Fikelela Mbilu Ya Xichudeni Xa Wena Xa Bibele
1 Xana u lava leswaku xichudeni xa wena xa Bibele xi tirhisa leswi xi swi dyondzaka? Xi fanele ku swi tirhisa leswaku xi pfuneka eka vutivi lebyi xi byi kumaka. Ku va u kota ku susumetela xichudeni xa wena xa Bibele leswaku xi endla swo karhi, u fanele ku fikelela mbilu ya xona. Hi siku ra Pentekosta ya 33 C.E., nkulumo ya muapostola Petro leyi phyuphyisaka yi ‘nghene yi fika etimbilwini’ ta vanhu va kwalomu ka 3 000, lava “amukeleke rito ra yena hi ku ṭaka” naswona va tlhele va khuvuriwa siku rero. (Mint. 2:37, 41) Xana u nga yi fikelela njhani mbilu ya xichudeni xa wena xa Bibele?
2 Lunghiselela Hi Ku Helela: U nga ringeti ku hlanganisa mhaka yo tala ngopfu lerova u pfumala ni nkarhi wo tala wa ku bula ni xichudeni hi rungula. Hlela ka ha ri emahlweni tinhla leti u nga ta ti kandziyisa, naswona u tiyiseka leswaku u twisisa matsalwa ni ku kota ku ma tirhisa hi laha ku humelelaka. Anakanyisisa ka ha ri emahlweni hi swivutiso leswi nga ha tlakukaka emianakanyweni ya xichudeni hikwalaho ka matshamelo lawa xi nga le ka wona. Loko u tolovelane kahle ni xichudeni xa wena, vutivi lebyi byi ta ku pfuna leswaku u lunghiselela rungula leri ri nga ta xi fanela kahle.
3 Tekelela Madyondziselo Ya Yesu: Yesu a a tirhisa swifaniso leswaku a olovisa tinhla to nonon’hwa ni ku pfuna swichudeni swakwe leswaku swi kuma mongo ni ku twisisa xiyimo. (Lk. 10:29-37) Hi laha ku fanaka, na wena u nga nghenisa tidyondzo letinene embilwini ya xichudeni xa wena xa Bibele hi ku endla swifaniso swi olova, u tirhisa swilo leswi tolovelekeke evuton’wini, ni ku swi tirhisa eka swiyimo swa xichudeni.
4 Swivutiso swi pfuna ngopfu eku fikeleleni ka timbilu ta swichudeni swa Bibele, hi laha Yesu a kombiseke ha kona minkarhi yo tala. (Lk. 10:36) Kambe u nga eneriseki loko xichudeni xi hlaya nhlamulo ntsena ebukwini. Tirhisa swivutiso leswi kongomisaka, leswaku u yisa mianakanyo ya yena eka makumu lawa a a nga ma anakanyanga eku sunguleni. Ndlela leyi yi tlhela yi pfuna xichudeni ku antswisa vuswikoti byo ehleketa. Vutisa swivutiso leswi lavaka mavonelo yakwe leswaku u kuma leswi yena a swi twisisaka emhakeni yoleyo. Kutani u nga ha vona tindhawu leti a lavaka mpfuno eka tona, naswona u nga ha ya emahlweni u n’wi pfuna hi laha ku kongomeke.
5 Loko xichudeni xa Bibele xi nga endli nhluvuko, u fanele ku endla leswaku xi boxa swivangelo swa kona. Leswi swi nga ha katsa ku xi endzela hi nkarhi wun’wana ku nga ri nkarhi lowu tolovelekeke wa dyondzo. Ha yini xi kanakana ku teka goza? Xana ku ni yinhla yo karhi ya Matsalwa leyi xi nga yi twisisiki? Xana xi kanakana ku endla mindzulamiso yo karhi endleleni ya xona ya vutomi? Loko xichudeni xa Bibele xi ringeta ku ‘yima eka mianakanyo yimbirhi leyi hambanaka,’ xi pfune leswaku xi vona khombo ra sweswo.—1 Tih. 18:21.
6 Muapostola Pawulo u swi lemukile leswaku ku dyondzisa ntiyiso wa Bibele eka vanhu lava tsakelaka i ntirho lowu ponisaka vutomi, kutani u tsundzuxe Vakreste hinkwavo leswaku va ‘hambeta va khathalela ku dyondzisa ka vona.’ (1 Tim. 4:16) Lava u va fambiselaka tidyondzo ta Bibele va fanele va dyondza swo tala, ku nga ri tinhla ta Bibele ntsena ni swiendlakalo swa misava. Va fanele ku kuma vutivi lebyi kongomeke malunghana na Yehovha na Yesu ni ku pfuniwa ku kurisa vuxaka lebyikulu na vona. Loko va endla sweswo va ta susumeteleka ku kombisa ripfumelo ra vona hi mintirho. (Yak. 2:17, 21, 22) Loko mbilu ya xichudeni yi fikeleriwa, xi ta susumeteleka ku landzela ndlela leyi nga ta dzunisa Yehovha ni ku sirhelela vutomi bya xona.—Swiv. 2:20-22.