Ku Huwelela ‘Marito Ya Vuprofeta’
1 Hi hanya enkarhini lowu vuprofeta lebyi nga ebukwini ya Nhlavutelo byi hetisekaka ha wona. Vo tala va lava ku twisisa nhlamuselo ya swiendlakalo leswi karhataka leswi humelelaka. Va nga vuyeriwa hi ku ‘yingisa marito’ ya vuprofeta bya Nhlavutelo. (Nhlav. 1:3) Hi n’hweti ya March, hi ni lunghelo ro va pfuna hi ku fambisa buku leyi nge Ku Chaputa Ka Nhlavutelo. Loko hi yi fambisa hi fanele ku tsundzuka leswaku swiphiqo leswi vanhu va langutaneke na swona namuntlha swi vhumbhiwe ebukwini ya Nhlavutelo. Hikwalaho, xana hi nga vula yini?
2 Xingheniso lexi xi nga ha va xi fanerile:
◼ “Nyimpi, ndlala ni mavabyi swi hlasele vanhu eka lembe-xidzana leri ra vu-20. Xana u ehleketa leswaku swi vangiwa hi yini hambi leswi munhu a endleke nhluvuko lowukulu wa vutshila? [Yimela nhlamulo.] Vo tala va hlamarisiwe hi ku tiva leswaku swiyimo leswi swi vhumbhiwe eBibeleni. Swi nga ha endleka u tolovelane ni marito lama nge ‘vagadi va tihanci ta mune va Apokalipsi.’ Leswi Bibele yi swi vulaka hi vagadi lava va tihanci entiyisweni i vuprofeta lebyi hetisekaka eka swiendlakalo swa misava namuntlha. [Pfula buku leyi nge Ku Chaputa Ka Nhlavutelo eka ndzima 16, kutani u kombisa swifaniso leswi nga eka tluka 91-7.] Hambi leswi vuprofeta lebyi byi vhumbhaka nkarhi wa nhlomulo lowukulu, byi tlhela byi nyika ni ntshembo. [Hlaya Nhlavutelo 6:2 eka ndzimana 3.] Mugadi wa hanci yo basa i Yesu Kreste. U tshembise ku herisa vubihi ni ku tisa misava ya ntsako ni ku rhula hi ku tirhisa Mfumo lowu a hi dyondziseke ku wu khongelela.” Fambisa buku.
3 Kumbexana xivutiso lexi xi nga yisa ebulweni ra nkoka:
◼ “Xana u vona onge ku laveka yini leswaku ku susiwa swiyimo swo biha emisaveni? [Yimela nhlamulo.] Vanhu vo tala va pfumela leswaku ku laveka ku cinca lokukulu loko misava leyi yi ta pona. Bibele yi kombisa leswaku Xikwembu xi tiva ndlela yo tlhantlha swiphiqo swa hina naswona xi tshembise ku hi pfuna.” Pfula ebukwini leyi nge Ku Chaputa Ka Nhlavutelo, tluka 171, kutani u hlaya Nhlavutelo 11:15 eka ndzimana 1. Pfula swifaniso leswi nga eka matluka 302 na 308, kutani u kombisa mikateko leyi nga ta va kona eMfun’weni wa Kreste. Kutani hlamusela ndlela leyi n’wini wa muti a nga vuyeriwaka ha yona hi yexe.
4 U nga ha titwa u ntshunxekile ku vula swin’wana swo fana ni leswi:
◼ “Vanhu vo tala lava hlayeke buku ya Bibele ya Nhlavutelo va kuma yi nonon’hwa ku yi twisisa. Yi hlamusela swiendlakalo swo hambana-hambana leswi xiyekaka ni leswi nga tolovelekangiki. Buku leyi, leyi nge Nhlavutelo—Ku Chaputa Ka Yona Loku Hlamarisaka Ku Tshinele!, yi nyikela nhlamuselo ya ndzimana yin’wana ni yin’wana ya buku hinkwayo ya Nhlavutelo naswona yi kombisa ndlela leyi hina hi hexe hi khumbekaka ha yona hi ku hetiseka ka vuprofeta bya yona.” Pfula buku eka tluka 15, ndzimana 2, kutani u kombisa Nhlavutelo 1:1, leyi tsariweke hi marito lama dzwihaleke. Hlamusela leswaku tinhlamuselo to karhi ta muxaka lowu ti nyikeriwile endzimaneni yin’wana ni yin’wana ebukwini ya Nhlavutelo ni leswaku rungula leri ri ta n’wi pfuna leswaku a twisisa vuprofeta lebyi lebyi hlamarisaka. Fambisa buku hi munyikelo wa R10,50.
5 Loko munhu a khomekile kumbe loko a ala nyiko ya buku leyi nge Ku Chaputa Ka Nhlavutelo, u nga ha fambisa timagazini timbirhi kumbe xiphephana. Tiyiseka leswaku wa tlhelela u ya pfuxeta ku tsakela ka rungula ra Mfumo.
6 Rungula leri nga eka Nhlavutelo ri khumba vanhu hinkwavo. Un’wana ni un’wana u fanele ku twa marito ya vuprofeta. Onge hi nga endla hinkwaswo leswi hi nga swi kotaka ku twarisa rungula leri ra nkoka.