Tivonele Eka Tintswalo Leti Nga Fanelangiki
1 Vanhu va Yehovha va tiviwa hi tintswalo ta vona ni moya wo hanana. Hakanyingi leswi swi vonaka kahle hi swilo leswi vonakaka loko hi tekelela muakelani lonene wa Musamariya, loyi Yesu a vulavuleke hi yena exifanisweni xakwe lexi tsakisaka. (Lk. 10:29-37) Kambe, van’wana lava nga riki na swilo leswi vonakaka va nga ha ringeta ku tlanga hi tintswalo ta hina. Xisweswo, rirhandzu ra hina eka van’wana ri fanele ri lawuriwa hi “vutivi lebyi kongomeke ni ku twisisa loku hetisekeke.”—Flp. 1:9, NW.
2 Endzeni Ka Vandlha: Hi xikombiso, un’wana a nga ha vula leswaku a nga tirhi kumbe a nyika swivangelo swin’wana leswaku a pfuniwa. Minkarhi yin’wana vanhu lava a va swi chivirikeli ku lava mintirho kambe va lava leswaku van’wana va va wundla. Hi vanhu vo tano muapostola Pawulo u te: “Loko uṅwana a ala ku tira, ni ku dya, a nga ṭhuki a dya.”—2 Tes. 3:10.
3 “Nkari ni khombo” swa hi fikela hinkwerhu, xisweswo loko hi lava swilo leswi vonakaka, hi pfumala “v̌uŝa bya hina bya siku riṅwana ni riṅwana,” a hi fanelanga hi karhateka ngopfu, tanihi leswi Yehovha a nyikaka lava n’wi rhandzaka ni lava endlaka ku rhandza kakwe. (Ekl. 9:11; Mt. 6:11, 31, 32) La pfumalaka a nga ha swi kuma swi pfuna ku vulavula ni un’wana wa vakulu. Swi nga endleka vakulu va tiva malunghiselelo ya mfumo lama endleriwaka ku pfuna, naswona va nga ha va pfuna ku tata tifomo kumbe ku tiva swilaveko swa malunghiselelo yo tano. Ehansi ka swiyimo hinkwaswo, vakulu va nga ha kambisisa swiyimo swa un’wana ni un’wana la kombelaka mpfuno ivi va vona leswi nga endliwaka.—Ringanisa 1 Timotiya 5:3-16.
4 Vakanganyisi Lava Famba-fambaka: Sosayiti yi ya emahlweni yi kuma swiviko swa leswaku van’wana evandlheni va dyeriwe mali ni swilo leswi vonakaka hi vakanganyisi lava famba-fambaka. Leswi a swi fanelanga swi hi hlamarisa, tanihi leswi Matsalwa ma tsundzuxaka leswaku “v̌anhu la’v̌o biha ni v̌akanganyisi v̌a ta hunḍela mahlweni e ku biheni, v̌a ri kari v̌a kanganyisa, na v̌ona v̌a kanganyisiwa.” (2 Tim. 3:13) Hakanyingi vakanganyisi lava va vula leswaku a va na mali, naswona va lava mali leswaku va ta kuma swo famba ni swakudya swa riendzo ro tlhelela ekaya. Hambi leswi va nga twalaka va tshembeka, minkarhi yo tala a hi Timbhoni ta Yehovha nikatsongo, kambe va tiendla onge hi vona.
5 Loko munhu loyi u nga n’wi tiviki a kombela mpfuno, i swa nkoka ku vonana ni un’wana wa vakulu va vandlha, loyi a nga rhangelaka eku lavisiseni loko munhu loyi a ri makwerhu. Hakanyingi ku fanele ku biwa riqingho eka un’wana wa vakulu va vandlha ra ka vona leswaku a hlamusela kahle xiyimo xa munhu loyi. Vamakwerhu va hina va xinuna ni va xisati va xiviri lava tikumaka va lava mpfuno va nga swi langutelanga va ta swi twisisa leswaku xivutiso lexi xi endleriwe ku sirhelela vanhu hinkwavo lava khumbekaka. Hi tlhelo rin’wana, vakanganyisi va ta vonaka hi vulavisisi lebyi. A ku na xivangelo xo va ehleketelela ngopfu vanhu lava hi nga va tiviki, kambe hi fanele hi tivonela eka vakanganyisi lava vo biha.—Nakambe vona km 11/80, tluka 7.
6 Hosi Solomoni wo tlhariha wa tsundzuxa: “U nga ali ku endla leŝinene e ka loyi u nga ni fanelo e ka yena, loko swi ri mandleni ya wena.” (Swiv. 3:27) Hi ku twisisa ka hina ka vutlharhi, hi nga ha ya emahlweni hi va ni tintswalo kambe hi tivonela hi tintswalo leti nga fanelangiki.