BOKISI RA SWIVUTISO

◼ Xana switirho leswi hi swi tirhisaka entirhweni wo nyikela vumbhoni hi fanele hi swi languta njhani?

 ¹ Hambi loko a ri ni xingheniso xa Matsalwa lexi faneleke emianakanyweni, muhuweleri wa mahungu lamanene a nga ha va a nga hlelekanga loko swi ta eka switirho leswi a swi tirhisaka. Loko a nghena emutini, a nga ha va a nga ri na yona buku leyi fambisiwaka enkarhini wolowo. Timagazini, tibroxara ni swiphephana leswi nga enkwameni wakwe lowu a wu tirhiselaka ku veka vumbhoni swi nga ha va swi petselelekile kumbe swi handzukile. A nga ha va a nga ri na xitsalo kumbe rhekhodo ya yindlu na yindlu hikwalaho ka leswi nkwama wakwe wu nga hlelekangiki kahle. I swa nkoka leswaku u xiyisisa kahle switirho swa wena u nga si ya entirhweni wa le nsin’wini.

 ² I swilo swihi leswi nkwama lowu hlelekeke kahle lowu tirhiseriwaka ku veka vumbhoni wu faneleke ku va na swona? Bibele i ya nkoka. Katsa ni mphakelo wa tirhekhodo ta yindlu na yindlu. Tiyiseka leswaku u ni buku leyi fambisiwaka en’hwetini yoleyo. Minkandziyiso ya sweswinyana ya timagazini, kun’we ni swiphephana ni tibroxara, na swona swa laveka. Teka ni buku leyi nge Reasoning. Ku va ni Vutirheli Bya Hina Bya Mfumo bya sweswinyana swi ta ku pfuna ku pfuxeta swingheniso leswi ringanyetiwaka u nga si nghena emutini. Loko u tirha ensin’wini leyi u nga hlanganaka ni vanhu lava vulavulaka ririmi rimbe, swi ta va swi fanerile ku va ni xibukwana lexi nge Good News for All Nations. Ku va ni kopi yin’wana ya tibuku ta hina leti endleriweke vantshwa swi ta ku pfuna leswaku u lunghekela ku vulavula ni vana va kondlo-a-ndzi-dyi.

 ³ Swilo hinkwaswo leswi tirhisiwaka swi fanele ku languteka ni ku hleriwa kahle enkwameni wa wena. A swi bohi leswaku nkwama wu va lowuntshwa, kambe wu fanele wu basa ni ku va exiyin’weni lexinene. Nkwama wa wena lowu tirhiseriwaka ku veka vumbhoni i xiphemu xa switirho leswi tirhisiwaka ku twarisa mahungu lamanene. A wu tshame wu ri exiyin’weni lexinene.