Pfuna Van’wana Leswaku Va “Landza Leswi Tsariweke”
1 A swi enelanga ku ‘yingisa’ marito ya vuprofeta lebyi nga ebukwini ya Nhlavutelo. Leswaku a vuyeriwa hi xitalo, munhu u fanele ku “landza” leswi tsariweke. (Nhlav. 1:3) Ku fambisa buku i goza ro sungula ntsena ra ku endla vadyondzisiwa. Loko hi kume lava tsakelaka lava tiyimiseleke ku yingisela, hi fanele ku tlhelela hi ku hatlisa hi ya va pfuna leswaku va dyondza swo tala. Xana hi nga vulavula hi yini eriendzweni ra hina ro vuyela?
2 Loko mi vulavule hi tihanci ta mune to fanekisela eriendzweni ra wena ro sungula, u nga ha sungula bulo ra wena hi ndlela leyi:
◼ “Eku sunguleni hi vulavule hi buku ya Nhlavutelo ni ndlela leyi vuprofeta bya yona byi hetisekaka ha yona namuntlha eka swiendlakalo swa misava. Nhlavutelo ndzima 6 yi vhumbhe ku jaha ka vagadi va tihanci va mune vo fanekisela, leswi nga ta hetelela hi madzolonga ni nhlomulo lowukulu emisaveni. Hi vone swilo leswi swi humelela emahlweni ya hina hi ku kongoma. Vo tala va tivutisa leswaku nhlomulo lowu wu ta hela rini leswaku hi ta tsakela vutomi emisaveni ya ku rhula. Xana hi rihi langutelo ra wena? [Yimela nhlamulo.] Vadyondzisiwa va Yesu a va tsakela ku tiva nhlamulo ya xivutiso lexi.” Hlaya Matewu 24:3, laha xivutiso xi vutisiwaka kona, na ndzimana 34, laha Yesu a nyikaka nhlamulo. Loko ku tsakela ku ri kona, hlamusela swo tala hi masiku ya makumu.
3 Loko mi bule hi Mfumo wa Xikwembu eriendzweni ro sungula, u nga ha tsakela ku ya emahlweni hi ku vutisa xivutiso lexi:
◼ “Hi ku ya hi langutelo ra wena, i hulumendhe ya muxaka muni leyi lavekaka leswaku yi enerisa swilaveko hinkwaswo swa vanhu? [Yimela nhlamulo. Hlaya Yeremiya 10:23.] Hi laha u nga vonaka ha kona, Xikwembu a xi nga kunguhatanga leswaku munhu a kongomisa makungu ya yena. Matshalatshala yo endla sweswo handle ka mpfuno wa Xikwembu i xivangelo xa swiphiqo swo tala swa hina. Mfumo wa Xikwembu i hulumendhe yi ri yoxe leyi nga hi nyikaka leswi hi swi lavaka.” Pfula eka tluka 230 ra buku leyi nge Reasoning, kutani u hlamusela matsalwa lama nga ehansi ka xihlokwana xo sungula. Yisa bulo emahlweni hi ku hlamusela ndlela leyi hi nga tshembaka Xikwembu hi xitalo ha yona.
4 U nga ha lava ku ringeta leswi landzelaka leswaku u sungula bulo ra Matsalwa:
◼ Kombisa xifaniso eka tluka 302 ra buku leyi nge Ku Chaputa Ka Nhlavutelo, kutani u hlamusela: “Vanhu va ta tsakela swiyimo leswi, loko ku rhandza ka Xikwembu ku endliwa emisaveni tanihi le tilweni. Hambi swi ri tano, van’wana va chava leswaku swiyimo leswo biha swi ta tlhela swi va kona. Leswi a swi nge vi tano hikuva vanhu hinkwavo lavo biha va ta va va nga ha ri kona.” Hlaya Pisalema 37:10, 11. Rhamba n’wini wa muti leswaku a tirhisa nongonoko wa hina wa dyondzo ya Bibele leswaku a ta dyondza swo tala.
5 Loko u siye xiphephana lexi nge “Vutomi eMisaveni Leyintshwa Ya Ku Rhula,” kombisa xifaniso lexi nga emahlweni kutani u hlaya ndzimana 1 ehansi ka xihloko lexi nge “Vutomi eMisaveni Leyintshwa Ya Xikwembu.” Kutani u ku:
◼ “Loko hi lava ku hanya emisaveni yo tano, ku ni xin’wana xa nkoka lexi hi faneleke ku xi endla.” Hlaya ndzimana yo hetelela, kutani u fambisa buku leyi nge Ku Chaputa Ka Nhlavutelo.
6 Tanihi leswi xikongomelo xa hina ku nga ku sungula tidyondzo ta Bibele, hi fanele ku endla maendzo yo vuyela lama humelelaka. Hlela nkarhi wa wona, kutani u lunghiselela kahle. Hi ndlela leyi hi nga va pfuna hakunene vanhu va timbilu letinene.—Nhlav. 22:6, 7.