Nkoka Wa Bibele eMisaveni Ya Namuntlha
1 Vanhu vo tala namuntlha va languta Bibele yi ri ya xikhale ni leyi nga riki na ntiyiso. Hambi leswi yi nga buku leyi hangalasiwaka swinene ni leyi hundzuluxeriweke hi tindzimi to tala ematin’wini hinkwawo, a hi vangani lava yi hlayaka naswona lava landzelaka nkongomiso wa yona a va talanga.
2 Ku hambana na vona, hina hi languta Bibele tanihi Rito ra Xikwembu. Vumbhoni byi komba leswaku yi ni ntiyiso wa matimu. Ku tlula kwalaho, ku pfumelelana ka yona loku hlamarisaka, vuprofeta bya yona, vutlharhi bya yona ni leswi yi nga ni matimba yo endla munhu a endla leswinene evuton’wini byakwe, hinkwaswo swi kombisa leswaku Bibele yi ‘huhuteriwe hi Xikwembu.’ (2 Tim. 3:16) Ntokoto lowu hi nga na wona ni ku tlangela nyiko leyi yo hlawuleka swi fanele swi hi susumetela ku khutaza van’wana leswaku va kambisisa risima ra yona ra ntiyiso.
3 U nga ha sungula hi ndlela leyi:
◼ “Tanihi leswi vanhu va langutaneke ni swiphiqo swo nonon’hwa, vanhu vo tala swa va tikela ku pfumela eka Xikwembu, kumbexana a va tshembi leswaku Xikwembu xi nga tlhantlha swiphiqo leswi hi langutanaka na swona. Xana wena u titwisa ku yini hi leswi? [Yimela nhlamulo.] Xiya nhloko-mhaka ya xiphephana lexi, Mhaka Leyi U Nga Tshembaka Bibele Ha Yona.” N’wi kombe xifaniso lexi nga exifunengetweni, ivi u hlaya ndzimana yo sungula ni ya vumbirhi eka tluka 2. Loko n’wini wa muti a tsakela, u nga ha hlaya kutani u bula hi matsalwa lama kombisiweke eka ndzimana ya vumbirhi. Endla malunghiselelo ya ku vuya mi ta ya emahlweni mi hlaya xiphephana—kumbexana u tirhisa xin’wana xa swihlokwana leswi nga kwalaho hi ndlela ya xivutiso, leswaku u pfuxa ku tsakela.
4 Ku tshinelela kun’wana ku nga ha va loku fanaka ni loku:
◼ “Xana a hi ntiyiso leswaku vanhu va fanele ku kongomisiwa leswaku va hlula swiphiqo swa vutomi? [Yimela nhlamulo.] Enkarhini lowu hundzeke vanhu hakanyingi a va languta eBibeleni leswaku yi va kongomisa, kambe minkarhi yi cincile. Xana u vona onge Bibele yi ni nkoka lowu tirhaka namuntlha? [Yimela nhlamulo.] Xiya leswi tsariweke eka 2 Timotiya 3:16. [Hlaya.] Rito ra Xikwembu leri tsariweke ri hi pfuna ku endla swiboho swa vutlharhi ri tlhela ri nyika ntshembo lowu tiyeke wa nkarhi lowu taka.” Hlaya Yohane 17:3. Kombisa yinhla yin’we kumbe timbirhi leti u ti hlawuleke ebukwini leyi nge Bibele—I Rito Ra Xikwembu Kumbe I Ra Munhu? leswaku u kombisa nkoka lowu tirhaka wa Bibele.
5 Swi nga ha ku pfuna ku tirhisa swingheniso swin’wana leswi tsariweke eka tluka 10 ra buku leyi nge Reasoning ehansi ka xihlokwana lexi nge “Bible/God.” Rungula leri engetelekeke ri kumeka eka matluka 58-68 leri ri nga pfunaka ku hlamula swivutiso swa vini va muti kumbe ku herisa ku kaneta ka vona.
6 Ku Fambisa New World Translation: Vanhu vo tala va tsakela ku kuma vuhundzuluxeri bya manguva lawa bya Bibele ya Xinghezi. Ha yini u nga va fambiseli New World Translation? Loko u khome ya wena, u nga ha hlamusela tinhla tin’wana leti pfunaka ta New World Translation. U nga kombisa yinhla yin’we kumbe timbirhi eka matluka 276-80 ya buku leyi nge Reasoning. Byela n’wini wa muti leswaku u nga tsakela ku n’wi siyela New World Translation kun’we ni buku leyi nge Bibele—Xana I Rito Ra Xikwembu Kumbe I Ra Munhu? hi munyikelo wa R15,00. Nkarhi wun’wana u nga ha kuma ni swichudeni swa xikolo xa le henhla leswi lavaka ku va ni New World Translation.
7 Xalamukela minkarhi ya ku khutaza vanhu leswaku va hlaya Bibele. Pfuna vanhu lava tsakelaka leswaku va xixima ni ku rhandza Rito ra Xikwembu leri tsariweke. Hi ku tirhisa misinya ya milawu ya rona evuton’wini bya vona ni ku va ni vutivi bya ntiyiso, va ta vuyeriwa swinene sweswi ni le nkarhini lowu taka.—Ps. 119:105.