Tivekele Nkarhi Wa Ntirho Wa Timagazini

¹ Yehovha u hlele leswaku ku ta va ni ‘ku rhula, vumundzuku ni ntshembo’ wa lava landzelaka tindlela takwe. (Yer. 29:​11) Rungula leri yelanaka ni ku langutela loku, ri nyikeriwa hi ndlela leyi nga enkarhini eka Xihondzo xo Rindza ni Xalamuka! Timagazini leti ti nga pfuna vanhu va tinxaka hinkwato ehansi ka swiyimo swihi na swihi. (1 Tim. 2:⁠4) Xana wena ni ndyangu wa wena mi hamba mi tivekela nkarhi wa ku hangalasa timagazini?

² Loko ku fambisa ka n’wina timagazini ku hungutekile, xana mhaka leyi yi nga lulamisiwa njhani? Nchumu wun’wana wa nkoka i ku tshama u ri karhi u tlangela leswi tameriweke hi timagazini ta hina. Munhu un’wana u tsarile: “Ku hlaya timagazini ta n’wina i nchumu lowu tsakisaka hakunene. A hi timagazini leti nga ni ‘nchavelelo’ ntsena, leti nga pfuniki, leti nga riki na nkoka, kambe ti ni vuleteri ni nkongomiso wa ku endla vutomi byi va ni xikongomelo.” Xihondzo xo Rindza ni Xalamuka! ti vumbiwa hi ndzavisiso wa vukheta naswona i malunghiselelo ya “nanḍa lo’nene, wo tlhariha.” (Mt. 24:​45) I switirho leswi humelelaka swa ku fikelela timbilu ta vanhu.

³ Tolovelana ni swihloko leswi nga eka timagazini leti u ti fambisaka. Languta tinhla leti yelanaka ni swiphiqo leswi nga kona emugangeni wa ka n’wina. I swinene ku lunghiselela ku vulavula ni vavanuna, vavasati ni vantshwa lava u nga ha hlanganaka na vona emakaya kumbe exitarateni. Lunghekela ku kombisa ndlela leyi timagazini ti khumbaka vanhu ni mindyangu hinkwayo ha yona.

⁴ Xalamukela Timagazini: Ku nyikela vumbhoni hi timagazini ku fanele ku va xiphemu xa nkoka eka xiyimiso xa wena xa ntirho wa nsimu. Xana hi yihi minkarhi leyinene ngopfu eka wena ya ku fambisa timagazini? Xana u tshame u ringeta ku tirha hi yindlu na yindlu ku ringana awara kumbe ku tlula ni ndzhenga kumbe ni madyambu emahlweni ka Dyondzo ya wena ya Buku ya Vandlha? Ku nyikela vumbhoni ni madyambu ku ve ni mihandzu eka tindhawu tin’wana. Mugqivela i nkarhi lowunene wa ku fambisa timagazini etindhawini to hambana-hambana, kambe ni masiku laman’wana na wona ma nga ha tirhisiwa ku endla ntirho lowu. Ntirho wa yindlu na yindlu ni wa le switolo hi switolo wu fanele ku va xiphemu xa nkarhi na nkarhi xa Siku ra Timagazini.

⁵ Un’wana ni un’wana u fanele ku va ni oda ya nkarhi na nkarhi ya tikopi leti fambisiwaka ta nkandziyiso wun’wana ni wun’wana wa timagazini. Loko nkarhi wun’wana u ri ni minkandziyiso ya khale, u nga ha yi tirhisela ku komba vini va miti tinhloko-mhaka to hambana-hambana leti hlanganisiwaka hi timagazini leti. Nkarhi na nkarhi, tikopi ta khale ta timagazini ti nga ha siyiwa lomu ku tshamaka vanhu lava nga ha tirhiki, vuhlayiselo bya vadyuhari ni swibedlhele, loko swi pfumeleriwa. Timagazini teto hinkwato ti nga hlayiwa tanihi leti fambisiweke naswona ti fanele ku vikiwa n’hweti na n’hweti eka xiphephana xa wena xa Xiviko xa Ntirho wa Nsimu.

⁶ Hi ku tirhisa swiringanyeto leswi nga laha henhla, a swi kanakanisi leswaku u ta vona ku engeteleka eka nhlayo ya timagazini leti u kotaka ku ti fambisa. Vanhu va timbilu letinene lava karhatiwaka hi vutomi eka mafambiselo ya sweswi yo biha, va tlangela rungula leri phyuphyisaka tanihi leri kumekaka eka Xihondzo xo Rindza ni Xalamuka! Timagazini leti hakunene ti nyika swakudya swa moya leswi laviwaka hi lava lavaka ku amukeriwa hi Yehovha. Hikwalaho, xalamukela timagazini naswona u lavisisa tindlela ta ku engetela ku fambisa minkandziyiso leyi ya nkoka ensin’wini ya ka n’wina.