Buku Leyi Nyikaka Nkongomiso Wa Ntiyiso
1 Misava yi hundzuke hi ndlela leyi hlamarisaka eka lembe xidzana leri nga hundza. Hambi leswi ku endliweke nhluvuko eka mimbulavurisano, mirhi ni swo famba, vutomi bya ndyangu byi ya emahlweni byi onhaka. Timiliyoni ta vanhu ti pfumelela ku kongomisiwa hi filosofi ya vanhu leyi tshamelaka ku hundzuka.
2 Eka xiyimo xa misava lexi hundzukaka hi ku hatlisa, vanhu va Yehovha va vuyeriwile swinene hi ku namarhela Rito ra yena. Bibele a yi kalanga yi hundzuka hi malembe ya magidi, naswona ndzayo ya yona ka ha ri yona leyi tirhaka swinene eku langutaneni ni swiphiqo leswi nga kona namuntlha. Xana hi nga va pfunisa ku yini vanhu lava tsakelaka leswaku va twisisa leswaku Bibele yi ni nkongomiso wa ntiyiso enkarhini wa hina?
3 Loko u siye xiphephana lexi nge “Mhaka Leyi U Nga Tshembaka Bibele Ha Yona” eka riendzo ro sungula, u nga ha vula leswi loko u vuyela:
◼ “Tanihi leswi Bibele yi vulaka hi ku kongoma leswaku yona i rungula leri humaka eka Xikwembu ni leswaku xi hi tshembisa vutomi lebyi nga heriki loko hi pfumela ni ku hanya hi leswi yi swi vulaka, xana u vona onge swi nga va swinene ku kuma swin’wana swo tala malunghana ni marito lawa? [Yimela nhlamulo.] Xiya leswi Bibele yi swi vhumbheke malunghana ni mafambiselo ya swilo ya misava leyi. [Hlaya 2 Timotiya 3:1-5 eka tluka 5 ra xiphephana.] Xana u vona onge nhlamuselo leyi yi fambelana ni misava namuntlha? [Yimela nhlamulo.] Xana ku ni xivangelo lexi twalaka xa ku langutela swiyimo leswi antswaka enkarhini lowu taka?” Kutani u nga veka masungulo ya riendzo rin’wana hi ku bula hi tindzimana timbirhi to hetelela ta xiphephana kumbe u tirhisa tluka 161 ra buku leyi nge Bibele—I Rito Ra Xikwembu Kumbe I Ra Munhu?, u kombisa ntshembo wo tsakisa lowu Bibele yi wu nyikaka vanhu.
4 Loko n’wini wa muti a tsakele nkoka lowu tirhaka wa Bibele naswona wena u kombise misinya yo karhi ya milawu eka ndzima 12 ya buku leyi nge “Bibele—I Rito Ra Xikwembu Kumbe I Ra Munhu?,” u nga ha ku:
◼ “Hi rhandza swilo leswi swi hi pfunaka namuntlha, a swi tano ke? Xana u nga pfumela leswaku loko nyimpi yi herisiwa swi nga hi pfuna? [Yimela nhlamulo.] Loko vanhu va dyondza ku hanyisana hi ku rhula ni va tinxaka tin’wana, a ku ta va masungulo lamanene, a swi tano ke? [Yimela nhlamulo.] Bibele yi vhumbhe swona sweswo. [Hlaya Esaya 2:2, 3.] Xana u tshame u tivutisa leswaku xana leswi swi ta ta hi mukhuva wihi ni hi nkarhi wihi?” Vula leswaku u nga tsakela ku tlhela u bula hi xivutiso lexi hi nkarhi lowu nga wunene eka n’wini wa muti.
5 Loko u siye “New World Translation,” u nga ha vula leswi loko u vuya:
◼ “Loko u hlaya Bibele leyi ndzi ku siyeleke yona, u nga ha va u swi xiyile leswaku yi tirhisa vito ra Xikwembu hinkwako. Yi antswisiwile swinene ku tlula vuhundzuluxeri byo tala bya Bibele. Hambi loko vanhu van’wana va nga ntshunxeki ku tirhisa vito ra Yehovha, hi fanele ku tsundzuka leswaku u paluxe vito rakwe khale a vuya a khutaza malandza ya yena leswaku ma ri tirhisa ku n’wi vitana ha rona tanihi Xikwembu xa ntiyiso lexi hanyaka. Vona leswi mupisalema a swi tsaleke eka Pisalema 83:18.” Hlaya tsalwa ivi u nyika n’wini wa muti nkarhi wa ku hlamusela. Hi ku ya hi ku tsakela loku kombisiwaka, u nga ha tirhisa rungula rin’wana, leri kumekaka ehansi ka xihloko lexi nge “Jehovah,” ku sukela eka tluka 191 ra buku leyi nge Reasoning.
6 I Bibele ntsena leyi nyikaka nkongomiso lowu laviwaka hi vanhu. (Yer. 10:23) Ku dyondza Rito ra Xikwembu hi yona ntsena ndlela yo dyondza hi swikongomelo swa xona ni ku amukeriwa hi xona. Hikwalaho, a hi hisekeleni ku rhamba van’wana leswaku va vuyeriwa hi ndzayo ni xitsundzuxo xa yona lexi tirhaka.