Hi Nyikiwa Swo Tala —Ku Laviwa Swo Tala
1 Mawaku ndlela leyi hi tsakaka ha yona hi leswi hi nga kuma ntiyiso! Hikwalaho ka ku tinyiketela ka hina eka Yehovha, hi “tamerisiw[e] ntirho wa Evhangeli.” (1 Tes. 2:4) Leswi swi hi endla hi va ni vutihlamuleri lebyikulu. Yesu u te: “Un’wana ni un’wana la nyikiweke leswo tala, ku ta laviwa leswo tala eka yena.”—Lk. 12:48b.
2 Marito wolawo ma tiyisile hakunene! Tanihi leswi hinkwerhu ka hina hi katekisiweke hi vutivi bya Rito ra Xikwembu, vun’we lebyi hlamarisaka bya vamakwerhu ni ntshembo lowu tsakisaka, ku nga vuriwa ku tiyisiwile leswaku hi nyikiwe swo tala. Hi laha ku faneleke, ku languteriwe swo tala eka hina.
3 Hlayisa Langutelo Lerinene Ra Swilaveko: Van’wana va gimete hi ku vula leswaku ku languteriwa swo tala eka hina. Tanihi Nhloko ya vandlha ra Vukreste, Yesu Kreste u kunguhata ‘leswi lavekaka’ leswaku swi ta tirha hi mfanelo. (Ef. 4:15, 16) U hi tiyisekisa leswaku ‘joko ra yena ra olova naswona ndzhwalo wa yena wa vevuka.’ (Mt. 11:28-30) Hi rirhandzu u anakanyela lava nonon’hweriwaka. (Lk. 21:1-4) Loko hi tikarhata, ku nga khathariseki mpimo wa leswi lavekaka eka hina, hi ta katekisiwa.—Kol. 3:23, 24.
4 Tivutise, ‘Xana swilaveko swa Mfumo i swo sungula evuton’wini bya mina? Xana ndzi tirhisa nkarhi ni rifuwo ra mina hi ndlela leyi dzunisaka vito ra Xikwembu ni ku pfuna van’wana? Xana ndzi kuma ntsako wa mina lowukulu hi ku tirhela Yehovha ematshanweni ya ku tsakela swilo leswi vonakaka swa vutianakanyi?’ Tinhlamulo ta hina leto tshembeka ta swivutiso leswi ti paluxa swikongomelo leswi nga etimbilwini ta hina.—Lk. 6:45.
5 Papalata Ku Ringeriwa Ku Endla Leswo Biha: A ku si tshama ku va ni miringo ni mintshikilelo leyikulu swonghasi malunghana ni ku titsakisa, makwanga ni ku rhandza ntsako wa nyama. Masiku hinkwawo hi langutane ni mintlhontlho ya mahanyelo, ni miringo yo landzula xiyimo xa hina. Leswaku hi langutana ni mintlhontlho leyi hi laha ku humelelaka, hi fanele ku kombela Yehovha leswaku a hi pfuna. (Mt. 26:41) Hi ku tirhisa moya wakwe, a nga hi tiyisa. (Esa. 40:29) Ku hlaya Rito ra Xikwembu siku na siku swa pfuna swinene. (Ps. 1:2, 3) Nakambe ku titshinya ni ku tikhoma i swa nkoka swinene.—1 Kor. 9:27.
6 A hi fanelanga hi rhandza leswo lulama ntsena—hi fanele hi tlhela hi venga leswo biha. (Ps. 97:10) Leswi swi vula leswaku a hi fanelanga hi hlakulela ku navela swilo leswo biha. Swivuriso 6:16-19 yi longoloxa swilo swa nkombo leswi Yehovha a swi vengaka. Swi le rivaleni leswaku, loyi a lavaka ku tsakisa Yehovha na yena u fanele ku venga swilo leswo tano. Hikwalaho ka leswi hi katekisiweke hi vutivi lebyi kongomeke bya ntiyiso, hi fanele ku hanya hi ku pfumelelana ni vutivi byolebyo, hi tshama hi ri karhi hi anakanya hi swilo leswinene ntsena.
7 I swa nkoka ku khongelela swiyimo leswi nga ta hi pfumelela ‘ku endla swo tala nkarhi hinkwawo entirhweni wa Hosi.’ (1 Kor. 15:58) Vo tala va kume leswaku ku tshama va khomekile entirhweni wa Yehovha swa sirhelela hikuva swi endla leswaku va nga vi na wona nkarhi wo hlongorisa swilo leswi nga pfuniki nchumu.
8 Loko hi languta kahle, swilo hinkwaswo leswi Yehovha a swi lavaka eka hina a swi tiki. (Mik. 6:8) Hi ni xivangelo lexinene xo tsakela lunghelo rin’wana ni rin’wana ra ntirho. (Ef. 5:20) Hikwalaho, hi hambeta “hi tirha swinene ni ku tikarhat[a],” hi ri ni ku tshemba leswaku hakelo ya hina yi ta va leyikulu swinene ku tlula xin’wana ni xin’wana lexi laviwaka eka hina.—1 Tim. 4:10.