena!”​​—⁠⁠Ps. 119:⁠10.

⁹ Ku gandzela mintlango ni vuhungasi swi andzile. Ku chava Yehovha swi ta ku pfuna leswaku u nga gandzeli vanhu lava nga hetisekangiki. Hambi ku ri vunghwavava byi gandzeriwa hi vanhu vo tala namuntlha. U nga hambana ni mboyamelo lowu hi ku papalata swifaniso swa vanhu lava nga ambalangiki ni vuyimbeleri lebyi thyakisaka. Malunghana ni vuyimbeleri, nkandziyiso wa Xihondzo xo Rindza wa April 15, 1993 wu te: “Vuyimbeleri i nyiko leyi humaka eka Xikwembu. Kambe, eka vo tala byi hundzuka nchumu lowu nga riki wunene eka rihanyo ra vona. . . . Swi endle pakani ya wena ku hlayisa vuyimbeleri byi ri endhawini ya byona kutani ntirho wa Yehovha wu va nchumu lowukulu eka wena. Byi hlawule kahle naswona u va ni vukheta hi vuyimbeleri bya wena. Xisweswo u ta kota ku yi tirhisa kahle​​—⁠⁠ematshan’weni yo yi tirhisa hi ndlela yo biha⁠​—⁠​nyiko leyi yi humaka eka Xikwembu.”

¹⁰ Nyenya swilo swo biha hi laha ku heleleke. (Ps. 97:​10) Loko u ringiwa leswaku u endla swilo swo biha, ehleketa ndlela leyi Yehovha a yi langutaka ha yona mhaka yoleyo, ivi u ehleketa vuyelo bya kona: tinyimba leti nga lavekiki, vuvabyi lebyi tlulelaka hi rimbewu, ku karhateka emoyeni, ku lahlekeriwa hi xindzhuti, ni ku heleriwa hi malunghelo evandlheni. U nga tshuki u tshamela minkombiso ya TV, tibayiskopo, tivhidiyo, tinsimu kumbe mabulo lama khutazaka vubihi. U nga tshuki u hlanganyela ni lava Bibele yi nge i “ŝihunguki.” (Swiv. 13:​19) Hlawula kahle; hlawula vanghana lava nga evandlheni lava rhandzaka Yehovha ni mimpimanyeto ya yena yo lulama.

¹¹ Ina, vantshwa lava lavaka ku tsakisa mbilu ya Yehovha hakunene va ta yingisa ndzayo leyinene leyi kumekaka eka Vaefesa 5:​15, 16: “Tilanguteleni leŝaku mi famba hi ku tianakanya, mi nga v̌i tani hi la’v̌a nga riki na mano, kambe mi v̌a v̌anhu la’v̌a tlhariheke; hatliselani mikari, hikuv̌a masiku ma bihile.” I yini lexi nga ta ku pfuna ku ‘langutisisa’ nhluvuko wa wena eka masiku lawa ya makumu?

¹² Ku Khathalela Swilaveko Swa Moya: Eka Matewu 5:⁠3 (NW), Yesu u hlamuserile: “Ku katekile lava khathalelaka xilaveko xa vona xa moya.” Na wena u nga tsaka loko u khathalela xilaveko xa wena xa moya. Ku eneta xilaveko xexo swi katsa ku hlanganyela hi ku hiseka eku chumayeleni ka mahungu lamanene, tanihi leswi sweswo swi akaka ripfumelo ra hina eka leswi hi swi dyondzaka.​​—⁠⁠Rhom. 10:⁠17.

¹³ Hi ntokoto wa wena n’wini wa swi tiva leswaku minkarhi yin’wana a swi olovi ku hamba u hlanganyela evutirhelini. Ngopfu-ngopfu swi nga ha va swi vangiwa hi ku pfumala xivindzi. Xisweswo, u fanele ku tiyimisela hi ntamu. Loko u hlanganyela evutirhelini nkarhi na nkarhi, u ta antswisa vuswikoti bya wena byo nyikela vumbhoni kutani u tshemba vuswikoti bya wena byo chumayela.

¹⁴ Endla malunghiselelo yo tirha ni vahuweleri lava nga ni ntokoto evandlheni, tanihi maphayona ya nkarhi hinkwawo ni vakulu. Yingiserisisa marungula ya vona ni ndlela leyi va hlamulaka minkaneto ha yona etindlwini. Tirhisa buku leyi nge Reasoning hi ndlela leyinene ni swiringanyeto leswi nyikeriwaka eka Vutirheli Bya Hina Bya Mfumo. Ku nga ri khale u ta kuma ntsako lowukulu evutirhelini hikwalaho ka leswi u tinyikelaka eka Yehovha.​​—⁠⁠Mint. 20:⁠35.

¹⁵ Van’wana va tirhisa minkarhi yo nyikela vumbhoni exikolweni naswona va humelerile swinene eku endleni ka vadyondzisiwa. (Mt. 28:​19, 20) Muntshwa un’wana wa Mukreste u ri: “Hi nkarhi lowu ku nga dyondziwiki nchumu etlilasini, ndzi kume nkarhi wo tala wo nyikela vumbhoni, ngopfu-ngopfu hi minkarhi ya tiholideyi. Loko ndzi siye tibuku ta Bibele edeskini ranga laha van’wana va ti vonaka kona, swichudeni swo tala leswi tsakelaka swi te eka mina.” Eku heteleleni, swichudeni swo tala kun’we ni mudyondzisi va sungule ku va kona eminhlanganweni ya Vukreste. Kahle-kahle, mudyondzisi u endle nhluvuko, ku fikela laha a vaka Mbhoni leyi tinyiketeleke. Yehovha wa tsaka swinene loko vagandzeri lavantshwa vo fana na wena va dzunisa vito rakwe.

¹⁶ Ndlela yin’wana ya ku enerisa xilaveko xa wena xa moya i ya dyondzo ya wena n’wini. Leswaku hi tsakisa mbilu ya Yehovha, hi fanele hi tiva yena, swikongomelo swakwe, ni leswi a swi lavaka eka hina. Xana wa tivekela nkarhi wa dyondzo ya wena n’wini? Xana u dyondza nkarhi hinkwawo, tanihi leswi u tinyikaka nkarhi wa ku dya nkarhi hinkwawo? (Yoh. 17:⁠3) Xana u ni xiyimiso xa ku hlaya Bibele kun’we ni ku fambisana ni ku hlaya ka Bibele ka Xikolo xa Vutirheli bya le Tilweni? Xana u yi lunghiselela kahle minhlangano hinkwayo? Xana u hlaya magazini wa Xihondzo xo Rindza ni Xalamuka! nkarhi hinkwawo? Xa nkoka ngopfu, xana wa tinyika nkarhi wa ku hlaya xihloko xin’wana ni xin’wana eka nongonoko wa “Vantshwa Va Vutisa . . . ” u languta matsalwa hinkwawo hi vukheta? Naswona u nga rivali buku leyi Sosayiti yi yi kunguhateleke swilaveko swa wena swa moya, Swivutiso Leswi Vantshwa Va Swi Vutisaka​​—⁠⁠Tinhlamulo Leti Tirhaka. Vantshwa va Vakreste ni vatswari va vona emisaveni hinkwayo va tsarile va vula ndlela leyi buku leyi yi va pfuneke ha yona leswaku va tshinela eka Yehovha.

¹⁷ Loko u hlaya Bibele ni swipfuneto swa dyondzo ya Bibele swa le tilweni, swi ku byela hi Yehovha, miehleketo yakwe ni swikongomelo swakwe. Anakanya hi ndlela leyi rungula leri ri nga ku pfunaka ha yona. Ringanisa leswi u swi hlayaka ni leswi u swi hlayeke eku sunguleni. Leswi swi lava ku anakanyisisa. Ku anakanyisisa ku endla leswaku rungula ri nghena embilwini, ri ku tiyisa.​​—⁠⁠Ps. 77:⁠12.

¹⁸ Ha tsaka loko hi vona vantshwa lava khathalelaka xilaveko xa vona xa moya va ta eminhlanganweni ya vandlha. N’wina vantshwa va Vakreste mi nga khutaza van’wana hi ku hamba mi nyikela tinhlamulo leti tiyeke eminhlanganweni. Swi endle pakani leswaku u swi kota ku hlamula hambi ku ri kan’we eminhlanganweni. Hlakulela xinghana lexinene ni vanhu va mintlawa hinkwayo evandlheni hi ku burisana hi ndlela leyi akaka emahlweni ni le ndzhaku ka minhlangano. (Hev. 10:​24, 25) Makwerhu un’wana lontsongo u vule leswaku vatswari vakwe a va n’wi khutaza leswaku a bula ni makwavo wa xinuna kumbe wa xisati wun’we eka nhlangano wun’wana ni wun’wana. Namuntlha u tlangela ntokoto lowu a wu kumeke hi ku hlanganyela ni swirho leswi kuleke swa vandlha.

¹⁹ Landzelela Tipakani Ta Moya: Swi twisa mbilu ku vava hikuva vutomi bya vantshwa vo tala byi kala xikongomelo ni nkongomiso. Hambi swi ri tano, xana a hi swinene ku va ni ntsako lowu tisiwaka hi ku veka tipakani ta swa le tilweni ivi u ti fikelela hi laha ku humelelaka? Tipakani leti, loko ti landzeleriwa hi ku voningeriwa hi dyondzo ya Xikwembu, ti ta ku enerisa sweswi naswona ti ta ku yisa eku ponisiweni loku nga heriki.​​—⁠⁠Ekl. 12:​1, 13.

²⁰ Loko u veka tipakani, khongela ha swona. Byela vatswari va wena ni vakulu. Tikambisise, u kambisisa ni vuswikoti bya wena, ivi u veka tipakani letinene hi ku ya hi leswi u kotaka ku swi endla naswona u nga ti ringanisi ni un’wana. Un’wana ni un’wana u ni xivumbeko xakwe​​—⁠⁠emirini, emiehleketweni, emintlhavekweni ni le moyeni. Hikwalaho, u nga languteli leswaku u nga endla xin’wana ni xin’wana lexi endliwaka hi un’wana.

²¹ Hi tihi tipakani tin’wana leti u nga ti fikelelaka? Loko u nga si va muhuweleri kumbe u nga si khuvuriwa, u nga endla leswi swi va tipakani ta wena. Loko u ri muhuweleri, u nga endla pakani yo tirhisa nkarhi wo karhi evutirhelini vhiki na vhiki. Tikarhatele ku va mudyondzisi lonene eka maendzo yo vuyela, naswona u swi endla pakani ya wena ku fambisa dyondzo ya Bibele. Loko u ri muntshwa la khuvuriweke exikolweni, ha yini u nga swi endli pakani ya wena ku phayona nkarhinyana hi tin’hweti ta ximumu? Ku ni ‘ntirho wo tala eHosini.’​​—⁠⁠1 Kor. 15:⁠58.

²² I Swa Nkoka Ku Pfuniwa Hi Vatswari: Vantshwa evandlheni va nga tshuki va vona onge a va pfuniwi hi munhu eka matshalatshala yo kuma vutomi. Yehovha, hi nhlengeletano yakwe, u nyike ndzayo ya ku pfuna vantshwa lava ku endla swiboho swa siku na siku ni ku hlula swihinga evuton’wini. Ina, vatswari lava tinyiketeleke va ni vutihlamuleri lebyikulu byo pfuna vana va vona va endla swiboho leswi faneleke. Eka 1 Vakorinto 11:⁠3, Bibele yi ri wanuna i nhloko ya muti. Hikwalaho, endyangwini wa Vukreste, laha wansati a tirhisanaka na yena, tatana u rhangela eku dyondziseni ka vana milawu ya Xikwembu. (Ef. 6:⁠4) Leswi swi endliwa hi ndzetelo lowu tiyeke ku sukela evuhlangini. Tanihi leswi byongo bya n’wana byi kulaka hi mimpimo yinharhu eka lembe ro sungula, vatswari a va fanelanga va langutela ehansi vuswikoti bya xihlangi bya ku dyondza. (2 Tim. 3:​15) Loko vana va ri karhi va kula, vatswari va fanele ku hambeta va va dyondzisa ku rhandza Yehovha ni ku hlakulela vuxaka lebyinene na yena.

²³ Ku fanele ku rhanga xikombiso lexinene xa vatswari. Leswi swi ta pfuna vana va n’wina emoyeni ematshan’wini ya ku va byeletela leswi va faneleke ku swi endla ni leswi va nga fanelangiki. Ku veka xikombiso lexinene xa vutswari swi ta katsa ku kombisa mihandzu ya moya endyangwini, eka nsati kumbe nuna wa wena ni vana. (Gal. 5:​22, 23) Vanhu vo tala va swi vonile evuton’wini bya vona leswaku moya wa Xikwembu i nkucetelo wa matimba wa leswinene. Wu nga ku pfuna ku aka miehleketo ni timbilu ta vana va wena.

²⁴ Vatswari nakambe va fanele ku veka xikombiso lexinene eka mikhuva ya dyondzo ya munhu hi yexe, ku va kona eminhlanganweni ni ku hlanganyela evutirhelini bya nsimu nkarhi hinkwawo. Loko u chivirikela ku vulavula hi ntiyiso ekaya, u rhangela evutirhelini hi ku hiseka naswona u khutaza dyondzo ya munhu hi yexe, vana va wena va khutazeka leswaku va khumbeka swinene hi timhaka ta moya.

²⁵ Loko dyondzo ya ndyangu ya Bibele ya nkarhi na nkarhi, leyi dyondzisaka, yi lunghiseleriwe khwatsi, yi nga tsakisa ni ku enerisa, yi va nkarhi wa ku tiyisa vun’we bya ndyangu. Tinyike nkarhi wa ku fikelela mbilu ya vana va wena. (Swiv. 23:​15) Hambi leswi mindyangu yo tala yi tirhisaka nkarhi lowu ku lunghiselela Dyondzo ya Xihondzo xo Rindza ya vhiki na vhiki, swi nga khutaza ku hamba mi bula hi xilaveko xo karhi xa ndyangu. Ku vutisa swivutiso leswi lavaka mavonelo ya munhu ni ku yingisela tinhlamuselo ta xirho xin’wana ni xin’wana xa ndyangu swi ta pfula miehleketo ni ku phyuphyisa. Ku fambisa dyondzo leyi vuyerisaka xirho xin’wana ni xin’wana xa ndyangu i ntlhontlho lowukulu eka nhloko ya ndyangu. Kambe mawaku ku vuyerisa ka swona loko hinkwavo va kula emoyeni! Loko un’wana ni un’wana a katseka, ku ta va ni ntsako.

²⁶ Ndzetelo wa wena wa rirhandzu, lowu hlawulekeke sweswi i wa nkoka ku ponisa vutomi bya vana va wena. (Swiv. 22:⁠6) U ri karhi u tsundzuka sweswo, swa olova ku twisisa leswaku leyi ku nga va dyondzo ya nkoka swinene leyi u nga yi nyikelaka. U nga tshuki u ehleketa leswaku u wexe eka ntirho lowu wo hlawuleka, wa nkoka. Dyondza ku titshega swinene hi Yehovha leswaku a ku kongomisa eku khathaleleni ka swilaveko swa wena swa ndyangu. A swi heleli kwalaho. Ku na van’wana lava va nga ku pfunaka hi laha ku engetelekeke.

²⁷ Leswi Van’wana Va Nga Pfunaka Ha Swona: Vakulu va nga ha hlanganisa vantshwa kun’we ni vatswari va vona, eku basiseni ka Holo ya Mfumo. Va khutaza vana eminhlanganweni ya vandlha. Vakulu ni malandza ya vutirheli lava averiwaka swiphemu swa Nhlangano wa Ntirho va fanele ku languta mavoko ya vana lama tlakukaka loko vayingiseri va hlanganyela. Languta minkarhi ya ku tirhisa vantshwa lava vekaka xikombiso lexinene eka minkombiso ni vatswari va vona. Van’wana va nga ha vulavurisiwa, va endla tinhlamuselo to koma.

²⁸ U nga ma languteli hansi matshalatshala ya vona. Vantshwa i rifuwo lerikulu evandlheni. Hi ku tikhoma ka vona lokunene, vo tala va ‘sasekise dyondzo ya Xikwembu, Muponisi wa hina.’ (Tito 2:​6-10) Xalamukela ku bumabumela vantshwa lava hlanganyelaka hambi ku ri hi xiphemu lexitsongo. Leswi swi va khutaza leswaku va lunghiselela va tlhela va navela ku endla swin’wana enkarhini lowu taka. Ku tsakela ko tano a ku nge pimiwi; i ka risima. Xana i kangani wena tanihi nkulu kumbe nandza wa vutirheli u ya eka swirho leswitsongo swa vandlha u swi nkhensa hi nkulumo kumbe nkombiso wa nhlanga⁠no?

²⁹ Maphayona, xana mi nga pfuna hi yini? Ha yini mi nga kambeli xiyimiso xa n’wina mi vona leswaku mi nga va katsa njhani vana va xikolo eka malunghiselelo ya n’wina ya ni nhlikanhi ni hi mahelo-vhiki? Xana mi vulavula hi ku seketela ntirho wa nkarhi hinkwawo lowu mi wu hlawuleke? Xana nghohe ya n’wina ya swi kombisa leswaku mi kuma ntsako evutirhelini bya n’wina? Xana mi khutaza van’wana leswaku va byi nghenela, ngopfu-ngopfu vantshwa? Loko mi tirha hi yindlu na yindlu, xana ririmi ra n’wina ra aka ni ku khutaza? Loko swi ri tano, swi vula leswaku wena tanihi phayona wa hlanganyela entirhweni lowu wa nkoka wa ku letela.

³⁰ Hinkwavo evandlheni va fanele ku lemuka ntirho lowu wa nkoka wa ku letela lavantshwa. Xana u nga endla malunghiselelo lama tiyeke ya ku tirha na vona evutirhelini bya nsimu? Xana u nga titoloveta rungula ro karhi na vona, eku lunghiseleleni ka ntirho wa yindlu na yindlu? Xana u xiya minkarhi ya ku khutaza ku nghenela mintirho ya nkarhi lowu taka ya moya loko mi ri swin’we evutirhelini? Muhuweleri un’wana ni un’wana u fanele ku lemuka leswaku hambi ku ri marito yo koma ma nga pfuxa miehleketo leyinene ya ku endla tipakani ta moya ta vutomi hinkwabyo, leswi swi nga ta pfuna muntshwa hi laha ku nga heriki.

³¹ Vantshwa Va Nga Tipfuna: Vantshwa, hi mi khutaza leswaku mi yingisa tidyondzo ta Yehovha ivi mi fularhela leswi nyikeriwaka hi misava. Hambeta u tikambela hi ku languta mahanyelo ni ku titwa ka wena. Xana u n’wi langutisisa ku yini Yehovha kun’we ni leswi a swi languteleke eka wena siku na siku? Xana u lwisana ni minkucetelo ya mianakanyo ya Sathana? (1 Tim. 6:​12) Tanihi leswi vanhu, ni vantshwa ngopfu-ngopfu, va lavaka ku rhandziwa hi tintangha ta vona, xana u tikuma u navela ku landzela ntshungu lowu endlaka leswo biha? (Eks. 23:⁠2) Muapostola Pawulo a a swi twisisa leswaku ku ni ntshikilelo lowukulu wa ku endla munhu leswaku a fambisana ni tindlela ta misava.​​—⁠⁠Rhom. 7:​21-⁠23.

³² Swi lava xivindzi ku lwisana ni nkucetelo wa misava, ku teka ndlela leyi hambaneke ni ya tintangha ta misava ni ku yingisa tidyondzo ta Xikwembu. Vavanuna va khale va humelerile eka sweswo. Anakanya hi xivindzi xa Nowa. U kanetane ni misava hinkwayo hi ripfumelo rakwe ni ku tshama ekule ni vadyohi va nkarhi wakwe. (Hev. 11:⁠7) Lwana hi matimba hikuva swi ta ku vuyerisa. U nga tekeleli vanhu lava tsaneke, lava nga riki na matimba, lava chavaka, lava landzelaka ntshungu wa Sathana. Ku hambana na vona, lava vunghana bya lava tsakeriwaka hi Yehovha. (Flp. 3:​17) Tshama exikarhi ka vanhu lava nga ta famba na wena mi ya emisaveni leyintshwa ya Xikwembu leyi tshembisiweke. (Flp. 1:​27) Tsundzuka leswaku ku ni ndlela yin’we ntsena leyi yisaka evuton’wini lebyi nga heriki.​​—⁠⁠Mt. 7:​13, 14.

³³ Loko hina swi hi tsakisa ku vona vantshwa va dzunisa ni ku xixima Xikwembu xa hina, xona swi fanele swi xi tsakisa swinene! A swi kanakanisi leswaku Yehovha wa tsaka loko a vona vantshwa va hlanganyela hi xitalo eku huweleleni ka swikongomelo swakwe leswikulu. I “nḍaka” leyi humaka eka yena, naswona u lava leswo saseka eka vona. (Ps. 127:​3-⁠5; 128:​3-⁠6) Hi ku kombisa ntsako wa Tata wakwe, Kreste Yesu a a kuma ntsako lowukulu loko a ri ni vana lavatsongo, naswona u tshame ehansi a va khutaza leswaku va gandzela Yehovha. U kombise rirhandzu ra ntiyiso eka vona. (Mar. 9:​36, 37; 10:​13-16) Xana vantshwa va hina hi va languta hi laha Yehovha na Kreste Yesu va va langutaka ha kona? Xana vantshwa va le mavandlheni ya hina va yi lemuka ndlela leyi Yehovha ni tintsumi va langutaka ha yona ku tshembeka ka vona ni xikombiso xa vona lexinene? Va fanele va bumabumeriwa ni ku khutaziwa leswaku va tsakisa Yehovha hi ku fanelekela tipakani ta moya. Vantshwa, landzelelani tipakani leti ti nga ta mi tisela mikateko sweswi ni le nkarhini lowu taka.