Ku Bumabumela Rito Ra Xikwembu
1 Vo tala namuntlha va languta Bibele tanihi ya khale ni leyi nga fambisaniki ni ntiyiso. Hambi swi ri tano, Rito ra Xikwembu ri ni matimba yo cinca vutomi. (Vahev. 4:12) Leswi swi kombisiwe hi ku ehleketa, ku tikhoma ni malangutelo lama hluvukisiweke ya vanhu vo tala va tinxaka-nxaka. (Vaef. 4:24) Ku tirhisa ndzayo ya Bibele swi vumba xiyimo xa ndyangu lexi tsakisaka. Swi tlakusa vuxaka bya vuakelani, ku nga khathariseki rixaka, muhlovo kumbe xiyimo xa mahanyelo.—Luka 10:29-37.
2 Ntokoto wa hina vini hi Rito ra Xikwembu wu fanele wu hi susumetela ku khutaza van’wana leswaku va kambisisa ntikelo wa ntiyiso wa Bibele hi voxe. Xivumbeko lexi xiyekaka xo endla leswi xi nyikeriwile eka Mhaka ya hina yo Vulavurisana leyintshwa, “Ha Yini U Hlaya Bibele?” Hi nga yi tirhisa njhani mhaka leyi kun’we ni buku leyi nge Vantshwa ni broxara leyi nge Vunharhu-un’we kumbe broxara leyi nge “Vonani!” evutirhelini bya hina hi November?
KU TIRHISA MHAKA YO VULAVURISANA
3 Endzhaku ka xingheniso xo koma, hi nga ha ku: “Hikwalaho ka mintshikilelo ni swiphiqo swo tala leswi khumbaka mindyangu namuntlha, hi khutaza ku kokela nyingiso eka xihlovo lexi nga xona ntsena xa mpfuno lowu tirhaka. Enkarhini lowu hundzeke, vanhu hakanyingi a a va languta eBibeleni leswaku va kuma nkongomiso, kambe minkarhi yi cincile, a swi tano ke? Xana u ehleketa leswaku Bibele yi nga pfuna ku tlhantlha swiphiqo swa namuntlha, ku fana ni ku tirhisiwa loko biha ka swidzidzirisi, ku tikhoma ko biha ni makaya lama hahlukeke? [Yimela nhlamulo.] Xiya leswi Bibele yi swi vulaka eka 2 Timotiya 3:16. [Hlaya.] Xana u ehleketa leswaku Bibele yi nga wu nyikela muxaka wolowo wa nkucetelo? [Yimela nhlamulo.] Vanhu vo tala va lava vuleteri byo karhi loko va langutane ni swiphiqo kumbe loko va endla swiboho evuton’wini, xana a va endli tano? Xiya laha ku landzela Rito ra Xikwembu ku nga hi yisaka kona. [Hlaya Yohane 17:3.] Bibele yi nyika nkongomiso wa le rivaleni wo tlhantlha swiphiqo swa munhu hi xiyexe ni ku kombisa ntshembo lowu tiyeke hi vumundzuku.” Loko munhu a kombisa ku tsakela ka xiviri leswaku a twisisa Rito ra Xikwembu, hi nga ha kombisa ntikelo wa buku leyi nge Vantshwa kumbe yin’wana ya tibroxara.
4 Tanihi leswi hi vulavulaka ni vanhu hi nkoka wo hlaya Bibele, u nga ha lava ku kokela nyingiso wa vona eka Ndzima 35 ebukwini leyi nge Vantshwa. Endzhaku ka loko hi ku komisa a kombise timhaka to hambana-hambana to ti hlaya leti nga kona u nga hlaya ndzimana yo hetelela eka tluka 288. Nakambe u nga ha lava ku tirhisa ndzima 39, tluka 312 ku kombisa leswaku ku dyondza Bibele ku nga va loku tsakisaka hi ndlela yihi. Loko u tirhisa buku leyi nge Vantshwa, kombisa leswaku Bibele yi wu nyikela njhani mpfuno wa swiphiqo swo fana ni ku hlula ku tirhisa loko biha ka swidzidzirisi (ndzima 34), vunghwavava (tindzima 23 na 24) ni ku kuma vanghana va ntiyiso (ndzima 8). Nyikela dyondzo ya le kaya ya Bibele ya munhu hi xiyexe eka lava kombisaka ku tsakela.
5 Loko u yisa nyingiso eka broxara leyi nge Vunharhu-un’we, u nga ha ku: “Vanhu vo tala lavanene va dyondzisiwe ku pfumela eka Vunharhu-un’we, hambi swi ri tano, va kuma mhaka leyi swi nonon’hwa ngopfu ku yi twisisa. Broxara leyi yi kambisisa Vunharhu-un’we hi vuenti lebyikulu ku suka eka langutelo ra matimu na hi leswi Bibele yi swi vulaka. Xana u nga swi tsakela ku yi hlaya?” Na loko u tirhisa broxara leyi nge “Vonani!”, u nga kuma ku tsakela ka n’wini wa muti hi ku kombisa xifunengeto lexi kokaka mahlo kumbe xihloko lexi nge “Swilo Leswo Biha—Ha Yini Xikwembu Xi Swi Pfumelela?” eka tluka 15.
6 Hi November, xalamukela minkarhi yo khutaza vanhu ku dyondza Bibele. Landzela lava va kombisaka ku tsakela hi maendzo yo vuyela hi ku hatlisa. Va pfune ku hlakulela ku tlangela matimba ya Rito ra Xikwembu hi xiviri. Hi ku tirhisa misinya ya milawu ya rona evuton’wini bya vona, va ta kuma mimbuyelo leyi nga riki na makumu sweswi ni le vuton’wini lebyi nga ta ta.—1 Tim. 4:8.